އިންޑިއާގެ ތަމަޅަ ނާޑޫ ސްޓޭޓްގެ އާ ބޮޑުވަޒީރު ސީ. ޖޯސެފް ވިޖޭ، ކޮރަޕްޝަނާއި ރިޝްވަތާ ދެކޮޅަށް ސަރުކާރުން ގެންގުޅޭނެ ހަރުކަށި ސިޔާސަތު ހާމަކުރައްވައި، ރައްޔިތުންނަށް ސާފު މެސެޖެއް ދެއްވައިފިއެވެ.
މަޤާމުގެ ހުވާ ކުރެއްވުމަށްފަހު ބޭއްވުނު ރަސްމިއްޔާތެއްގައި ވާހަކަދައްކަވަމުން ބޮޑުވަޒީރު ވިޖޭ ވަނީ، އެއްވެސް ކަމެއްގައި އެއްވެސް ފަރާތަކަށް ރިޝްވަތު ނުދިނުމަށް ރައްޔިތުންނަށް އިލްތިމާސް ކުރައްވާފައެވެ. އަދި ސަރުކާރުގެ އެއްވެސް މުވައްޒަފަކު ނުވަތަ އޮފިޝަލަކު ރިޝްވަތަށް އެދިއްޖެނަމަ، އެކަމަށް އިންކާރުކޮށް، ލަސްނުކޮށް ކަމާބެހޭ އިދާރާތަކަށް އެކަން ރިޕޯޓު ކުރުމަށް އޭނާ އެދިވަޑައިގަތެވެ.
> "ކޮރަޕްޝަނާ ދެކޮޅަށް ކުރެވޭ ހަނގުރާމަ ފެށެނީ ކޮންމެ ފަރުދެއްގެ ކިބައިން. ރިޝްވަތު ނުދިނުމަކީ މި ވަބާއިން މުޖުތަމަޢު ސަލާމަތް ކުރުމަށް އެޅޭނެ އެންމެ ބޮޑު ފިޔަވަޅު،" ބޮޑުވަޒީރު ވިޖޭ ވިދާޅުވިއެވެ.
ބޮޑުވަޒީރު އިތުރަށް ފާހަގަކުރެއްވި ގޮތުގައި، އޭނާގެ ސަރުކާރުގެ އެންމެ ބޮޑު އަމާޒަކީ ތެދުވެރިކަމާއި، ދެފުށް ފެންނަ ގޮތަކަށް އަދި ރައްޔިތުންނަށް ޖަވާބުދާރީވާނެ ފަދަ ވެރިކަމެއް ޤާއިމުކުރުމެވެ. މިގޮތުން ވެރިކަމުގެ ނިޒާމުގެ ތެރެއިން ކޮރަޕްޝަން ނައްތާލުމަށްޓަކައި "ޒީރޯ ޓޮލަރެންސް" ނުވަތަ ކޮރަޕްޝަނުގެ އެއްވެސް ޢަމަލަކަށް ދޫނުދޭނެ ސިޔާސަތެއް ގެންގުޅުއްވާނެ ކަމުގެ ފުރިހަމަ ޔަގީންކަން އޭނާ ވަނީ ރައްޔިތުންނަށް ދެއްވާފައެވެ.
ފިލްމީ ދާއިރާ ދޫކޮށް ސިޔާސީ މައިދާނަށް ނުކުމެވަޑައިގެންނެވި ވިޖޭގެ "ތަމަޅަގަ ވެއްތުރި ކަޅަގަމް" (ޓީވީކޭ) ޕާޓީން ވަނީ ދާދިފަހުން ބޭއްވި އިންތިޚާބުގައި ތާރީޚީ ކާމިޔާބީއެއް ހޯދައި، ގިނަ ދުވަސްތަކެއް ވަންދެން އޮތް ދެ ޕާޓީގެ ވެރިކަން ނިމުމަކަށް ގެނެސްފައެވެ.
