އައިޖީއެމްއެޗްއިން އައިނުގެ ހިދުމަތަށް ވަދެ، އަންނަ މަހު އައިނު ފިހާރައެއް ހުޅުވާނެ ކަމަށް އެ ހޮސްޕިޓަލުން ބުނެފި އެވެ.
ހަލީމް ވިދާޅުވީ، އައިޖީއެމްއެޗް އިން އައިނު ހަދަން ދުނިގަނޑު އަދި ލޯކޮޅު ގެންނަން ނިންމާފައިވަނީ ބޭރު ގައުމުން ކަމަށާއި އެހެންކަމުން އައިނު ހެދުމަށް ދާނެ ހަރަދު ބޮޑުތަނުން ކުޑަވާނެ ކަމަށެވެ.
އައިނު ހެއްދުމަށް އާސަންދައިން ކޮންމެ ދެ އަހަރަކުން އެއް ފަހަރު ދޭ 1000 ރުފިޔާގެ އަދަދު، މިދިޔަ ޖޫން މަހުން ފެށިގެން ވަނީ 2000 ރުފިޔާއަށް އިތުރުކޮށްފަ އެވެ. އަދި އައިޖީއެމްއެޗް އިން އައިނުގެ ހިދުމަތަށް ވަންނާނެ ކަމަށް ރައީސް ޑރ. މުހައްމަދު މުއިއްޒު ވަނީ މިދިޔަ މެއި މަހު ވިދާޅުވެފަ އެވެ.
ރާއްޖޭގައި އައިނު ހެދުމުގެ ވިޔަފާރީގައި މީގެ ކުރިން ހަރަކާތްތެރިވަމުން ދިޔައީ އާއްމު ފަރާތްތަކެވެ. ކޮންޓްރޯލް ކުރެވިފައިވާ އަގެއް ނެތުމުން ރާއްޖޭގައި އައިނު ހައްދައިދެމުން ދަނީ ވަރަށް ބޮޑު އަގަކަށެވެ. އަވައްޓެރި ބައެއް ގައުމުތަކުން އައިނެއް 300 ރުފިޔާއަށް ހެދޭއިރު، ރާއްޖޭގައި ހަމަ އެކޮލިޓީގެ އައިނެއް ހެދެނީ 4000 ރުފިޔާއަށެވެ.
ހަލީމް އިތުރަށް ވިދާޅުވީ، އެ ހޮސްޕިޓަލް ތެރޭގައި ހުޅުވާ އައިނު ފިހާރައިން ލޮލުގެ ނަމްބަރު ނެގުމުގެ ހިދުމަތް ދޭނެ ކަމަށެވެ. އަދި އެހެން ހޮސްޕިޓަލަކުން ގެންނަ ޕްރިސްކްރިބްޝަނަށް ވެސް އައިނު ހަދައިދޭނެއެވެ.