ސިޔާސީ ވާދަވެރިންނަށް މިހާރު އެންމެ އުދަނގޫވަނީ ރައީސް ޑރ. މުޙަންމަދު މުއިއްޒު ރާއްޖޭގެ ރަށްރަށަށް ވަޑައިގެން، އެ ރަށްރަށުގެ ކަޅުފަސްގަނޑުގައި ރައްޔިތުންނާއެކު ވަގުތު ހޭދަކުރައްވާތީ ކަމަށް މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ރައީސް ރާއްޖޭގެ ރަށަކަށް ވަޑައިގަންނަވާ ވީޑިޔޯކޮޅަކާއެކު އެކްސްގައި ޝިޔާމް ކުރެއްވި ޕޯސްޓެއްގައި ވިދާޅުވީ، ރައީސް މުއިއްޒު ހުސްވި ހަފްތާގައި ރ. އަތޮޅަށް ކުރެއްވި ދަތުރުފުޅަކީވެސް އުންމީދުތަކެއް ގެނުވައިދިން، ތާރީޚީ ދަތުރުފުޅެއް ކަމަށެވެ.
"ރައީސްގެ ރ. އަތޮޅުގެ ދަތުރުފުޅުވެސް ވެގެން މިދިޔައީ އަތޮޅުގެ ލޮބުވެތި ރައްޔިތުންނަށް އުފާވެރިކަން ގެނުވި ރައްޔިތުންނަށް މުހިއްމު ޚިދުމަތް ތަކެއް ފެށިގެން ދިޔަ އަދި އުއްމީދު ތަކެއް ގެނުވި ތާރީޚީ ދަތުރުފުޅަކަށް." ޝިޔާމް ވިދާޅުވިއެވެ.
ޝިޔާމް ވިދާޅުވީ، ރައްޖޭގެ ރަށްރަށަށް ވަޑައިގެން ރައްޔިތުން ގާތަށް ރައީސް ވަޑައިގަންނަވާތީ އިދިކޮޅު ސިޔާސީ ފަރާތްތަކަށް އުނދަގޫވަމުން އަންނަ ކަމަށެވެ.
"ވަކިން ޚާއްޞަކޮށް ރަށްރަށުގެ ކަޅުފަހުގައި ރައްޔިތުންނާއެކު ހޭދަކުރައްވާ އަގުހުރި ވަގުތު ތަކުގެ ސަބަބުން." ޝިޔާމް ވިދާޅުވިއެވެ.
ޝިޔާމް މިފަދައިން ވިދާޅުވިއިރު، ނިމިދިޔަ ހަފްތާގައި ރައީސް ވަނީ ރ. އަތޮޅުގެ ބަޔެއް ރަށަށް ވަޑައިގެން އެ ރައްޔިތުންނާ ބައްދަލު ކުރައްވާފައެވެ. މި ދަތުރުފުޅުގައި ރައީސް ވަނީ ރ. އަތޮޅުގެ 11 ރަށަކަށް ވަޑައިގެން އާންމުންގެ އިތުރުން ކައުންސިލްތަކާވެސް ބައްދަލު ކުރައްވާފައެވެ. އަދި ކޮމިޓީތަކާއި، ބަޔެއް ޖަމްއިއްޔާތަކާވެސް ރައީސް ބައްދަލު ކުރައްވާފައިވެއެވެ.