ސޯނީއިން ވަނީ "ރިއޯން ޕޮކެޓް ޕްރޯ ޕްލަސް" ގެ ނަމުގައި އާ މޮޑެލްއެއް ދާދި ފަހުން ތައާރަފު ކޮށްފައެވެ. މިއީ ހަށިގަނޑުގެ ފިނިހޫނުމިން ބަލަހައްޓައިދޭ ޓެކްނޮލޮޖީއެކެވެ.

ސޯނީގެ އާ އުފެއްދުން: "ރިއޯން ޕޮކެޓް ޕްރޯ ޕްލަސް" – ހޫނު މޫސުމަށް ޚާއްސަ ސްމާޓް ކޫލިންގ ޑިވައިސްއެއް

ސޯނީއިން ދާދި ފަހުން ވަނީ ލިބޭނެ އެންމެ ފަހުގެ ޓެކްނޮލޮޖީ ބޭނުން ކޮށްގެން ހަށިގަނޑު ފިނިކޮށް ބެހެއްޓުމަށް އެހީވެދޭ "ރިއޯން ޕޮކެޓް ޕްރޯ ޕްލަސް" ތައާރަފު ކޮށްފައެވެ. މިއީ ހޫނު ގަދަ ދުވަސްވަރު ފަންކާ ނުވަތަ އެނޫންވެސް އަތުން ހިފަހައްޓާ ފިނިކުރާ ވަސީލަތްތަކާ ނުލައި، ވަރަށް ފަސޭހަކަމާއެކު ހަށިގަނޑުގެ ފިނިހޫނުމިން ކޮންޓްރޯލް ކުރުމަށް ފަރުމާކޮށްފައިވާ ޑިވައިސްއެކެވެ.

މިއީ ގަމީސް ނުވަތަ ހެދުމުގެ އެތެރެއިން ކަރުގެ ފަހަތުގައި ހަރުކޮށްގެން ގެންގުޅޭ ކުޑަ ޑިވައިސްއެކެވެ. މިއީ "ޕެލްޓިއަރ އިފެކްޓް" ކިޔާ ސައިންޓިފިކް އުސޫލެއް ބޭނުންކޮށްގެން ހަންގަނޑާ ކޮންޓެކްޓްވާ ބައި ފިނިކޮށް ނުވަތަ ހޫނުކޮށްދޭ އެއްޗެކެވެ.
މި އާ މޮޑެލްގައި ކުރިން ހުރި މޮޑެލްތަކަށްވުރެ 20 އިންސައްތަ އިތުރަށް ފިނި ކުރުމުގެ ގާބިލުކަން ލިބިފައިވެއެވެ.
މި ޑިވައިސްގައި ހުންނަ ސްމާޓް ސެންސަރުތަކުން ހަންގަނޑުގެ ފިނިހޫނުމިން މޮނިޓާ ކުރެއެވެ. މީގެ އިތުރުން "ޕޮކެޓް ޓެގް" ކިޔާ ކުޑަ ޑިވައިސްއެއްގެ އެހީގައި ވަށައިގެންވާ ވައިގެ ފިނިހޫނުމިނާއި ތެތްކަން ބަލައި، އޮޓޮމެޓިކުން ފިނިކަން އެޖެސްޓް ކުރެއެވެ.
އެއްފަހަރު ޗާޖު ކޮށްލުމުން 10 ގަޑިއިރަށްވުރެ ގިނަ އިރު ބޭނުން ކުރެވޭނެއެވެ. މި ޑެވައިސް ކަރުގައި އަޅުވާ ވައިރު ވަނީ ކުރިއަށްވުރެ ހަރުދަނާކޮށް، ހެދުމުގެ ތެރެއިން މީހުންނަށް ނޭނގޭނެހެން ފަރުމާ ކޮށްފައެވެ.

މި ޑިވައިސް އަކީ ހޫނު ގަދަ ގައުމުތަކުގައި ދިރިއުޅޭ މީހުންނަށާއި، ބޭރުގައި ގިނަ ވަގުތު ހޭދަކުރާ މީހުންނަށް އަދި އޮފީސްތަކުގެ ފިނިހޫނުމިން ކޮންޓްރޯލް ކުރަން ބޭނުންވާ މީހުންނަށް ވަރަށް އެކަށޭނެ އުފެއްދުމެކެވެ. މިއީ ހަމައެކަނި ފިނިކުރާ އެއްޗެއް ނޫނެވެ. ފިނި މޫސުމުގައި ހަށިގަނޑު ހޫނު ކުރުމަށްވެސް މި ޑިވައިސް ބޭނުން ކުރެވެއެވެ.