މިދިޔަ ބުދަ ދުވަހު ދުބާއީން އިޒްރޭލަށް ދަތުރުކުރި ފްލައިދުބާއީގެ ބޯޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި، ޔޫއޭއީގައި ދެ ދިވެއްސަކު ހައްޔަރުކޮށްފި އެވެ.

މި ދެމީހުން ހައްޔަރުކޮށްފައިވަނީ ހާދިސާގައި ބައިވެރިވިކަމަށް ތުހުމަތުކުރެވޭ އުމާންގެ ކޯ-ޕައިލެޓާ ގުޅުން އޮންނަ ކަމަށް ބެލެވޭތީ އެވެ.

ލިބިފައިވާ މައުލޫމާތުތަކަށް ބަލާއިރު، ހައްޔަރުކުރެވުނު ދިވެހިންނަކީ ބޯޓުގެ ޕައިލެޓަށް "ކްރޭޝް ހެމާ" އިން ހަމަލާދިން ކޯ-ޕައިލެޓް ހައްމާމް އަލް ހަމާނީއާ އެއް އިމާރާތެއްގައި ދިރިއުޅުނު ދެ މީހުންނެވެ. އެ ދެ ދިވެހިން ވެސް މަސައްކަތްކުރަނީ ކޯ-ޕައިލެޓުންގެ ގޮތުގަ އެވެ. ނަމަވެސް، މި ހާދިސާއާ ދިވެހިންނާ ގުޅެނީ ކިހިނެއް ކަމެއް އަދި ރަސްމީކޮށް ސާފުކުރެވިފައެއް ނުވެ އެވެ. މިކަމާ ގުޅޭ އިތުރު މައުލޫމާތެއް މިހާތަނަށް އެއްވެސް ފަރާތަކުން ހާމަކޮށްފައެއް ނުވެ އެވެ.

މި ހާދިސާ ހިނގާފައިވަނީ އިޒްރޭލުގެ ގިނަ ބަޔަކު ހިމެނޭހެން 182 ދަތުރުވެރިންނާއެކު ދަތުރުކުރި ފްލައިޓެއްގަ އެވެ. ކޯ-ޕައިލެޓް، ޕައިލެޓަށް ހަމަލާދީ ޒަހަމްކޮށްލާފައި ވަނިކޮށް، ޕައިލެޓް ކޮކްޕިޓް ދޮރު ހުޅުވުމާއެކު ކްރޫންނާއި ފަސިންޖަރުން ކޮކްޕިޓަށް ވަދެ ބޯޓުގެ ކޮންޓްރޯލް ހޯދައި ކޯ-ޕައިލެޓް ހިފަހައްޓާފައިވެ އެވެ. އެއަށްފަހު، ކުއްލި ހާލަތުގައި ބޯޓު ސައޫދީ އަރަބިއްޔާގެ ތަބޫކް އެއާޕޯޓަށް ވަނީ ޖައްސާފަ އެވެ.

ޔޫއޭއީން މިއަދު ވަނީ މިއީ ޓެރަރިސްޓް ހަމަލާއެއް ދިނުމުގެ ނިޔަތުގައި ކޯ-ޕައިލެޓް ހިންގި އަމަލެއް ކަމަށް ބުނެފަ އެވެ. އުމާން ރައްޔިތެއް ކަމަށްވާ، 29 އަހަރުގެ ހަމާމް އަލް-ހައްމާމީ، އަކީ ހައްދުފަހަނައަޅާފައިވާ ފިކުރުތަކަށް ތާއީދުކުރާ މީހެއް ކަމަށް ބެލެވޭތީ އުމާންގެ އިދާރާތަކުން ކުރިން އޭނާއަށް ޕައިލެޓްކަން ދިނުން މަނާކޮށްފައިވާ ކަމަށް ވެސް ވަނީ އެނގިފަ އެވެ. މިހާރު ފްލައިދުބާއީއަށް އޭނާ ވަޒީފާއަށް ނެގި ގޮތުގެ ތަހުގީގު ވެސް ދަނީ ކުރިއަށެވެ.

ޔޫއޭއީގެ އެޓާނީ ޖެނެރަލް ވިދާޅުވީ، މި ހާދިސާގެ ފަހަތުގައިވާ އަސްލު މަގުސަދާއި، ކޯ-ޕައިލެޓް އެހެން އެއްވެސް ޖަމާއަތަކާ ގުޅުން އޮތްތޯ ބެލުމަށްޓަކައި ސަރަހައްދީ ސެކިއުރިޓީ އިދާރާތަކާ ގުޅިގެން ފުޅާ ދާއިރާއެއްގައި ތަހުގީގު ކުރިއަށްދާ ކަމަށެވެ.