ސައޫދީ އަރަބިއްޔާގެ ސިއްހީ ދާއިރާއިން ދުނިޔޭގެ ސަމާލުކަން ހޯދާފަދަ ބޮޑު ކުރިއެރުމެއް މިއަދު ވަނީ އިއުލާން ކޮށްފައެވެ.
ރިޔާޒްގައި ހުންނަ ކިންގް ފައިސަލް ސްޕެޝަލިސްޓް ހޮސްޕިޓަލް އެންޑް ރިސާޗް ސެންޓަރުން ވަނީ ދުނިޔޭގައި ފުރަތަމަ ފަހަރަށް، ފުރަމޭ ހަދިޔާކުރާ ދިިރިހުރި މީހުންގެ ފުރަމޭގެ ބައެއް ނެގުމަށް "ރޮބޮޓިކް ސިންގަލް-ޕޯޓް" ސާޖަރީ ކާމިޔާބުކަމާއެކު ފުރިހަމަ ކޮށްފައެވެ.
"ސިންގަލް-ޕޯޓް" ފުރަމޭގެ އޮޕަރޭޝަނަކީ އާދައިގެ އޮޕަރޭޝަންތަކާ ހިލާފަށް، ހަށިގަނޑުން އެންމެ ތަނެއް ކުޑަކޮށް ފަޅާލައިގެން ކުރާ އޮޕަރޭޝަނެކެވެ. އާންމުކޮށް ރޮބޮޓިކް ސާޖަރީތަކުގައި ހަށިގަނޑުގެ އެކި ތަންތަނުން ބޯލްތައް ލެއްވުމަށް ފަޅާލަން ޖެހުނު ނަމަވެސް، މި އައު އުކުޅުގައި ބޭނުންކޮށްފައިވަނީ އެންމެ 3.5 ސެންޓިމީޓަރުގެ ކުޑަ ލޯވަޅެކެވެ.
މި ހޮސްޕިޓަލުން ހާމަކުރި ގޮތުގައި، މިހާތަނަށް 6 މީހެއްގެ ހަށިގަނޑުން މި އުކުޅު ބޭނުންކޮށްގެން ފުރަމޭގެ ބައިތައް ވަނީ ކާމިޔާބުކަމާއެކު ނަގާފައެވެ. މީގެ މައިގަނޑު ފައިދާތަކަކީ:
ލޭ ބޭރުވުން މަދުވުން – އޮޕަރޭޝަންގެ ތެރޭގައި ހަށިގަނޑުން ބޭރުވާ ލޭގެ މިންވަރު ވަރަށް ބޮޑަށް ކުޑަވެގެންދެއެވެ.
ވޭން ކުޑަވުން -ބޮޑު ތަނެއް ފަޅާލަން ނުޖެހުމުގެ ސަބަބުން، އޮޕަރޭޝަނަށްފަހު ބަލިމީހާއަށް އިހުސާސްކުރަންޖެހޭ ތަދު ވަރަށް ބޮޑަށް ކުޑަވެއެވެ.
އަވަހަށް ފަސޭހަވުން – މި އޮޕަރޭޝަން ކުރި މީހުން އެންމެ 2 ނުވަތަ 3 ދުވަސް ތެރޭގައި ހޮސްޕިޓަލުން ދޫކޮށްލެވުނު ކަމަށް ހޮސްޕިޓަލުން ބުނެއެވެ.
ކުޑަކުދިންނަށް އުންމީދެއް – މި އުކުޅަކީ ކުޑަކުދިންނަށް ފުރަމޭ ބަދަލުކުރުމަށް ބޭނުންވާ ފުރަމޭގެ ބައިތައް ނެގުމަށް ވަރަށް އެކަށީގެންވާ ރައްކާތެރި ގޮތެއް ކަމަށް މެޑިކަލް މާހިރުން ފާހަގަކުރެއެވެ.
ކިންގް ފައިސަލް ސްޕެޝަލިސްޓް ހޮސްޕިޓަލަކީ މިހާރުވެސް ރޮބޮޓިކް ލިވަރ ސާޖަރީގައި ދުނިޔޭގެ އެއްވަނަ އެވެ. އެގޮތުން 1,600 އަށްވުރެ ގިނަ ރޮބޮޓިކް ފުރަމޭ އޮޕަރޭޝަން އެ ހޮސްޕިޓަލުން ވަނީ ކޮށްފައެވެ.
އޯގަން ޓްރާންސްޕްލާންޓް ސެންޓަރުގެ އެގްޒެކެޓިވް ޑިރެކްޓަރު ޑައީޓާ ބްރޮއެރިންގް ވިދާޅުވި ގޮތުގައި، މި ކާމިޔާބީއަކީ އެ ހޮސްޕިޓަލުން ރޮބޮޓިކް ސާޖަރީގެ ދާއިރާއިން ހޯދާފައިވާ ބޮޑު ތަޖުރިބާގެ ނަތީޖާއެވެ.
މި ކާމިޔާބީއާއެކު، ސައޫދީ އަރަބިއްޔާގެ "ހެލްތު ސެކްޓަރ ޓްރާންސްފޯމޭޝަން ޕްރޮގްރާމް" ގެ ދަށުން އެގައުމަކީ ދުނިޔޭގެ ސިއްހީ ދާއިރާގެ އެންމެ ކުރީ ސަފުގައި ގުނާލެވޭ ގައުމެއްކަން އަނެއްކާވެސް މިވަނީ ސާބިތުކޮށްދީފައެވެ. 2026 ވަނަ އަހަރުގެ ދުނިޔޭގެ އެންމެ މޮޅު ހޮސްޕިޓަލްތަކުގެ ލިސްޓުން KFSHRC އަށް ވަނީ 12 ވަނަ ލިބިފައެވެ.
