ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް، އެމްޕީއެލްއާ ހަމައަށް ހިމެނޭ މަގު ހެދުމުގެ ޢަމަލީ މަސައްކަތް ފެށުމަށް އެ ސަރަޙައްދު ހުސްކުރުމަށް އަންގައިފިއެވެ. ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރަނީ އެކި ފިޔަވަހިތަކަށް ބަހާލައިގެންނެވެ.
ސަރުކާރުން އަންނަނީ މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ މަސައްކަތްކުރަމުންނެވެ. ތިންވަނަ ފިޔަވަހީގެ ދަށުން ބޭރުމަގުގެ ސުނާމީ ބިނާއިން ފެށިގެން އެމްޕީއެލްއާ ހަމައަށް ތަރައްޤީކުރުމަށް މިހާރުވަނީ ތައްޔާރުވެފައެވެ. އެކަމަށްޓަކައި ބޮޑުތަކުރުފާނު މަގުގައި ބަހައްޓާފައިވާ އުޅަނދުތަކާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރު އޮކްޓޯބަރު މަހުގެ 3 ވަނަ ދުވަހުގެ ރޭގެ 11:00 ގެ ކުރިން ނެގުމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިންވަނީ އަންގާފައެވެ.
އެވުޒާރާއިން ވިދާޅުވީ އަންނަ ހޮނިހިރު ދުވަހުގެ ކުރިން މަގުމަތީގައި ނުނަގައި ހުންނަ އުޅަނދުތަކާއި، ސުނާމީ ބިނާ ސަރަޙައްދުގައި އަޅާފައިވާ އުޅަނދުފަހަރުތައް އެވުޒާރާގެ ފަރާތުން ނަގާނެކަމަށެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކޮށް މާލޭ ވަށައިގެންވާ ރިންގް ރޯޑުގެ މަސައްކަތްކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ޚާއްސަ އަމާޒެކެވެ. އެގޮތުން ބޮޑުތަކުރުފާނު މަގު އެކި ފިޔަވަހިތަކަކަށް ބަހާލައިގެން ތަރައްޤީކުރަމުން އަންނައިރު މިހާރު މަސައްކަތް ނުނިމި އޮތީ ނޯތު ހާބަރު ފެށިގެން ސުނާމީ ބިނާ މައިޒާނާހަމައަށެވެ. ފަހު ފިޔަވަހީގެ މަސައްކަތް ފެށުމަށް މިހާރު ތައްޔާރުވެފައިވާއިރު އޭގެ ކުރީގެ ސެގްމަންޓުތަކުގެ މަސައްކަތް ނިންމާ މިހާރުވަނީ ހުޅުވާލާފައެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމާއެކު މާލޭގެ އެތެރޭގެ ޓްރެފިކް ފްލޯއަށް ބޮޑު ބަދަލެއް އަންނާނެކަމަށް ސަރުކާރުން ވިދާޅުވެއެވެ. ބޭރު މަގުގައި ހިމެނޭ ސަރުކާރާއި އާންމުންގެ އޮފީސްތަކާއި ފިހާރަތަކާއި ބާޒާރު މައްޗާއެކު ތަރައްޤީކުރުމަކީ އޭގެފަސޭހަކަން މާލޭގައި ދިރިއުޅޭ ރައްޔިތުންނަށް ލިބިގެންދާކަމެކެވެ. މީގެކުރިން ތޮއްޖެހިފައިވާ ބޭރު މަގު ތަރައްޤީކުރުމުން ތޮއްޖެހޭ ނިސްބަތް ކުޑަވެފައިވާކަން ފާހަގަކުރެވެއެވެ.
ބޮޑުތަކުރުފާނު މަގުގެ އިތުރުން އަމީނީ މަގުގައި ތާރުއަޅައިގެން ތަރައްޤީކޮށްފައިވާ ބައި ހަލާކުވުމާ ގުޅިގެން އެސަރަޙައްދު އަލުން ތާރުއަޅައިގެން ތަރައްޤީކުރުމުގެ މަސައްކަތްވެސް އަންނަނީ ކުރަމުންނެވެ.
