ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ހުޅުމާލޭގެ ފުރަތަމަ ފިޔަވަހީގައި ހުންނަ އަމީން އެވެނިއުއިން ގަތް ދެ އެޕާޓްމެންޓް ފުލުހުންނާއި ހަވާލުކުރުން މި މަހުގެ 31 ވަނަ ދުވަހަށް ފަސްކޮށް ދިނުމަށް އެދިއްޖެ އެވެ.
ކޯޓުން ބައްސާމުގެ މައްޗަށް އަމުރުކުރީ މިމަހުގެ 6 ވަނަ ދުވަހުގެ ކުރިން އެ ޕެންޓަހައުސް ފުލުހުންނާ ހަވާލު ކުރުމަށެވެ.
އެ މުއްދަތު ހަމަވެފައިވަނިކޮށް ބައްސާމުގެ ވަކީލު ފުލުހަށް ފޮނުވި ސިޓީއެއްގައި ވަނީ އެޕާޓްމެންޓް ހަވާލު ކޮށްފިނަމަ، ދަރިންނާއެކު ވަންނާނެ ތަނެއް ނުހުންނާނެތީ އެޕާޓްމެންޓް ހަވާލު ކުރުން މިމަހުގެ 31 ގެ ނިޔަލަށް ފަސްކޮށް ދިނުމަށް އެދޭ ކަމަށެވެ.
ފުލުހުން މިއަދު ބުނީ އެ ސިޓީއަށް ޖަވާބު ދިނުމުގެ މަސައްކަތް ކުރަމުންދާ ކަމަށެވެ.
މީގެކުރިން މިދިޔަ މަހުގެ 18 ގައި ފުލުހުން އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި އިކޮނިމިކް ކްރައިމް ޑިޕާޓްމެންޓުގެ ސަބް އިންސްޕެކްޓާ އޮފް ޕޮލިސް އަހުމަދު ސަވާދު ވިދާޅުވެފައިވަނީ، ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރުގެ އެފްއޭއެމްގެ ރައީސް ބައްސާމް، އަމިން އެވެނިއުއިން ދެ އެޕާޓްމެންޓް ގަނެފައިވާކަން ފުލުންގެ ތަހުގީގައް ހާމަވެފައިވާ ކަމަށެވެ. އެހެންވެ އެ މައްސަލައާއި ގުޅިގެން ބައްސާމުގެ އިތުރުން އެހެން ބައެއް މީހުންގެ މައްޗަށް ދައުވާކޮށްދިނުމަށް އެދި ޕްރޮސިކިއުޓާ ޖެނެރަލް އޮފީހަށް ފޮނުވާފައިވާނެ ކަމަށެވެ.
ޕީޖީއަށް ފޮނުވާފައިވަނީ ބައްސާމުގެ ނަމުގައި އަމިން އެވެނިއު އޭ 1205 އަދި އޭ 1206 ދެ އެޕާޓްމެންޓަށް ފައިސާ ދެއްކުމުގައި އެފްއޭއެމްގެ ފައިސާ ބޭނުން ކޮށްފައިވާ މައްސަލައަކާއި އެފްއޭއެމް އިން އަމިން ކޮންސްޓްރަކްޝަން ޕްރިވެޓް ލިމިޓެޑަށް 14 އެޕްރިލް 2021 ވަނަ ދުވަހު އެއްމިލިއަން ޔޫއެސް ޑޮލަރަށްވާ ދިވެހި ރުފިޔާ ދައްކާވާފައިވާކަން ދެއްކުމަށްޓަކައި ލިޔެކިއުން ތައްޔާރުކޮށް، އަދި އެ ފައިސާ ލޯޑާކުރި ކަމަށް ތުހުމަތު ކުރެވޭ މައްސަލަ ކަމަށް ސަވާދު ވިދާޅުވެފައިވެ އެވެ.
"ތަހުގީގުން ބެލި ބެލުމުން ފާހަގަ ކުރެވެނީ މި ލޯނު އެފްއޭއެމުން ނަގާފައިވަނީ ކޮވިޑް19 ގެ ބަލިމަޑުކަމާ ގުޅިގެން ފުޓުބޯޅަ ކްލަބުތަކަށް މާލީ އެހީތެރިކަން ފޯރުކޮށްދިނުމުގެ ބޭނުމުގައިކަން. އަމީން ކޮންސްޓްރަކްޝަން ޕްރައިވެޓް ލިމިޓެޑާއި އެފްއޭއެމްއާ ދެމެދު މި ކުރެވުނު އެއް މިލިއަން ޔޫއެސް ޑޮލަރުގެ މުއާމަލާތަށްވާ ދިވެހި ރުފިޔާ އެފްއޭއެމަށް އަމީން ކޮންސްޓްރަކްޝަން ޕްރައިވެޓް ލިމިޓެޑަށް ދައްކާފައިވާކަން މިހާތަނަށް ފާހަގަކުރެވިފައިވޭ،" އޭނާ ވިދާޅުވެފައިވެ އެވެ.
"މިހާތަނަށް ބެލި ބެލުމުން، ދިވެހި ރުފިޔާ ދައްކާފައިވާކަން ދެއްކުމަށްޓަކާ ލިޔެކިޔުން ތައްޔާރުކޮށްފައިވާކަން ވެސް ވަނީ ފާހަގަ ކުރެވިފައި. މި ފައިސާ އެފްއޭއެމަށް ލިބިފައިވާކަން ދެއްކުމަށްޓަކާ ކުންފުންޏެއް މެދުވެރިކޮށް، ލޯނު ނަގާފައިވާކަން ވެސް އަޅުގަނޑުމެންނަށް ފާހަގަ ކުރެވޭ. އަދި މި ލޯނުގެ ފައިސާގެ އަދަދާއި އަމިން ކޮންޓްރަކްޝަން ޕްރައިވެޓް ލިމިޓެޑުން ފައިސާ ދައްކާފައިވާ ރިސިޕްޓުތަކުގައި ބަޔާންކޮށްފައިވާ ފައިސާގެ އަދަދާ ދިމާވާކަންވެސް އަޅުގަނޑުމެންނަށް ފާހަގަ ކުރެވޭ،" އޭނާ ވިދާޅުވިއެވެ.
އެ މައްސަލާގައި ބައްސާމްގެ އިތުރުން ހަސަން ވަހީދާއި މުހައްމަދު އަގީލުގެ އިތުރުން އަމިން ކޮންޓްރަކްޝަނަށް ދައުވާ ކުރަން ޕީޖީއަށް ފޮނުވާފައިވާ ކަމަށް ސަވާދު ވިދާޅުވެފައިވެ އެވެ.
އެ މީހުންގެ މައްޗަށް ތުހުމަތު ކުރަނީ ހިޔާނާތާއި އޮޅުވާލުމުގެ އިތުރުން މަނީ ލޯންޑަރިންގެ ތުހުމަތެވެ. މީގެ އިތުރުން އެފްއޭއެމުންގެ އެކައުންޓުން ބައްސާގެ އެކައުންޓަށް 10،000 ޔޫއެސް ޑޮލަރު ޖަމާކޮށް، އަމިއްލަ ބޭނުންކޮށް އޭނާ ހިޔާނާތްތެރިވެފައިވާ ކަމަށް ވެސް ސަވާދު ވިދާޅުވެފައިވެ އެވެ.
