- މިއަދު މި ފެންނަ އެއާރޕޯޓު މަޝްރޫއުގައިވެސް އެމްޔޫ މަނިކުގެ ޙިއްސާ ބޮޑު
- ޤައުމަށް ބޭނުންވާ އެކިއެކި ދާއިރާތަކުން މީހުން ބިނާ ކުރުމަށް ވަރަށް ބޮޑު އިސްކަމެއް ދެއްވި، އެކަމަށް ދީލަތިކަމާއެކު ހޭދަކުރެއްވި
- ފަތުރުވެރިކަމުގެ ސިނާއަތަކީ ބައިނަލް އަޤުވާމީ ހޮޓެލް ޗޭނު ތަކުގެ ދައުރު އޮތް ސިނާއަތަކާއި ހަމައަށް ގެނައުމުގެ ކޮންމެ ހަރުފަތެއްގައިވެސް އެމްޔޫ މަނިކުގެ ހިއްސާ ބޮޑު
ދިވެހިރާއްޖޭގެ ފަތުރުވެރި ކަމުގެ އެއް ބާނީ ކަމަށްވާ ނިޝާން މުލީގޭ ޝަރަފުގެ އިއްޒަތުގެ ވެރިޔާ ކޮލިގޭ މުހައްމަދު އުމަރު މަނިކު (އެމްޔޫ މަނިކު) އަކީ ދިވެހިރާއްޖެއަށް ޒަމާނީ ޑިމޮކްރެޓިކް ނިޒާމެއް ތައާރަފް ވެގެންދިޔަ އިސްލާހީ މަސައްކަތުގައިވެސް މަތިވެރި ޚާދިމެއް ކަމުގައި އެމްޑީީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމްޔޫ މަނިކު އަވަހާރަވުމާއި ގުޅިގެން އެކްސްގައި ކުރެއްވި ތައުޒިޔާގެ މެސެޖެއްގައި ޝާހިދު ވިދާޅުވީ، އެމްޔޫ މަނިކު އަވަހާރަވި ޚަބަރަކީ ފުން ހިތާމައެއް ކުރިމަތިވެވަޑައިގެންނެވި ޚަބަރެއް ކަމަށެވެ.
އެމްޔޫ މަނިކުގެ ޚިދުމަތަށް އިޝާރާތް ކުރައްވައި ޝާހިދު ވިދާޅުވީ، ރާއްޖެއަށް ފަތުރުވެރިކަން ތަޢާރަފް ކުރެއްވުމަށްފަހު، އެ ސިނާއަތު ބައިނަލް އަޤުވާމީ ހޮޓެލް ޗޭނު ތަކުގެ ދައުރު އޮތް ސިނާއަތަކާއި ހަމައަށް ގެނައުމުގެ ކޮންމެ ހަރުފަތެއްގައިވެސް އެމްޔޫ މަނިކުގެ ހިއްސާ ވަރަށްބޮޑު ކަމަށެވެ.
އެގޮތުން، ކުރުނބާ ރިސޯޓުގައި މަސައްކަތް ކުރެއްވުމަށްފަހު، ފަހުން އެރިސޯޓު ހިންގެވުމުގެ އިތުރުން، ރާއްޖެއަށް ފަތުރުވެރިންނާއި އެއަރލައިންތައް ގެނައުމަށް ބޭރުގެ ގައުމުތަކަށް ސީދާ އަމިއްލަފުޅަށް އެމްޔޫ މަނިކު ރާއްޖެއިން ބޭރަށް ދަތުރުތައް ކުރެއްވިކަން ޝާހިދު ފާހަގަ ކުރެއްވިއެވެ.
އަދި ފަތުރުވެރިކަމުގައި ދިވެހިރާއްޖެ އިޝްތިހާރު ކުރުމުގައިވެސް އެމްޔޫ މަނިކު ބުރަކޮށް އުޅުއްވިކަން ފާހަގަ ކުރައްވައި ޝާހިދު ވިދާޅުވީ، ރާއްޖޭގެ ފަތުރުވެރިކަމަކީ ދުނިޔޭގެ އެންމެ މަތީ ފަންތީގެ ފަތުރުވެރިކަމުގެ މަންޒިލް ތަކުގެ ތެރޭގައި ހިމެނޭ މަންޒިލެއްކަން ކަށަވަރު ކުރުމަށް އެތައް ހަރުފަތެއްގައި ކިތަންމެކަމެއް ތަޢާރަފް ކުރެއްވި ކަމަށެވެ.
ޝާހިދު ވިދާޅުވީ، މިއަދު ފެނިގެންމިދާ ވެލާނާ އިންޓަރނޭޝަނަލް އެއަރޕޯޓުގެ ތަރައްޤީއަކީވެސް އެމްޔޫ މަނިކު އެއަރޕޯޓްސް ކޮމްޕެނީގެ ޗެއަރމަން ކަމުގައި ހުންނަވައިގެން، އެމަނިކުފާނުގެ ބޮޑު ހިއްސާއަކާއެކުގައި ގެނެވުނު ތަރައްޤީއެއް ކަމަށެވެ.
ފަތުރުވެރިކަމުގެ ދާއިރާގެ އިތުރުން އިޖްތިމާއީ އެތައް ކަމެއްގައިވެސް އެމްޔޫ މަނިކަކީ ފާހަގަކޮށްލެވޭ ބޭފުޅެއް ކަމަށާއި، ޤައުމަށް ބޭނުންވާ އެކިއެކި ދާއިރާތަކުން މީހުން ބިނާ ކުރުމަށް ވަރަށް ބޮޑު އިސްކަމެއް ދެއްވައި، އެކަމަށް ދީލަތިކަމާއެކު އެމްޔޫ މަނިކު ހޭދަކުރެއްވި ކަމަށް ވިދާޅުވިއެވެ.
"މިރާއްޖެއަށް ޒަމާނީ ޑިމޮކްރެޓިކް ނިޒާމެއް ތަޢާރަފްވި އިސްލާޙީ މަސައްކަތުގައި ވެސް، އެމަނިކުފާނަކީ މަތިވެރި ޚާދިމެކެވެ. " ޝާހިދު ވިދާޅުވިއެވެ.
ޝާހިދުގެ މެސެޖުގައި ވިދާޅުވީ، އެމްޔޫ މަނިކު ވަކިވެގެން ދިޔުމަކީ ޤައުމަށް ލިބުނު ފޫނުބެއްދޭނެ ގެއްލުމެއް ކަމަށެވެ.
އެމްޔޫ މަނިކު މިއަދުގެ ވަގުތެއްގައި އަވަހާރަވީ އާލާސްކަންފުޅު ބޮޑުވެ، ސިންގަޕޫރުގެ ހޮސްޕިޓަލެއްގައި ފަރުވާ ދެމުން ދަނިކޮށެވެ.