ދުނިޔޭގައި މިހާތަނަށް އެންމެ ގިނަ ދުވަސްވީ، އަދިވެސް ހިނގަމުންދާ ކުންފުންޏަކީ ޖަޕާނުގެ ކޮންގޯ ގުމީ އެވެ. މިއީ މީގެ 1400 އަށްވުރެ ގިނަ އަހަރު ކުރިން އުފެދުނު، އަދި ތާރީޚީ ގޮތުން ފާހަގަ ކޮށްލެވޭ ރާވައި ހިންގުމުގެ މޮޅު އުސޫލުތަކެއް ގެންގުޅުނު ކުންފުންޏެކެވެ.

ކޮންގޯ ގުމީ އުފެދުނީ މީލާދީން 578 ވަނަ އަހަރުގަ އެވެ. އެއީ ވިލާތުގެ "ވައިކިންގްސް" ގެ ޒަމާނަށްވުރެވެސް މާ ކުރިއެވެ. މި ކުންފުނި އުފެދެން ދިމާވީ ޖަޕާނުގެ ވަލީ އަހުދު ޕްރިންސް ޝޯޓޯކޫ، ޖަޕާނުގައި އެންމެ ފުރަތަމަ ބިނާކުރި ބުޑިސްޓް ފައްޅި ހެދުމަށްޓަކައި ކޮރެއާއިން ވަޑާންކުރާ މީހުން ގެނައުމުންނެވެ. އޭގެ ތެރެއިން ޝިގެމިތްސޫ ކޮންގޯ ކިޔާ މާހިރަކު މި ފައްޅި ބިނާކުރުމަށްފަހު، އޭނާގެ އަމިއްލަ ނަމަށް ނިސްބަތްކޮށް މި ކުންފުނި އުފެއްދިއެވެ.

ކޮންގޯ ގުމީ އަކީ އަބަދުވެސް ޢިމާރާތްކުރުމުގެ މަސައްކަތް ކުރާ ކުންފުންޏެކެވެ. އެންމެ ކުރިން އެ ކުންފުނިން ކުރި މައިގަނޑު މަސައްކަތަކީ ލަކުޑިން ބުޑިސްޓް ފައްޅިތަކާއި، ސިންޓޯ ފައްޅިތައް ފަރުމާކޮށް ބިނާކުރުމެވެ. ޖަޕާނުގެ މަޝްހޫރު އޮސާކާ ކާސަލް 16 ވަނަ ގަރުނުގައި ބިނާ ކުރުމުގައިވެސް މި ކުންފުނިން ބޮޑު ހިއްސާއެއް އަދާކުރިއެވެ.

ބިންހެލުންތަކާއި، ހަނގުރާމަތަކާއި، އަދި އިގްތިސާދީ ބޮޑެތި ބަދަލުތަކުގައިވެސް މި ކުންފުނި ސަލާމަތްވީ، ޖަޕާނުގައި ފައްޅިތައް މަރާމާތުކުރުމުގެ ބޭނުންތެރިކަން އަބަދުވެސް އޮންނާތީއެވެ. ދެވަނަ ބޮޑު ހަނގުރާމައިގެ ދުވަސްވަރު ފައްޅި ހެދުން މަދުވުމުން، އެ ކުންފުނިން ސަންދޯއް ހެދުމުގެ މަސައްކަތްވެސް ކުރިއެވެ.

މިހާރު ކޮންގޯ ގުމީ ހިންގަމުން ދަނީ ކުރީގެ ގޮތަކަށް ނޫނެވެ. 2006 ވަނަ އަހަރު ކުންފުންޏަށް ދިމާވި މާލީ ދަތިތަކެއްގެ ސަބަބުން، ޖަޕާނުގެ ބޮޑު ކޮންސްޓްރަކްޝަން ގުރޫޕެއް ކަމަށްވާ ޓަކަމަޓްސޫ ކޮންސްޓްރަކްޝަން ގުރޫޕު ގެ ދަށަށް މި ކުންފުނި ވަނީ ބަދަލުވެފައެވެ. ނަމަވެސް، ކުންފުނީގެ ނަމާއި އަމިއްލަވަންތަކަން ގެއްލުވައެއް ނުލައެވެ.

އަދިވެސް އެ ކުންފުނީގެ މައިގަނޑު މަސައްކަތަކީ ސަގާފީ ފައްޅިތަކާއި އާސާރީ ބިނާތައް މަރާމާތުކޮށް ބެލެހެއްޓުމެވެ. ނަމަވެސް، ޒަމާނީ ޓެކްނޮލޮޖީ (ކެޑް ފަދަ ސޮފްޓްވެއަރ) އާއި ކޮންކްރީޓް ބޭނުންކޮށްގެން މަސައްކަތްތައް ކުރެއެވެ. ކުންފުނީގައި މިހާރު މަސައްކަތް ކުރަނީ ގާތްގަނޑަކަށް 100 އަށްވުރެ ގިނަ މުވައްޒަފުންނެވެ.

މީގެ ތެރޭގައި ލަކުޑީގެ މަސައްކަތަށް ޚާއްޞަ، އެތައް އަހަރެއްގެ ތަޖުރިބާ ހުރި ކާޕެންޓަރުން ހިމެނެއެވެ. މި ކުންފުނި 40 ޖީލަށްވުރެ ގިނަ ދުވަހު އާއިލީ ވިޔަފާރިއެއްގެ ގޮތުގައި ދެމިއޮތެވެ. އާއިލާގައި ވިޔަފާރި ހިންގާނެ ފިރިހެން ކުއްޖަކު ނެތްނަމަ، ދަނބިދަރި އާއިލާގެ ތެރެއަށް ވައްދައި، އޭނާގެ ނަން "ކޮންގޯ" އަށް ބަދަލުކޮށްގެންވެސް އާއިލީ ނަން ދެމެހެއްޓިއެވެ. މިއީ މި ކުންފުނި 1400 އަހަރު ވަންދެން ދެމިއޮތް އެންމެ ބޮޑު އެއް ސިއްރެވެ.