ރާއްޖެއަށް މިހާރު ކުރަމުންދާ ވިއްސާރައާ ގުޅިގެން، ކުރިއަށް އޮތް 3 ދުވަހު ރާއްޖޭގެ ބޮޑުބަޔަކަށް މޫސުން ގޯސްވާނެ ކަމަށް މޫސުމާބެހޭ ގައުމީ އިދާރާއިން ބުނެފިއެވެ.

ހުޅަނގުމޫސުމުގެ ވިއްސާރައާ ގުޅިގެން ރާއްޖެ ސަރަޙައްދުގައި ވިއްސާރަވިލާ އުފެދުން ބޮޑުކަން ފާހަގަކުރައްވައި، މިމަހުގެ 11، 12 އަދި 13 ގައި ރާއްޖޭގެ ބޮޑުބަޔަކަށް ވިއްސާރަކުރާނެ ކަމަށާއި، ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ ކަމަށް އެ އިދާރާއިން ބުނެފައިވެއެވެ.

ދެކުނުގެ އަތޮޅުތަކަށް ގަޑިއަކު 5-15 މޭލުގެ ބާރުމިނުގައި، އަދި އެހެން ހިސާބުތަކަށް 15-22 މޭލުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި 40 މޭލަށް ވައިގަދަވުން އެކަށީގެންވާ ކަމަށްވެސް ބުނެފައިވެއެވެ. ދެކުނުގެ ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި ގަދަވާނެއިރު، އެހެން ހިސާބުތަކުގެ ކަނޑުތައް ގަދަވާނެ ކަމަށްވެސް މެޓް އޮފީހުން ބުނެފައިވެއެވެ.

މޫސުމަށް ސަމާލުވުމަށާއި، އެންމެ ފަހުގެ މައުލޫމާތު އަދާހަމަކުރުމަށް މޫސުމާބެހޭ ގައުމީ އިދާރާއިން ވަނީ އިލްތިމާސްކޮށްފައެވެ.