ރައްޔިތުންގެ މަޖިލީހުގެ އައްޑޫ ހިތަދޫ މެދު ދާއިރާގެ މެންބަރު އަހުމަދު ރަޝީދު (އަރާއިރު، ޗެކްމާކް ރަޝީދު) އަލުން އިންތިޚާބުގައި ވާދަކުރައްވަން ބޭނުން ވެގެން ހުށަހެޅި މައްސަލަ ބަލައިނުގަތުމަށް ހައި ކޯޓުގެ ރަޖިސްޓްރާ މަރިޔަމް ހޫރުޝީދާ ނިންމެވި ނިންމެވުމަށް ބަދަލު ގެންނަންޖެހޭ ތަނެއް ނެތްކަމަށް ހައި ކޯޓުގެ ފަނޑިޔާރުންގެ މަޖިލީހުން ނިންމައިފިއެވެ.

ދަ ޑިމޮކްރެޓްސްގެ ޓިކެޓުގައި ރައްޔިތުންގެ މަޖިލީހުގެ އިންތިޚާބުގައި ވާދަކުރަން އަހުމަދު ރަޝީދު އިލެކްޝަންސް ކޮމިޝަނަށް ފޯމު ހުށަހެޅުމުން، އީސީން އޭނާގެ ކެންޑިޑެސީ ބަލައިގަތެވެ. ނަމަވެސް ކެންޑިޑެސީ ދޫކޮށްލަން ބޭނުން ފަރާތްތަަކަށް އެކަން ކުރުމަށް އޮންނަ ފުރުސަތުގައި އަހުމަދު ރަޝީދު އޭނާގެ ނަން ނެގިއެވެ. ސަބަބެއް ކަމަށް ވިދާޅުވީ، ރޯދަ މަހުގައި ބާއްވާ އިންތިޚާބެއްގައި ވާދަކުރައްވަން ބޭނުން ނުވާ ކަމަށެއެވެ. އޭރު އިންތިޚާބު ބާއްވަން އިލެކްޝަން ކޮމިޝަނުން ނިންމާފައި އޮތީ މާޗް 17 ގައެވެ. އެއީ ރޯދަމަހުގެ ހަތްވަނަ ދުވަހެވެ.

ނަމަވެސް މަޖިލީހުން ޤާނޫނު ބަދަލުކޮށް ރޯދަމަހު އިންތިބު ނުބޭއްވޭގޮތް ހަދައި ރޯދަ މަސް ނިމި 10 ދުވަހުގެ ފަހުން އިންތިޚާބު ބާއްވާގޮތަ ޤާނޫނުގައި ކަނޑައެޅިއެވެ. މިހާރު އިންތިޚާބު ބާއްވަން ކަނޑައަޅާފައިވާ މިމަހުގެ 21 ވަނަ ދުވަހު އިންތިޚާބު ބާއްވަން ހަމަޖެއްސީ އެކަމާ ގުޅިގެންނެެވެ.

މި ބަދަލާއި ގުޅިގެން، އިންތިޚާބު ބާއްވާ ތާރީޚަށް ބަދަލު އައިސްފައި ވާތީ، އޭނާ އިންތިޚާބުގައި ވާދަ ނުކުރަން ނިންމަން ޖެހުނު ސަބަބު ނެތިގޮސްފައިވާ ކަމަށް ވިދާޅުވެ، އޭނާއަކީ ހިތަދޫ މެދު ދާއިރާއަށް ވާދަކުރާ ކެންޑިޑޭޓެއްގެ ގޮތުގައި ކަނޑައަޅައި އޭނާގެ ނަން އަލުން ހިމަނައިދިނުމަށް އިލެކްޝަންސް ކޮމިޝަނުގައި އެދުނެވެ. ނަމަވެސް ނަން އަނބުރާ ގެންދިއުމަށް އޮންނަ މުއްދަތުގައި ނަން އަނބުރާ ގެންގޮސްފައިވާ ފަރާތެއް އަލުން އިންތިޚާބުގައި ވާދަ ކުރުމުގެ ފުރުސަތު ދިނުމަކީ ޤާނޫނީ ގޮތުން ކުރެވޭނެ ކަމެއްނޫން ކަމަށްބުނެ އިލެކްޝަންސް ކޮމިޝަނުން އަހްމަދު ރަޝީދަށް ޖަވާބުދިނެވެ.

އެކަމާ ގުޅިގެން އިލެކްޝަން ކޮމިޝަންގެ މައްޗަށް އަހުމަދު ރަޝީދު ހައިކޯޓަށް މައްސަލަ ހުށަހެޅިއެވެ. އޭނާ ހުށަހެޅި މައްސަލައިގައި ބުނެފައި ވަނީ އިންތިޚާބު ބާއްވާ ތާރީޚަށް ބަދަލު ގެނައުމުން އިންތިޚާބުގައި ވާދަކުރުމަށް އިތުރު ފުރުސަތެއް ދޭން ޖެހޭނެ ކަމަށެވެ.

ނަމަވެސް މިދިޔަ މަހުގެ 25 ގައި އެ މައްސަލައާމެދު ހައި ކޯޓުގެ ރަޖިސްޓްރާ ނިންމެވި ނިންމެވުމުގައި ވިދާޅުވެފައި ވަނީ، އަހުމަދު ރަޝީދު ހުށަހެޅުއްވި މައްސަލައަކީ އިންތިޚާބު ތަކުގެ ޤާނޫނުގައި އޮންނަ ގޮތުން ހައި ކޯޓަށް ބެލުމުގެ އިހުތިސޯސް އޮޮންނަ މައްސަލައެއް ނޫން ކަމަށެވެ. އެހެންވެ އެ މައްސަލައަކީ ހައި ކޯޓަށް ހުށަހެޅިދާނެ މައްސަލައެއް ނޫން ކަމަށް، ރަޖިސްޓްރާގެ ނިންމުމުގައިވެއެވެ.

ރަޖިސްޓްރާގެ އެ ނިންމުމާ ގުޅިގެން އަހުމަދު ރަޝީދުގެ ފަރާތުން ހައިކޯޓުގެ ފަނޑިޔާރުންގެ މަޖިލީހަށް އެ މައްސަލަ ހުށަހެޅިއެވެ. އޭނާ ބުނެފައި ވަނީ ރަޖިސްޓްރާގެ ނިންމުން ރަނގަޅު ނޫން ކަމަށެވެ. އެހެން ކަމުން ރަޖިސްޓްރާގެ ނިންމުމަށް ބަދަލު ގެނައުމަށް ފަނޑިޔާރުންގެ މަޖިލީހުގައި އޭނާ ވަނީ އެދިފައެވެ.

ހައިކޯޓުގެ ތިންފަނޑިޔާރުންގެ ބެންޗުގެ އަޣްލަބިއްޔަތުން ނިންމި ނިންމުގައި ވަނީ އަހުމަދު ރަޝީދުގެ މައްސަލައާމެދު ރަޖިސްޓްރާ ނިންމި ނިންމުމަށް ބަދަލު ގެންނަން ޖެހޭނެ ތަނެއް ނެތް ކަމަށެވެ.

ހިތަދޫ މެދު ދާއިރާއަށް މިހާރު ވާދަކުރާ ކެންޑިޑޭޓުންނަކީ އިދިކޮޅު އެމްޑީޕީގެ ކެންޑިޑޭޓު އަދި އައްޑޫ ސިޓީގެ ޑެޕިއުޓީ މޭޔަރު އަހުމަދު ޝުއާއު އާއި، ވެރިކަންކުރާ ޕީއެންސީގެ ކެންޑިޑޭޓު އަދި ދިޔަރެސް ނޫހުގެ ކުރީގެ ނޫސްވެރިޔާ އަހުމަދު އަޒާންއެވެ.