ދުނިޔޭގެ އިޤްތިޞާދާއި ބޮޑެތި ވިޔަފާރިތައް ކޮންޓްރޯލް ކުރަމުންދަނީ މަދު އާއިލާތަކަކުންނެވެ. މި އާއިލާތަކުގެ މުއްސަނދިކަން ހުރި މިންވަރަކީ އާދައިގެ މަރުހަލާއެއްގައި ތަޞައްވުރުވެސް ކޮށްލަން ދަތި މިންވަރެކެވެ. ބްލޫމްބާގް އަދި ފޯބްސްގެ އެންމެ ފަހުގެ ހިސާބުތަކަށް ބަލައި، ދުނިޔޭގެ އެންމެ މުއްސަނދި 5 އާއިލާގެ ތަފްޞީލުތައް ތިރީގައި އެވަނީއެވެ.

1. ވޯލްޓަން އާއިލާ – އެމެރިކާ

ދުނިޔޭގެ އެންމެ ބޮޑު ސުޕަމާކެޓް ޗެއިން "ވޯލްމާޓް" ގެ ވެރިންނަކީ މިއީއެވެ. މި އާއިލާގެ ބާނީއަކީ ސޭމް ވޯލްޓަންއެވެ. މިލްކިއްޔާތުގައި ގާތްގަނޑަކަށް 513 ބިލިއަން އެމެރިކާ ޑޮލަރު އެބަހުއްޓެވެ. ދުނިޔޭގެ އެކި ކޮޅުތަކުގައި ހުރި 10،500 އަށްވުރެ ގިނަ ވޯލްމާޓް ފިހާރައިގެ 44 އިންސައްތަ ހިއްސާ ކުރަނީ މި އާއިލާއިންނެވެ. މީގެ އިތުރުން "އާވެސްޓް ބޭންކް" ގެ ވެސް ބޮޑު ހިއްސާއެއް އޮވެއެވެ.

މި އާއިލާގެ އެލިސް ވޯލްޓަންއަކީ އަގުބޮޑު އާޓް އެއްކުރުމަށް ލޯބިކުރާ މީހެކެވެ. އާއިލާގެ މެންބަރުން އާންމުކޮށް ޗުއްޓީ ހޭދަކުރަނީ އެމެރިކާގެ ކޮލޮރާޑޯގެ އަސްޕެން ގައެވެ. އެމީހުންގެ އަމިއްލަ ސުޕަ-ޔޮޓް "ކައުސް" ގައި ދަތުރުކުރުމަށް އަހަރަކު އެތައް މިލިއަން ޑޮލަރެއް ހޭދަކުރެއެވެ.

މި އާއިލާގެ މުއްސަނދިކަން އިތުރުވާ ރޭޓަށް ބަލާއިރު، އެމީހުންނަށް ކޮންމެ މިނެޓަކު 70،000 އެމެރިކާ ޑޮލަރު (ގާތްގަނޑަކަށް 1 މިލިއަން ދިވެހި ރުފިޔާ) ލިބެއެވެ.

2. އަލް ނަޙްޔާން އާއިލާ – ޔޫއޭއީ

މިއީ ޔުނައިޓެޑް އަރަބް އެމިރޭޓްސްގެ ވެރިރަށް އަބޫދާބީގެ ޝާހީ އާއިލާއެވެ. މި އާއިލާގެ އިސްވެރިއަކީ ޔޫއޭއީގެ ރައީސް ޝެއިޚް މުޙައްމަދު ބިން ޒައިދު އަލް ނަޙްޔާންއެވެ.

މިލްކިއްޔާތުގައި ގާތްގަނޑަކަށް 335 ބިލިއަން އެމެރިކާ ޑޮލަރު (މިއީ ހަމައެކަނި އަމިއްލަ މިލްކިއްޔާތަށް ބެލެވޭ އަދަދެވެ) އެބަހުއްޓެވެ.

މި އާއިލާގެ މުއްސަނދިކަމުގެ އަސްލަކީ ތެލެވެ. ދުނިޔޭގެ ތެލުގެ ރިޒާވްގެ 6 އިންސައްތަ ކޮންޓްރޯލް ކުރަނީ އަބޫދާބީއިންނެވެ. މީގެ އިތުރުން ދުނިޔޭގެ އެކި ކުންފުނިތަކުގައި (މިސާލަކަށް ޓިކްޓޮކްގެ 15 އިންސައްތަ) އަދި މެންޗެސްޓަރ ސިޓީ ފުޓްބޯޅަ ކްލަބުގައި މި އާއިލާގެ އިންވެސްޓްމަންޓްތައް އެބަހުއްޓެވެ.

ރޭސްޖެހުމާއި، ފުޓްބޯޅަ އަދި އަގުބޮޑު ކާރު އެއްކުރުމަކީ މި އާއިލާގެ މީހުން ޝައުޤުވެރިވާ ކަންކަމެވެ. އެމީހުން ޗުއްޓީއަށް ދަނީ ފަރަންސޭސިވިލާތުގެ ރިވިއޭރާ ނުވަތަ ލަންޑަނަށެވެ. އެމީހުންގެ ޗުއްޓީ ދަތުރަކަށް އެތައް ސަތޭކަ މިލިއަން ޑޮލަރެއް ހޭދަކުރެއެވެ.
މި އާއިލާގެ ރިޔާސީ ގަނޑުވަރު "ޤަޞްރު އަލް ވަޠަން" ގެ ބޮޑުމިނަކީ އެމެރިކާގެ ޕެންޓަގަންގެ ދެގުނައެވެ. އަދި މި އާއިލާގެ ޝެއިޚް ޙަމަދް ބިން ޙަމްދާންއަކީ އޭނާގެ ނަން "HAMAD" މިހެން ރަށެއްގެ ވެލިގަނޑުގައި ސެޓެލައިޓަށް ފެންނަ ވަރަށް ބޮޑަކަށް ކޮނެގެން ލިޔުއްވި ބޭފުޅެކެވެ.

3. އަލް ސައުދު އާއިލާ – ސައުދީ އަރަބިއްޔާ

މިއީ ސައުދީ އަރަބިއްޔާގެ ޝާހީ އާއިލާއެވެ. މި އާއިލާގައި 15،000 އަށްވުރެ ގިނަ މެންބަރުން ހިމެނެއެވެ. މިލްކިއްޔާތުގައި  ގާތްގަނޑަކަށް 213 ބިލިއަން އެމެރިކާ ޑޮލަރު އެބަހުއްޓެވެ.

ދުނިޔޭގެ އެންމެ ބޮޑު ތެޔޮ ކުންފުނި "ސައުދީ އަރަމްކޯ" އިން ލިބޭ ނަފާގެ ބޮޑުބައެއް ދަނީ މި އާއިލާއަށެވެ.
ސުޕަ-ޔޮޓްތަކާއި، ރަން ބޯޓުތަކާއި، ޝިކާރަކުރުމަކީ އާއިލާގެ އިސްވެރިންގެ ހޮބީއެވެ. އެމީހުން މުޅި ރަށެއް ނުވަތަ ރިސޯޓެއް ކުއްޔަށް ހިފައިގެން މޮރޮކޯ ނުވަތަ ފަރަންސޭސިވިލާތުގައި ޗުއްޓީ ހޭދަކުރެއެވެ. އެއް ޗުއްޓީއަކަށް 100 މިލިއަން ޑޮލަރަށްވުރެ ގިނައިން ހޭދަކުރާ ފަހަރު އާދެއެވެ.

މި އާއިލާގެ ޕްރިންސް އަލް-ވަލީދު ބިން ޠަލާލްގެ އަމިއްލަ ބޯއިން 747 ބޯޓެއް އޮވެއެވެ. އޭގެ އެތެރޭގައި ހުންނަނީ މުޅިންވެސް ރަނުންނެވެ. އަދި އޭގައި ދެ ސިޑިބަރިއާއި ރަނުގެ ތަޚުތެއްވެސް ހުރެއެވެ.

4. އަލް ޘާނީ އާއިލާ – ޤަޠަރު

19 ވަނަ ޤަރުނުން ފެށިގެން ޤަޠަރުގައި ވެރިކަން ކުރަމުންދާ އާއިލާއަކީ މިއީއެވެ. މިހާރުގެ އަމީރަކީ ޝެއިޚް ތަމީމް ބިން ޙަމަދު އަލް ޘާނީއެވެ. މިލްކިއްޔާތުގައި ގާތްގަނޑަކަށް 199 ބިލިއަން އެމެރިކާ ޑޮލަރެވެ.

މި އާއިލާގެ މުއްސަނދިކަން ބިނާވެފައިވަނީ ދުނިޔޭގެ އެންމެ ބޮޑު އެލް.އެން.ޖީ (Liquid Natural Gas) ނުވަތަ ގޭސް ރިޒާވްގެ މައްޗަށެވެ. މީގެ އިތުރުން ލަންޑަނުގެ "ހެރޮޑްސް" ސުޕަމާކެޓާއި "އެމްޕަޔަރ ސްޓޭޓް ބިލްޑިންގް" ގެ ހިއްސާވެސް އޮވެއެވެ.

ކުޅިވަރުގެ ދާއިރާއަށް އިންވެސްޓްކުރުމަކީ (މިސާލަކަށް ޕީ.އެސް.ޖީ ފުޓްބޯޅަ ކްލަބް) އެމީހުންގެ ބޮޑު ހޮބީއެކެވެ. ޗުއްޓީ ހޭދަކުރަނީ މެޑިޓެރޭނިއަން ކަނޑުގެ ސަރަހައްދުތަކުގައެވެ. އެމީހުންގެ "އަލް މިރްޤާބް" ކިޔާ 300 މިލިއަން ޑޮލަރުގެ ޔޮޓުގައި އެތައް ދަތުރެއްކުރެއެވެ.

މި އާއިލާއިން ވަނީ އިނގިރޭސިވިލާތުގެ ޝާހީ އާއިލާއަށްވުރެ ގިނައިން ލަންޑަނުގެ ބިންތަކާއި އިމާރާތްތައް ބައްލަވައިގެންފައެވެ. ލަންޑަނުގެ އެންމެ އަގުބޮޑު ސަރަހައްދުތަކުގެ ވެރިންނަކީ މިއީއެވެ.

5. ހާމްސް އާއިލާ – ފަރަންސޭސިވިލާތް

ދުނިޔޭގެ އެންމެ އަގުބޮޑު އަދި އެންމެ މަތީ ފަންތީގެ ފެޝަން ބްރޭންޑް "Hermès" ގެ ވެރިންނަކީ މިއީއެވެ. މިއީ 100 އަށްވުރެ ގިނަ މެންބަރުން ހިމެނޭ އާއިލާއެކެވެ. މިލްކިއްޔާތުގައި ގާތްގަނޑަކަށް 184 ބިލިއަން އެމެރިކާ ޑޮލަރެވެ.

މި އާއިލާގެ މުއްސަނދިކަން އަންނަނީ ހަމައެކަނި ލަގްޒަރީ އުފެއްދުންތައް (މިސާލަކަށް ބިރްކިން ދަބަސް) ވިއްކައިގެންނެވެ.
ވައިން އުފެއްދުމަކީ މި އާއިލާގެ ބައެއް މެންބަރުންގެ ހޮބީއެވެ. އެމީހުން ޗުއްޓީ ހޭދަކުރަނީ ޔޫރަޕްގެ ސިއްރު ރަށްތަކުގައެވެ. އެމީހުންގެ އަމިއްލަ ވިލާތަކުގައި ދިރިއުޅޭއިރު، ދަތުރުފަތުރަށް އެތައް މިލިއަން ޑޮލަރެއް ހޭދަކުރެއެވެ.

އެމީހުން އުފައްދާ "Hermès Birkin" ދަބަހަކީ ރަނަށްވުރެ ވެސް އަގު އަވަހަށް މަތިވާ އެއްޗެކެވެ. ބައެއް ދަބަސްތަކުގެ އަގު 500،000 ޑޮލަރަށްވުރެ މައްޗަށް ދެއެވެ. އަދި އެ ގަންނަން ބޭނުންވިޔަސް އެތައް އަހަރަކު ވެއިޓިންގް ލިސްޓުގައި ހުންނަންޖެހެއެވެ.

މި ފަސް އާއިލާގެ މުއްސަނދިކަން އެއްކޮށްލުމުން ގާތްގަނޑަކަށް 1.4 ޓްރިލިއަން އެމެރިކާ ޑޮލަރަށް އަރައެވެ. މިއީ ދުނިޔޭގެ ގިނަ ޤައުމުތަކުގެ ޖީ.ޑީ.ޕީ އަށްވުރެ މާ މަތީ އަދަދެކެވެ.