ރާއްޖޭގައި ނޫސްވެރިކަމުގެ މިނިވަންކަން ހަނިވަމުންދާ ކަމަށް ބުނެ އުފެދިފައިވާ ކަންބޮޑުވުންތަކާ ގުޅިގެން، މި ދަނޑިވަޅުގައި ކުރީގެ ތިން ރައީސުން ކަމަށްވާ ރައީސް ޢަބްދުﷲ ޔާމީން ޢަބްދުލްޤައްޔޫމާއި، ރައީސް މުޙައްމަދު ނަޝީދުގެ އިތުރުން ރައީސް އިބްރާހިމް މުޙައްމަދު ޞާލިޙު މާދަން ބައްދަލުކުރެއްވުމަށް ނިންމަވައިފިއެވެ. ޕީޕަލްސް ނޭޝަނަލް ފްރަންޓް (ޕީއެންއެފް) އިން ވަނީ ތިން ރައީސުން ބައްދަލުކުރައްވާކަން ހާމަކޮށްފައެވެ.
މި ތާރީޚީ ބައްދަލުވުން ކުރިއަށް ގެންދިއުމަށް ނިންމާފައިވަނީ މީޑިއާތަކަށް ހުޅުވާލައިގެން، ނޫސްވެރިންގެ ހާޒިރުގައެވެ. އެކަން ރައީސް ޔާމީން ވަނީ ކަށްވަރު ކޮށްދެއްވާފައެވެ.
ރައީސް ޔާމީން ދާދިފަހުން ވިދާޅުވެފައިވަނީ އެމަނިކުފާނު އެމްޑީޕީގެ ދެ ލީޑަރުންނާއެކު މަސައްކަތް ކުރައްވަނީ ނޫސްވެރިންގެ ހައްގުތައް ހިމާޔަތް ކުރެއްވުމަށް ކަމަށެވެ.
މާލެ ޓައިމްސްއަށް ދެއްވި މައުލޫމާތެއްގައި ރައީސް ޔާމީންގެ އަރިސްބޭފުޅަކު ވިދާޅުވީ، އެމްޑީޕީއާ ގުޅިގެން މަސައްކަތް ކުރައްވަން ނިންމެވީ ސަރުކާރުން ނޫސްވެރިކަމުގެ މިނިވަންކަމަށް ހުރަސް އަޅަމުންދާތީ ކަމަށެވެ.
"އެމްޑީޕީގެ ލީޑަރުންނާއެކު މަސައްކަތް ކުރަނީ ނޫސްވެރިންގެ ދިފާއުގައި،“ ރައީސް ޔާމީން ވިދާޅުވެފައިވެއެވެ.
ރައީސް ނަޝީދާއި ރައީސް ޞާލިޙާއެކު މަސައްކަތް ކުރައްވަން ތައްޔާރަށް ހުންނެވިކަން ރައީސް ޔާމީން ހާމަކުރެއްވީ އިއްޔެއެވެ. އެމަނިކުފާނު ސިފަކުރެއްވި ގޮތުގައި މިހާރު ނޫސްވެރިކަމުގެ މިނިވަންކަމަށް ދެމުންދަނީ ހަމަލާއެއް ކަމަށާއި، މިއީ އެއްގޮތަކަށްވެސް ބަލައިގަނެވޭނެ ކަމެއް ނޫނެވެ.
