މިއީ ވަރަށް އުންމީދީ، އުފާވެރި ޚަބަރެކެވެ. ސައުދީ އަރަބިއްޔާއިން މައްކާއަށް ޚާއްޞަ އެއާޕޯޓެއް ބިނާކުރަން ނިންމައިފިއެވެ.

ސައުދީ އަރަބިއްޔާގެ "ވިޜަން 2030″ އިސްތިރާތީޖީގެ ދަށުން، މުސްލިމުންގެ އެންމެ މުގައްދަސް ސިޓީއެއް ކަމަށްވާ މައްކާއަށް ޒިޔާރަތްކުރާ މިލިއަނުން ބޭފުޅުންނަށް ލުއިފަސޭހަ ކޮށްދިނުމަށްޓަކައި، އެ ސިޓީގައި ބައިނަލްއަގުވާމީ ފެންވަރުގެ އެއާޕޯޓެއް ބިނާކުރުމުގެ މަސައްކަތް މިވަނީ ރަސްމީކޮށް ފަށާފައެވެ.

މައްކާގެ 'ރޯޔަލް ކޮމިޝަން' ގެ ސީ.އީ.އޯ ޞާލިޙް އަލް-ރާޝިދު ދާދިފަހުން ދެއްވި އިންޓަވިއުއެއްގައި ކަށަވަރު ކޮށްދެއްވި ގޮތުގައި، މި އެއާޕޯޓު ބިނާ ކުރުމަށް ބޭނުންވާ އިގްތިސާދީ އަދި ސްޓްރެޓީޖިކް ހުއްދަތައް މިހާރު ވަނީ ލިބިފައެވެ. މި މަޝްރޫޢަކީ ހަމައެކަނި އެއާޕޯޓެއް ނޫނެވެ؛ މީގެ ތެރޭގައި ހިމެނެނީ:
* މެޓްރޯ ނިޒާމު ފުޅާކުރުން
* އެއާޕޯޓާއި މައްކާގެ އެކި ހިސާބުތައް ގުޅުވައިދޭނެ ޒަމާނީ ރޭލު ނިޒާމެއް.
* މަގުތަކުގެ ތަރައްގީ: ޓްރެފިކް ތޮއްޖެހުން ކުޑަކުރުމަށްޓަކައި ބޮޑެތި ހައިވޭތަކެއް ހެދުން.
* ޕްރައިވެޓް ސެކްޓަރާއި ގުޅުން: އަމިއްލަ ކުންފުނިތަކުގެ އިންވެސްޓްމަންޓާއެކު ދެމެހެއްޓެނިވި ގޮތެއްގައި އެއާޕޯޓު ހިންގުން.

ގިނަ ބައެއްގެ ހިތުގައި ދެން އުފެދޭނެ ސުވާލަކީ މިހާރު ބޭނުންކުރާ ޖިއްދާގެ ކިންގް އަބްދުލްއަޒީޒް އިންޓަނޭޝަނަލް އެއާޕޯޓަށް ވާނީ ކިހިނެއްތޯއެވެ. ސައުދީ ސަރުކާރުން ހާމަކުރާ ގޮތުގައި މައްކާ އެއާޕޯޓަކީ ޖިއްދާ އެއާޕޯޓާ ވާދަކުރާނެ ތަނެއް ނޫނެވެ. އޭގެ ބަދަލުގައި، މިއީ އެ އެއާޕޯޓަށް ބާރުބޮޑުވާ ވަގުތުތަކުގައި އެހީތެރިވެދޭނެ، ދަތުރުފަތުރުގެ ނިޒާމު އިތުރަށް ފުރިހަމަ ކޮށްދޭނެ ތަނެކެވެ.

މި ބަދަލުގެ ސަބަބުން ލިބޭނެ ފައިދާ
1. ވަގުތު ސަލާމަތްވުން- ޖިއްދާއިން މައްކާއަށް ދަތުރުކުރުމަށް ހޭދަވާ ވަގުތު ވަރަށް ބޮޑަށް ކުޑަވެގެން ދާނެއެވެ.
2. އަޅުކަމަށް ފަސޭހަވުން- ޙައްޖާއި ޢުމްރާގެ އަޅުކަމަށް އަންނަ މީހުންގެ އަދަދު އަހަރަކު 30 މިލިއަނަށް އިތުރު ކުރުމަށް ހިފާފައިވާ އަމާޒަށް ވާޞިލްވުމަށް މަގުފަހި ވާނެއެވެ.
3. ޚިދުމަތުގެ ފެންވަރު- އެންމެ ޒަމާނީ ޓެކްނޮލޮޖީ ބޭނުންކޮށްގެން، އިމިގްރޭޝަނާއި ދަބަސް އުފުލުމުގެ ކަންކަން އަވަސްވެގެން ދާނެއެވެ.

މި މަޝްރޫޢަކީ ސައުދީ އަރަބިއްޔާގެ އިގްތިސާދު ތެލަށް ބަރޯސާވާ މިންވަރު ކުޑަކޮށް، ފަތުރުވެރިކަމާއި ދީނީ ޒިޔާރަތްތަކުން ލިބޭ އާމްދަނީ އިތުރު ކުރުމަށް ކުރިއަށްގެންދާ ބޮޑު ރޭވުމެއްގެ ބައެކެވެ. މި އެއާޕޯޓު ބިނާ ކުރުމަށް ހަމަޖެހިފައިވަނީ މައްކާއާ ވަރަށް ގާތުގައި އޮންނަ "އަލް-ފައިޞަލިއްޔާ" މަޝްރޫޢުގެ ތެރޭގައެވެ. މިއީ މައްކާ އާއި ޖިއްދާއާ ދެމެދުގައި އޮންނަ، މައްކާގެ ހުޅަނގު ފަރާތުން ތަރައްގީކުރާ ވަރަށް ބޮޑު "މެގަ-ސިޓީ" އެކެވެ. މި ސަރަޙައްދު އިޚްތިޔާރު ކުރި މައިގަނޑު ސަބަބުތަކަކީ:

ޙަރަމްފުޅާ ގާތްވުން- މައްކާގެ އެތެރޭގެ ތޮއްޖެހުމާ ދުރުގައި، އެކަމަކު ވަރަށް އަވަހަށް ޙަރަމްފުޅަށް ދެވޭނެ ހިސާބެއްގައި ހުރުން.
ދަތުރުފަތުރުގެ ގުޅުން- މި ސަރަޙައްދަކީ ހަރަމައިން ހައި-ސްޕީޑް ރޭލު މަގާ ވެސް ގުޅިފައިވާ ސަރަޙައްދަކަށްވުން.

މީގެ ސަބަބުން އެއާޕޯޓުން ފައިބައިގެން ސީދާ ރޭލުގައި މައްކާއަށް ނުވަތަ މަދީނާއަށް ދަތުރު ކުރުމުގެ ފުރުޞަތު ލިބޭނެއެވެ.
މި މަޝްރޫޢަކީ ސައުދީގެ "ވިޜަން 2030″ ގެ ވަރަށް މުހިންމު ބަޔަކަށް ވާތީ، އަމާޒަކީ 2030 ވަނަ އަހަރަށް މުޅި މަޝްރޫޢު ނިންމައި ބޭނުން ކުރަން ފެށުމެވެ. ނަމަވެސް، އެއާޕޯޓުގެ އުމްރާނީ މަސައްކަތްތައް ތަރުތީބު ކުރެވިފައިވާ ގޮތުން، ބައެއް ޚިދުމަތްތައް އޭގެ ކުރިންވެސް ފެށުމަކީ އެކަށީގެންވާ ކަމެކެވެ.

މިއީ ހަމައެކަނި އާންމު ދަތުރުވެރިންނަށް ޚާއްޞަ އެއާޕޯޓެއް ނޫނެވެ. މީގެ މައިގަނޑު ފޯކަސް އަކީ ޙައްޖާއި ޢުމްރާވެރިންނަށް އެންމެ މަތީ ފެންވަރުގެ ޚިދުމަތް ދިނުމެވެ. މި އެއާޕޯޓަކީ އެންމެ ޒަމާނީ "ސްމާޓް އެއާޕޯޓު" ޓެކްނޮލޮޖީ ބޭނުން ކޮށްގެން، ކަރުދާހާ ނުލައި އަދި ފަސޭހަކަމާއެކު އިމިގްރޭޝަން ކަންކަން ނިންމާލެވޭނެ ތަނަކަށް ވާނެއެވެ.

މި ބޮޑު ބަދަލާއެކު، ކުރިއަށް އޮތް ތަނުގައި ޖިއްދާގައި މަޑުނުކޮށް ސީދާ މައްކާގެ މި އައު އެއާޕޯޓަށް ދަތުރު ކޮށްލެވުމަކީ އަޅުގަނޑުމެން ދިވެހިންނަށްވެސް ލިބޭނެ ވަރަށް ބޮޑު ފަސޭހައެކެވެ. ޚާއްޞަކޮށް ޙައްޖު މޫސުމުގައި ޖިއްދާ އެއާޕޯޓުގައި ހޭދަކުރަންޖެހޭ ގިނަ ވަގުތުތަކަށް މީގެ ސަބަބުން ނިމުމެއް އަންނާނެއެވެ. މި އެއާޕޯޓު ނިމުމުން، ރާއްޖެއިން އުމްރާއަށާއި ހައްޖަށްދާ ދިވެހިންނަށްވެސް ވަރަށް ބޮޑު ލުޔެއް ލިބިގެން ދާނެއެވެ.