މެދުއަރަބިކަރައިގެ ހޮރުމުޒު ކަނޑުއޮޅި (ސްޓްރެއިޓް އޮފް ހޮރުމުޒު) މެދުވެރިކޮށް ތެޔޮ އުފުލުމަށް ބޮޑެތި ހުރަސްތަކެއް ކުރިމަތިވެފައިވީ ނަމަވެސް، އީރާން ފިޔަވައި ގަލްފު ސަރަހައްދުގެ އެހެން ގައުމުތަކުން ކްރޫޑް އޮއިލް އެކްސްޕޯޓުކުރާ މިންވަރު ހަނގުރާމައިގެ ކުރިން ހުރި މިންވަރަށް އަލުން އިއާދަވެއްޖެއެވެ.
މެރިޓައިމް އިންޓެލިޖެންސް އަދި ރިސާޗް ފާމެއް ކަމަށްވާ "ކްޕްލާ" އިން ނެރުނު ތަފާސްހިސާބުތަކަށް ބަލާއިރު، ސެޕްޓެމްބަރު 1 އިން 28 އާއި ދެމެދު އެ ސަރަހައްދުން ދުވާލަކު މަދުވެގެން 16.5 މިލިއަން ބަރެލްގެ ކްރޫޑް އޮއިލް ވަނީ އެކްސްޕޯޓުކޮށްފައެވެ. މިއީ ހަނގުރާމަ ފެށުމުގެ ކުރިން އެކްސްޕޯޓު ކުރަމުންދިޔަ އެވްރޭޖް މިންވަރާ އެއްވަރުގެ އަދަދެކެވެ. މެދުއަރަބިކަރައިގެ ހަނގުރާމަ އެންމެ ވަރުގަދަވި މާޗު މަހުގެ ތެރޭގައި މި އަދަދު އުޅުނީ ދުވާލަކު 10.5 މިލިއަން ބަރެލްގައެވެ.
ކްޕްލާގެ ގްލޯބަލް ކްރޫޑް އެންޑް ޖިއޯޕޮލިޓިކަލް މާކެޓް ޑޭޓާގެ ހެޑް އެމަނުއެލް ބެލޯސްޓްރީނޯ ވިދާޅުވި ގޮތުގައި، ގައުމުތަކުން ވަނީ ހޮރުމުޒު ކަނޑުއޮޅިއަށް ބަރޯސާވާ މިންވަރު ކުޑަކުރުމަށްޓަކައި އެހެނިހެން މަގުތައް ބޭނުންކުރަން ފަށާފައެވެ.
ހަނގުރާމައިގެ ކުރިން ގަލްފުގެ 83 އިންސައްތަ ތެޔޮ އުފުލީ ހޮރުމުޒު ކަނޑުއޮޅި ހުރަސްކޮށެވެ. ނަމަވެސް ސެޕްޓެމްބަރު މަހު އެކްސްޕޯޓުކުރި ތެލުގެ 40 އިންސައްތަ ވަނީ އެ ކަނޑުއޮޅި ހުރަސްނުކޮށް، ސައުދީ އަރަބިއްޔާ އާއި އެކުވެރި އަރަބި އިމާރާތް (ޔޫއޭއީ) ގެ ހޮޅިލައިންތައް މެދުވެރިކޮށް ބޭރުކޮށްފައެވެ.
ސައުދީން ވަނީ އެގައުމުގެ "އީސްޓް-ވެސްޓް ޕައިޕްލައިން" މެދުވެރިކޮށް ޔަންބޫ ބަނދަރަށް ފޮނުވާ ތެލުގެ މިންވަރު ދުވާލަކު 0.8 މިލިއަން ބަރެލްއިން 4.3 މިލިއަން ބަރެލްއަށް އިތުރުކޮށްފައެވެ. އަދި ޔޫއޭއީން ވަނީ އަބޫދާބީ ކްރޫޑް އޮއިލް ޕައިޕްލައިން މެދުވެރިކޮށް ފުޖައިރާއަށް ފޮނުވާ ތެޔޮ ދުވާލަކު 1.1 މިލިއަން ބަރެލްއިން 2.7 މިލިއަން ބަރެލްއަށް އިތުރުކޮށްފައެވެ. ހޮރުމުޒު ކަނޑުއޮޅި ހުރަސްކުރި ބާކީ 60 އިންސައްތަ ތެޔޮ އުފުލުމަށް ގިނައިން ބޭނުންކޮށްފައިވަނީ "ޝަޓްލް ޓޭންކަރު" ތަކެވެ. އަދި އޮގަސްޓު މަހު މި ކަނޑުއޮޅި ހުރަސްކުރި ތެލުގެ 70 އިންސައްތައަށްވުރެ ގިނަ ތެޔޮ ވަނީ އޯމާން ކަނޑުގެ ބޭރުގައި އެހެން ޓޭންކަރުތަކަށް ބަދަލުކޮށްފައެވެ.
އިންޓަނޭޝަނަލް އެނާޖީ އޭޖެންސީ (އައިއީއޭ) އިން ބުނެފައިވާ ގޮތުގައި، ތެލުގެ ބާޒާރު ހަމައަކަށް އަޅުވައި، ދަތިތަކަށް ހައްލު ހޯދައިދިނުމުގެ ގޮތުން އެ އޭޖެންސީގެ މެންބަރު ގައުމުތަކުގެ އެސްޓްރެޓެޖިކް ރިޒާވްތަކުން 325 މިލިއަން ބަރެލްގެ ތެޔޮ ވަނީ ދޫކޮށްފައެވެ. މިއީ މާޗު މަހު ދޫކުރުމަށް އެއްބަސްވި 400 މިލިއަން ބަރެލްގެ ބޮޑު ބައެކެވެ.
