އަންނަ އަހަރަށް އޮޑިޓް އޮފީހަށް 114.4 މިލިޔަން ރުފިޔާގެ ބަޖެޓެއް ދޭން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސް ކޮށްފިއެވެ.
އޮޑިޓް ޖެނެރަލްގެ އޮދީހުގެ ބަޖެޓަކީ، ދައުލަތުގެ ބެޖެޓާ ވަކިން ރައްޔިތުންގެ މަޖިލީހުން ފާސްކުރަންޖެހޭ ބަޖެޓެކެވެ. އެހެންކަމުން އޮޑިޓް އޮފީހުން މާލިއްޔަތު ކޮމިޓީއަށް ފޮނުވާފައިވަނީ، އަންނަ އަހަރަށް، ކެޕިޓަލް އަދި ރިކަރަނަޓް ހަރަދުގެ ގޮތުގައި 80.4 މިލިޔަން ރުފިޔާގެ ބަޖެޓެކެވެ.
ނަމަވެސް ހުޅުމާލޭގަިއ ހަދަން ހަމަޖެހިފައިވާ އެ އޮފީހުގެ އާ އިމާރާތް ހެދުމަށް، 19 މިލިޔަން ރުފިޔާ ޕީއެސްއައިޕީގެ ގޮތުގައި ހިމަނާފައިވާތީ އެ އޮފީހުން ހެދިފައިވާ ޖުމްލަ ބަޖެތްގެ އަދަދު 99.5 މިލިޔަނަށް އަރައެވެ.
އެ ބަޖެޓަށް ފިނޭންސް މިނިސްޓްރީން ދީފައިވާ ލަފާގައި ވަނީ، އޮޑިޓް އޮފީހަށް 64 މިލިޔަން ރުފިޔާގެ ސީލިން އެއް ކަނޑައަޅައިފައެވެ. އެހެން ކަމުން ބަޖެޓްގެ އެކި ދިމަދިމާލުން ހަރަދު ކުޑަކުރުމަށާއި އެކަމަށްޓަކައި އޮޑީޓް އޮފީހުގެ މުވައްޒަފުންނަށް ވަޒީފާގެ ކުރިއެރުން ދިނުމަށްޓަަކައި ހިމަނާފައިވާ ބައިން 7 މިލިޔަން ރުފިޔާ އުނިކޮށް ދަތުރު ކުރުމުގެ ހަރަދުންވެސް ބައެއް އުނިކުރަން ވަނީ ހިމަނއިފައެވެ.
ފިނޭންސް މިނިސްޓްރީގެ ލަފައާއި ގުޅިގެން މާލިއްޔަތު ކޮމިޓީގެ މުގައްރިރު މާމިނގިލީ ދާއިރާގެ މެންބަރު ގާސިމް އިބްރާހިމް ވިދާޅުވީ، ދައުލަތުގެ ބަޖެޓާ ވަކިން އޮޑިޑް އޮފީހުގެ ބަޖެޓް ފާސްކުރަން ގާނޫނުއަސާސީގައި ހިމަނާފައިވަނީ ސަބަބެއް ނެތި ނޫން ކަަމަށެވެ.
އެއީ ފިނޭންސް މިިނިސްޓްރީގެ ކޮންޓްރޯލް އޮޑިޓް އޮފީހުގެ މައްޗަށް ފޯރުނަ ނުދިނުމަށާއި، މަޖިލީހުން ފާސްކުރާ ގޮތަކަށް އޮޑިޓް އޮފީހުގެ ބަޖެޓަށް ފިނޭންސް މިނިސްޓަރާއި ރައީސުލްޖުމްހޫރިއްޔާވެސް ޖެހި ވަޑައިގަންނަވާނީ އަމަލު ކުރެއްވުމަށް ކަމަށްވެސް ވިދާޅުވިއެވެ. އެހެންކަމުން ގާސިމް ވިދާޅުވީ، ފިނޭންސް މިނިސްޓަރު ފޮނުވާ ލަފައަށް ބަލައިގެން އޮޑިޑް އޮފީހުގެ ބަޖެޓް ނިންމަން ނުޖެހޭ ކަމަށެވެ.
ގާސިމް ވިދާޅުވީ، ދައުލަތުގައި ހިންގާ ކޮރަޕްޝަންގެ އިތުރުން، ދައުލަތުގެ ހަރަދުތައް ހިނގާ ނުހިނގާގޮތް ބެލޭނީ، އޮޑިޓް އޮފީސް ވަރުގަދަކޮށް އެތާ ތިބި ފަންނީ މުވައްޒަފުންނަށް ލިބޭ މުސާރަ އެހެން ތަންތަނަށްވުރެން ރަނގަޅު ވެގެން ކަމަށެވެ. ތަޖުރިބާ ލިބިފައިތިބި ފަންނީ މީހުން އިހުލާސްތެރިކަމާއެކު މަސައްކަތް ކުރާނީ އޭރުން ކަމަށްވެސް ގާސިމް ވިދާޅުވިއެވެ.
އެހެންކަމުން އޮޑިޓް އޮފީހުން ހުށަހަޅާފައި ވާގޮތަށް 99.5 މިިޔަން ރުފިޔާގެ ބަޖެޓެއް ކޮމިޓީން ފާސް ކުރަން ފެންނަ ކަމަށް ގާސިމް ވިދާޅުވިއެވެ.
ނަމަވެސް އެ ކޮމިޓީގައި އިންނަވާ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވީ، އެހެން ފަހަރުތަކުގައި ވެސް އޮޑިޓް އޮފީހުގެ ބަޖެޓް ކަނޑައަޅަނީ ފިނޭންސް މިނިސްޓަރާ މަޝްވަރާކޮށް ދެފަރާތުގެ ހިޔާލު ތަކާއެކުގައި ކަމަށެވެ. މުވައްޒަފުންގެ މުސާރަ ބޮޑުކޮށް ކަންކަން ހަރުދަނާ ކުރުމަށް ބޭނުންވެފައި އޮތީ ހަމައެކަނި އޮޑިޓް އޮފީސް ނޫން ކަމަށާއި، ޖުޑިޝަރީ އާއި އެމްއެންޑީއެފް ފަދަ މުއައްސަސާތައްވެސް އޮތީ އެ ހާލުގައި ކަމަށްވެސް ވިދާޅުވިއެވެ.
އެހެންކަމުން ފިނޭންސް މިނިސްޓަރާ މަޝްވަރާކޮށް އޮޑިޓް އޮފީހުގެ ބަޖެޓް ކޮމިޓީން ފާސްކުރަން ޣަފޫރު ހުށަހެޅުއްވިއެވެ.
ނަމަވެސް ބާރަށު ދާއިރާގެ މެމްބަރު ސުޖާ ވިދާޅުވީ، ދައުލަތުގެ ހުރިހާ ފަރާތެއް އޮޑިޓް ކުރުމަށް ހުރި ގޮންޖެހުންތަކުގެ ވާހަކަ ދައްކާއިރު، އޮޑިޓާ ޖެނެރަލްގެ އޮފީސް ބާރުވެރިކޮށް މަސައްކަތްތައް ކުރެވޭނެގޮތް ހަދައިދޭންޖެހޭ ކަމަށެވެ. އެހެން ކަމުން ޖުމްލަ 114.5 މިލިޔަން ރުފިޔާގެ ބަޖެޓެއް އޮޑިޓް އޮފީހަށް ފާސްކޮށް ދިނުމަށް ސުޖާ ހުށަހެޅުއްވިއެވެ.
ގާސިމްގެ ވާހައާއެކު، ސުޖާގެ ހުށަހެޅުމަށް ހިތަދޫ މެދު ދާއިރާގެ މެންބަރު އަހްމަދު އަޒާން ތާއީދު ކުރައްވައި އެގޮތަށް ބަޖެޓް ފާސްކުރިއެވެ.
