ރަސްމާލެ ތަރައްގީ ކުރުމަށްޓަކައި ފުށިދިއްގަރުފަޅު ހިއްކުމުގެ މަޝްރޫއުގެ ތެރެއިން ބޮޑު ބިމެއް ހިލޭ ބޭރު ބަޔަކަށް ދޭ މައްސަލައިގައި ކުރީގެ ރައީސް އިބްރާހިމް މުހައްމަދު ސޯލިހު ސުވާލު އުފައްދަވައި ސަރުކާރަށް ފާޑުވިދާޅުވެއްޖެ އެވެ.
އެމްޑީޕީގެ ކޮންގްރެސް ފެށުމަށް ބޭއްވި ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވީ، ރަސްމާލެ ތަރައްގީ ކުރަން ފުށިދިއްގަރުފަޅު ހިއްކަނީ ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހަރަދުކޮށްގެން ކަމަށެވެ. އަދި އޭގެ ތެރެއިން 500 ހެކްޓަރުގެ ބިން ހިލޭ ބޭރު ބަޔަކަށް ދިނުމަކީ ސުވާލު އުފެދޭ ކަމެއް ކަމަށް އެމަނިކުފާނު ފާހަގަކުރެއްވި އެވެ.
"…ސުވާލަކީ ރައްޔިތުންނަށް މީގެން ވަނީ ކޮން ފައިދާއެއްތޯ؟ ސަރުކާރަށް މީގެން ލިބެނީ ކޮން އެއްޗެއްތޯ؟،" ކުރީގެ ރައީސް ސޯލިހު ސުވާލު ކުރެއްވި އެވެ.
އެމަނިކުފާނު އިތުރަށް ވިދާޅުވީ، އެމްޑީޕީން ފޮރިން އިންވެސްޓްމެންޓްތަކާ ދެކޮޅު ނޫން ކަމަށާއި އުސޫލުތަކެއްގެ މަތިން ރެސިޑެންސް ވިސާ ދިނުމަކީ ވެސް ނުރުހޭ ކަމެއް ނޫން ކަމަށެވެ. ނަމަވެސް، މައްސަލައަކީ ރަސްމާލޭގެ މަޝްރޫއުގެ ތެރޭގައި ނޭނގޭ ސިއްރު ކަންތައްތަކެއް ހިނގަމުންދިއުން ކަމަށް ވިދާޅުވި އެވެ.
"ސިއްރުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދަން ޖާގަ ވެސް ދީގެން ނުވާނެ،" ރައީސް ސޯލިހު ވިދާޅުވި އެވެ.
ރަސްމާލޭގެ ބޮޑުބައެއް އީގަލް ހިލްސް އަށް ދިނުމާއި ގުޅިގެން އިނދިކޮޅު ފަރާތްތަކާއި އާންމުން ގިނަ ސުވާލުތަކެއް އުފައްދަމުން ދާއިރު މިހާރު އެ މަޝްރޫއު ހުއްޓުވަން އެދި މަޝްހޫރު ގާނޫނީ ވަކީލު އަލީ ހުސައިން ވަނީ ސުޕްރީމް ކޯޓަށް މައްސަލައެއްވެސް ހުށަހަޅުއްވާފައެވެ.
