ގާނޫނުއަސާސީއަށާއި ބައެއް ގާނޫނުތަކަށް ސަަރުކާރުން ބަދަލުތަކެއް ގެނައުމަށްޓަކައި، ޗުއްޓީގައި މިހާރު އޮތް ރައްޔިތުންގެ މަޖިލީހުގެ ޖަލްސާއެއް މާދަމާ ބާއްވަން ތާވަލް ކޮށްފިއެވެ.

އެހެންކަމުން މާދަމާގެ ޖަލްސާއަކީ ދައުރުން ބޭރުން ބާއްވާ ޖަލްސާއެކެވެ.

މާދަމާގެ ޖަލްސާއަށް ފަސް ކަމެއް ވަނީ އެޖެންޑާ ކޮށްފައެވެ. އޭގެތެރެއިން ފުރަތަމަ ކަމަކަށް ހިމެނެނީ، ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ރައީސް އައްޔަން ކުރެއްވުމަށްޓަކައި ރައީސުލްޖުމްހޫރިއްޔާ ފޮނުއްވާ ފައިވާ މައްސަލ،ަ ދިރާސާ ކޮށް ގޮތެއް ނިންމުމަށް އެ މައްސަލައާގުޅޭ ދާއިމީ ކޮމިޓީއަށް ފޮނުވުމެވެ.

އެއަށް ފަހު ސަރުކާރުގެ ފަރާތުނ،ް ހިތަދޫ މެދު ދާއިރާގެ މެންބަރު އަހްމަދު އަޒާން ގާނޫނުލް އުގޫބާތައް އިސްލާހު ގެނައުމުގެ ބިލާއި، މިލަންދޫ ދާއިރާގެ މެންބަރު ހަސަން މުފީދު އަބްދުލްގާދިރު، ފެންޝަނާބެހޭ ގާނޫނަށް އިސްލާހު ހުށަހަޅާ ބިލުގެ ފުރަތަމަ ކިއުން އިއްވުމަށް ވަނީ އެޖެންޑާ ކޮށްފައެވެ.

ގާނޫނުއަސާސީއަށް އިސްލާހު ގެނައުމަށް ހުށަހަޅާ ބިލަކީ، ސަރުކާރުގެ ފަރާތުން އިނގުރައިދޫ ދާއިރާގެ މެންބަރު އިބްރާހީމް ފަލާހް ހުށަހަޅާ ބިލެކެވެ. މި ބިލްގެ ފުރަތަމަ ކިއުން އިއްވުންވެސް ހިމެނެއެވެ.

މި ބިލްތަކުގެ އިބްތިދާއީ ބަހުސްވެސް މާދަމާ ކުރިއަށް ގެންދިއުމަށް ވަނީ ތާވަލް ކޮށްފައެވެ.

މުޅި އަހަރު 15 ބިލެއް ނިންމުމަށްފަހު ރައްޔިތުންގެ މަޖިލިސް އަހަރީ ޗުއްޓީއަށް ދިޔައީ މިދިޔަ ޑިސެމްބަރު މަހުގެ ތިން ވަނަ ދުވަހުއެވެ.