ބަންގްލަދޭޝްގައި އިޖުތިމާއީ ރައްކާތެރިކަން ފޯރުކޮށްދިނުމަށް ކުރިއަށްގެންދާ "ފެމިލީ ކާޑު" ދޫކުރުމުގެ މަޝްރޫއު މުޅި ގައުމަށް ފުޅާކުރުމާއި، އެ މަޝްރޫއު ތަންފީޒުކުރުމުގެ ސްޓްރެޓެޖީއާ ބެހޭގޮތުން ބަންގްލަދޭޝްގެ ބޮޑުވަޒީރު ތާރިގް ރަހްމާން އިސްނަންގަވައިގެން ހައި-ލެވަލް ބައްދަލުވުމެއް ބާއްވަވައިފިއެވެ.
ބަންގްލަދޭޝްގެ ސެކްރެޓޭރިއެޓްގެ ކެބިނެޓް ޑިވިޒަންގައި ބޭއްވުނު މި ބައްދަލުވުމުގައި، ވެރިކަން ކުރާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ އިންތިޚާބީ މެނިފެސްޓޯގައި ހިމެނޭ އެންމެ މުހިންމު އެއް ވައުދުކަމަށްވާ ފެމިލީ ކާޑު މަޝްރޫއު ކުރިއަށްގޮސްފައިވާ މިންވަރު މުރާޖައާކޮށް، މުޅި ގައުމަށް އެކަން ފުޅާކުރާނެ ރޯޑްމެޕާ މެދު ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.
މި ބައްދަލުވުމުގައި ބޮޑުވަޒީރު ތާރިގް ރަހްމާން ވިދާޅުވީ، ފެމިލީ ކާޑުގެ އެހީތެރިކަން އެކަމަށް އެންމެ ޙައްޤުވެރި އާއިލާތަކަށް ދެފުއް ފެންނަ އަދި އިންސާފުވެރި ގޮތެއްގައި ފޯރުކޮށްދިނުމަށްޓަކައި ސައްހަ އަދި އިތުބާރު ހުރި ޑޭޓާބޭސްއެއް އެކުލަވާލުމަކީ އިންތިހާއަށް މުހިންމު ކަމެއް ކަމަށެވެ. އަދި މި މަޝްރޫއު މަރުހަލާތަކަކަށް ބަހާލައިގެން ކުރިއަށްގެންދާއިރު، ޒަމާނީ ޓެކްނޮލޮޖީގެ ބޭނުން އެންމެ ފުރިހަމައަށް ހިފުމަށާއި، ގުޅުންހުރި ހުރިހާ ވުޒާރާތަކާއި އިދާރާތަކުގެ މެދުގައި ބަދަހި ކޯޑިނޭޝަނެއް އުފެއްދުމަށް އެމަނިކުފާނު އިރުޝާދު ދެއްވިއެވެ.
މީގެއިތުރުން، މައުލޫމާތު އެއްކުރުމާއި، ކަށަވަރުކުރުމާއި، އެހީ ލިބޭ ފަރާތްތައް ނެގުމުގެ ހުރިހާ މަރުހަލާއެއްގައިވެސް އެންމެ މަތީ ދަރަޖައަށް ދެފުއްފެންނަ ގޮތަށް އަދި ޒިންމާދާރުކަމާއެކު މަސައްކަތް ކުރިއަށްގެންދިއުމަށް ބޮޑުވަޒީރު ވަނީ ކަމާބެހޭ ފަރާތްތަކަށް އަންގަވާފައެވެ.
މި ބައްދަލުވުމުގައި ސޯޝަލް ވެލްފެއާ މިނިސްޓަރު ޑރ. އަބޫ ޒަފަރު މުހައްމަދު ޒާހިދު ހުސައިންއާއި، ސްޓޭޓް މިނިސްޓަރު ފަރުޒާނާ ޝަރްމީންގެ އިތުރުން ސަރުކާރުގެ އެހެނިހެން އިސް ވެރިންނާއި އިދާރާތަކުގެ މަސްއޫލުވެރިން ބައިވެރިވެވަޑައިގެންނެވިއެވެ.
