ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ދަތުރުކުރާނެ ބަސްތަކާއި، ސްކޫލް ކުދިންނަށް ޚާއްސަ "ސްކޫލް ފްރެންޑްލީ" ބަސްތަކެއް ތަޢާރަފްކުރުމަށް މަސައްކަތް ކުރަމުންދާ ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، މާލެއަށް ދިމާވެފައިވާ ޓްރެފިކްގެ މައްސަލައަށް ހައްލެއް ހޯދުމަށް ސަރުކާރުން ކުރިއަށްގެންދިއުމަށް ހަމަޖެހިފައިވާ މަސައްކަތްތައް ހިއްސާކުރައްވަމުންނެވެ.
ރައީސުލްޖުމްހޫރިއްޔާގެ އޮފީހާއި ޕީއެސްއެމްއާ ގުޅިގެން ކުރިއަށްގެންދާ އަހާ ފޯރަމުގައި ވާހަކަފުޅު ދައްކަވަމުންް ދަތުރުފަތުރާބެހޭ ވަޒީރު މުޙައްމަދު ސަޢީދު ވިދާޅުވީ، މާލޭގެ މަގުތަކުގެ %82 މިހާރު އޮތީ ވެހިކަލްތަކުން ތޮއްޖެހި ފުރިފައި ކަމަށެވެ. އެގޮތުން މިހާތަނަށް މާލެ ސަރަހައްދުގައި ރަޖިސްޓްރީ ކޮށްފައިވާ ވެހިކަލްތަކުގެ ޖުމްލަ އަދަދު 130،806 އަށް އަރާއިރު، އޭގެ ތެރޭގައި 14،911 ކާރާއި 115،895 ސައިކަލު ހިމެނޭކަން ވަޒީރު ފާހަގަކުރެއްވިއެވެ.
ވާޒީރު ވިދާޅުވީ، މާލެއަކީ ޖާގަ އިތުރަށް ބޮޑުކުރެވެން ނެތް ތަނަކަށް ވުމާއެކު، ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލްޑް ޒޯނަކަށް ހަދައި، ވެހިކަލް މަދުކުރުމާއެކު މާސް ޓްރާންސްޕޯޓަށް ބަރޯސާވާ މިންވަރު އިތުރުކުރުން ކަމަށެވެ. އަދި މި މަސައްކަތްތައް ހަރުދަނާކޮށް ކުރިއަށް ގެންދިއުމުގެ ގޮތުން، ޓްރެފިކް މައްސަލަތައް ހައްލުކުރުމަށް ޚާއްސަ މިނިވަން އޮފީހެއް ޤާއިމްކޮށް މިހާރު އަމަލީ މަސައްކަތް ފަށާފައިވާ ކަމަށް ވަޒީރު ވިދާޅުވިއެވެ.
ދަތުރުފަތުރާބެހޭ ވަޒީރު ސަޢީދު ވިދާޅުވީ، ތޮށްޖެހުމުގެ މައްސަލައަށް ހައްލެއް ހޯދުމަށްޓަކައި ކުރިއަށްއޮތްތާނގައި ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން މާލޭގެ އެކި ދަތުރުކުރާނެ ބަސްތަކެއް ތަޢާރަފްކުރުމުގެ މަސައްކަތްތައް ކުރަމުންދާ ކަމަށެވެ.
"ފޭސް 2 އަދި ފޭސް 1އިން އެކި ބޭނުންތަކަށް މާލެއަށް ވަޑައިގަންނަވާ ބޭފުޅުންނާއި، އަދި މާލެއިން އެކި ބޭނުންތަކަށް ރަޝް އަވާސްތަކުގައި ހުޅުމާލެއަށް ވަޑައިގަންނަވާ ބޭފުޅުންނަށް މި ޕްލޭންގެ ތެރޭގައި ހިމެނޭނެ ފޭސް 2އިން ވެލަނާގެ ސަރަހައްދަށް އަދި ގްރީން ޒޯންތަކަށް ވަކި ގަޑިތަކެއްގައި ދަތުރުކުރާ ބަސްތަކެއް ތައާރަފްކުރުން. އަދި އަޅުގަނޑުމެން މި ގަސްތުކުރަނީ ސްކޫލްތަކަށް ދަތުރުކުރާ ސްކޫލް ފްރެންޑްލީ ބަސްތަކެއް ތަޢާރަފްކުރުމަށްވެސް" ވަޒީރު ސަޢީދު ވިދާޅުވިއެވެ.
މާލޭގެ ބޭރު މަގު ބޭނުންކުރާ ފަރާތްތަކަށް ފަސޭހަކޮށްދިނުމުގެ ގޮތުން، މާލޭގެ ވަށައިގެންވާ ރިންގް ރޯޑުގެ މަސައްކަތްތައް މިހާރު ނިމުމަކާ ގާތްވެފައިވާ ކަމަށް ވަޒީރު ފާހަގަކުރެއްވިއެވެ. މީގެ އިތުރުން މަގުތަކުގައި ޓްރެފިކް ލައިޓްތައް ހަރުކުރުމާއި، މަގުމަތީގައި ފުލުހުންގެ ވިޒިބިލިޓީ އިތުރުކުރުމާއި، ވަކި ސީސީތަކަކުން ނަގާ ފީތަކާ ގުޅޭގޮތުންނާއި މާސް ޓްރާންސްޕޯޓް މޮބިލިޓީ ޕްލޭންގެ ދަށުން ގިނަ ފިޔަވަޅުތަކެއް އެޅުމަށް ރޭވިފައިވާ ކަމަށްވެސް ވަަޒީރު ވިދާޅުވިއެވެ.
ވަޒީރު ވިދާޅުވީ، މި ހުރިހާ މަސައްކަތްތަކަކީވެސް ރައްޔިތުން އެންމެ ރުހޭނެ ފަދަ ގޮތަކަށް، ރޭވުންތެރިކަމާއެކު ސަރުކާރުން ކުރިއަށް ގެންދާ ކަންކަން ކަމަށެވެ. އަދި މިހާރު މި ކުރެވިގެންދާ މަސައްކަތްތަކާއެެކު ކުރިއަށްއޮތް ތިން އަހަރުގެ ތެރޭގައި މާލޭގެ ޓްރެފިކް މައްސަލައަށް އެދެވޭ ހައްލެއް ލިބިގެންދާނެ ކަމަށް އުންމީދުކުރައްވާ ކަމަށްވެސް އިގުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވިއެވެ.
