އިޒްރޭލުން ޣައްޒާގައި ހިންގަމުންދާ އަނިޔާވެރި އަމަލުތަކާ ގުޅިގެން އިޒްރޭލުގެ ރައްޔިތުން ރާއްޖެ އަޔަނުދިނުމަށްޓަކައި އެ ގައުމުގެ ޕާސްޕޯޓް މަނާ ކުރުމުގެ ގޮތުން "ދިވެހިރާއްޖޭގެ އިމިގްރޭޝަން ޤާނޫނު" އަށް އިސްލާހު ގެންނަން ހުށަހެޅި ބިލުގެ މަސައްކަތް އަވަސް ކުރުމަށްޓަކައި މާދަމާއިން ފެށިގެން ކަމާބެހޭ ފަރާތްތައް ރައްޔިތުންގެ މަޖިލީހުގެ ޚާރިޖީ ގުޅުންތަކާބެހޭ ކޮމިޓީއަށް ހާޒިރު ކުރަން އެ ކޮމިޓީން ނިންމައިފިއެވެ.

އެމްޑީޕީގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް މަޖިލީހަށް ހުށަހެޅުއްވި މި ބިލު މަޖިލީހަށް ބަލައިގަނެ އިތުރަށް ދިރާސާ ކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތް ތަކުގެ ކޮމިޓީ (241 ކޮމިޓީ) އަށް ފޮނުވީ، މިދިޔަ ޖުލައި މަހުގެ 10 ވަނަ ދުވަހުއެވެ.

ނަމަވެސް އެ ބިލުގެ ފަހުން ކޮމިޓީއަށް ހުށަހެޅި ބިލުތައް ނިމުނު އިރުވެސް އެ ބިލުގެ މަސައްކަތް ނުނިމި ލަސްވާތީ ބިލު ހުށަހެޅި މެންބަރު މަޖިލީހުގެ ރައީސަށް ސިޓީ ފޮވުމުގެ އިތުރުން ބިލުގެ މަސައްކަތް އަވަސް ކުރަން ގޮވާލައި، މަޖިލީހަށް ޤަރާހު ހުށަހަޅައި ކުރިއަށް ގެންދިޔަ މަސައްކަތް ތަކުގެ ސަބަބުން ބިލު ކޮމިޓީއަށް ފޮނުވިތާ 5 މަސް ދުވަސް ފަހުން މިމަހު 11 ގައި ކޮމިޓީގައި ފެށިއެވެ.

އެދުވަހު އޮތް ކޮމިޓީ ބައްދަލުވުމުގައި ފާސްކުރީ ބިލުގެ މަސައްކަތް އަންނަ އަހަރުގެ ފެބްރުއަރީ މަހުގެ ނިޔަލަށް ނިންމުމަށެވެ. ނަމަވެސް އެ މަސައްކަތް އަވަސް ކުރުމަށް ކަމަށް ވިދާޅުވެ 241 ކޮމިޓީގެ ބައްދަލުވުމެއް މިއަދު ވަނީ ބާއްވައިފައެވެ.

އެ ބައްދަލުވުމުގައި ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް މިއަދު ވިދާޅުވީ، ބިލް ދިރާސާ ކުރުމަށްޓަކައި، ކޮމިޓީއަށް ހާޒިރު ކުރަންޖެހޭ ފަރާތްތަކަށް، އަންނަ ޑިސެމްބަރު މަހުގެ ނިޔަލަށް ސިޓީ ފޮނުވައި، އެމީހުން ފޮނުވާ ޖަވާބެއްގެ މައްޗަށް ބެލުމަށްފަހު، ކޮމިޓީއަށް އެމީހުން ހާޒިރު ކޮށްގެން ކުރިއަށް ގެންދާ ގޮތަށް އޮތުމުން ބިލްގެ މަަސައްކަތް ލަސްވާ ކަމަށެވެ.

ނަމަވެސް ބިލް އަވަސް ކުރުމަށް ގޮތެއް ނިންމުން އޮތީ މީގެކުރިން ކޮމިޓީން ފާސްކޮށްފައި އޮތް ގޮތް ބަދަލުކޮށްގެން ކަމަށްވެސް ވިދާޅުވިއެވެ. އެގޮތުން ބިލްގެ މަސައްކަތް އަވަސް ކުރަން އޮތް ވިސްނުމަކީ، ބިލް ދިރާސާ ކުރުމަށްޓަކައި ކޮމިޓީއަށް ހާޒިރު ކުރަން ލިސްޓް ކޮށްފައިވާ ފަރާތްތައް މާދަމާއިން ފެށިގެން ހާޒިރު ކުރަމުން ގެންދިއުން ކަމަށްވެސް ވިދާޅުވިއެވެ.

މުގައްިރރުގެ އެ ހިޔާލާއެކު، މާދަމާއިން ފެށިގެން ކަމާބެހޭ ފަރާތްތައް ކޮމިޓީއަށް ހާޒިރު ކުރަން ހުށަހެޅުއްވީ، ހުޅުދޫ ދާއިރާގެ މެންބަރު މުހައްމަދު ޝާހިދުއެވެ. ތާއީދު ކުރެއްވީ ކެލާ ދާއިރާގެ މެބްބަރު އަބްދުﷲ ޝަރީފްއެވެ. އެ ހުށަހެޅުން ފާސްވުމާ ގުޅިގެން މާދަމާ ކޮމިޓީ ބައްދަލުވުން ކުރިއަށްގެންދަން މުގައްރިރު ނިންމެވިއެވެ.