ސުޕްރީމް ކޯޓުގެ ފަނޑިޔާރުން މަދުކުރުން: މިއީ ރައީސަކު ޝަރުއީ ނިޒާމަށްދޭ އެންމެ ބޮޑު އުދުވާނީ ހަމަލާ: ޝާހިިދު

ސުޕްރީމް ކޯޓުގެ ފަނޑިޔާރުން މަދުކުރުން: މިއީ ރައީސަކު ޝަރުއީ ނިޒާމަށްދޭ އެންމެ ބޮޑު އުދުވާނީ ހަމަލާ: ޝާހިިދު

ޤާނޫނަށް ބަދަލު ގެނެސްގެން ސުޕްރީމް ކޯޓުގެ ބެންޗު ބަދަލު ކުރަން އުޅުމަކީ ރައީސަކު، ޝަރުޢީ ނިޒާމަށް ދޭނެ އެންމެ ބޮޑު "އުދުވާނީ ހަމަލާ" ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ކޯޓު ތަކުގެ ގާނޫނަށް ބަދަލު ގެނެސް، ސުޕްރީމް ކޯޓުގެ ފަނޑިޔާރުންގެ އަދަދު މަދު ކުރުމަށް ހުށަހަޅައި ސަރުކާރުގެ ފަރާތުން، ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ރައްޔިތުންގެ މަޖިލީހަށް ހުށަހަޅުއްވާފައިވާ ބިލާމެދު ކަންބޮޑުވުން ފާޅު ކުރައްވައި ޝާހިދު ވިދާޅުވީ، ގާނޫނު އަސާސީއަށް ގެނެސްފައިވާ އިސްލާހަކާއި ގުޅުން ހުރި ދުސްތޫރީ މައްސަލައެއް ސުޕްރިމް ކޯޓުން ބަލަމުން ދަނިކޮށް، އެ ކޯޓުގެ ބެންޗު ބަދަލު ކުރުމަށް ރައީސް މުއިއްޒު ގާނޫނަށް ބަދަލު ގެންނެވުމަކީ، ރައީސަކު ޝަރުޢީ ނިޒާމަށް އަމާޒުކޮށް ދޭނެ އެންމެ ބޮޑު ޢުދުވާނީ ހަމަލާ ކަމަށެވެ. ޝާހިދު ވަނީ އެކަން ކުށްވެރި ކުރައްވާފައެވެ.

"ރައީސް މުއިއްޒުގެ މި ޢައިރު ޒިންމާދާރު އަމަލު ހަރުކަށި އިބާރާތުން ކުށްވެރި ކުރަން." ޝާހިދު ވިދާޅުވިއެވެ.

ޝާހިދު އިތުރަށް ވިދާޅުވީ، ދިވެހިރާއްޖެ ބަލައިގެންފައިވާ، ތިންބާރު ވަކިކޮށްފައިވާ ޑިމޮކްރަޓިކް ނިޒާމުގެ މިނިވަންކަން ނެތިކޮށް، ބާރުތައް މުށުތެރެއަށްލައި، ޚުދުމުތާރު ވެރިކަމެއް މި ރާއްޖޭގައި ގާއިމްކުރުމަށް، "ގޮނޑިކޮއްކޮ" ސުޕްރިމް ކޯޓެއް އުފެއްދުމަށް ރައީސް މުއިއްޒުއަށް ފުރުސަތު ނުދިނުމަށް ރައްޔިތުންގެ މަޖިލިހުގެ އެންމެހާ މެމްބަރުންނަށް ގޮވާލައްވާ ކަމަށެވެ.

‏"ޝަރުއީ ދާއިރާއާއި ދެކޮޅަށް ރައީސް މުއިއްޒު މި ހިންގަވާ ބޮޑު ޖަރީމާއާއި ދެކޮޅަށް މުޅި ޝަރުއީ ދާއިރާއާއި, ހުރިހާ ރައްޔިތުން ތެދުވާންޖެހޭ. ޚުދުމުޚްތާރު ވެރިކަމަށް ދިވެހި ރައްޔިތުން ޖާގައެއް ނުދޭނެ." ޝާހިދު ވިދާޅުވިއެވެ.

ސުޕްރީމް ކޯޓުގެ ފަނޑިޔާރުންގެ އަދަދު މަދު ކުރުމަށް ސަރުކާރުން މަޖިލީހަށް ހުށަހަޅާފައިވާ ބިލުގައި ބުނެފައި ވަނީ، ފަނޑިޔާރުންގެ އަދަދު މަދު ކުރުމުގެ ސަބަބުން ކޯޓުން ވަކި ކުރާނެ ދެ ފަނޑިޔާރުން ކަނޑައަޅަން ޖެހޭނީ ޖުޑީޝަލް ސާވިސް ކޮމިޝަނުން ކަމަށެވެ. އަދި ގާނޫނަށް އަމަލު ކުރަންފަށާތާ 5 ދުވަހުގެ ތެރޭގައި ވަކި ކުރާނެ ފަނޑިޔާރުންގެ ނަންތައް ޖޭއެސްސީން މަޖިލީހަށް ފޮނުވަން ޖެހޭނެ ކަމަށްވެސް ބިލުގައި ބުނެފައިވެއެވެ.

ވަކި ކުރާ ފަނޑިޔާރުންގެ ނަންތައް ފޮނުވާތާ 7 ދުވަހުގެ ތެރޭގައި އެ ފަނޑިޔާރުން ވަކި ކުރުމާމެދު ރައްޔިތުންގެ މަޖިލީހުން ގޮތެއް ނިންމަންޖެހޭނެ ކަމަށްވެސް ވެއެވެ. ފަނޑިޔާރުން ވަކި ކުރެވޭނީ މަޖިލީހުގެ ތިންބައިކުޅަ ދެބައިގެ އަޣުލަބިއްޔަތުންނެވެ.

ބިލުގައި ބުނެފައިވަނީ، ސުޕްރީމް ކޯޓުން ވަކި ކުރާ ދެ ފަނޑިޔާރުން ކަނޑައެޅުމަށްޓަކައި، އެހެނިހެން ގާނޫނުތަކާއި ގަވާއިދުތަކުން އެފަދަ މަސައްކަތް ކުރަން ދީފައިވާ މުއްދަތުތަކަށް ޖޭއެސްސީން ބަލާކަށް ނުޖެހޭނެ ކަމަށެވެ.

ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ބިލެއް ހުށަހެޅިއިރު، ސުޕްރީމް ކޯޓުގައި މިހާރު ރައްޔިތުންގެ މަޖިލީހުން ދާދިފަހުން ފާސްކުރި ގާނޫނެއްގެ މައްސަލައިގެ ޝަރީއަތް ދަނީ ކުރިއަށެވެ. އެއީ މަޖިލީހުގެ މެމްބަރުންގެ ގޮނޑި ގެއްލުމާއި ގުޅޭގޮތުން ދާދިފަހުން މަޖިލީހުން ގާނޫނަށް ގެނައި އިސްލާހާއި ގުޅޭގޮތުންނެވެ.

ހިޔާލުފާޅު ކުރައްވާ!

Leave a Reply

Your email address will not be published. Required fields are marked *