ކޯޓު އަމުރަކާ ޚިލާފުވި ކަމަށް ބުނެ 'އަދަދު' ނޫހުގެ ދެ ނޫސްވެރިން ޖަލަށްލުމާ ގުޅިގެން އުފެދިފައިވާ ކަންބޮޑުވުންތަކުގެ ތެރޭގައި، ނޫސްވެރިކަމުގެ މިނިވަންކަން އިޔާދަކުރުމަށް ކުރީގެ ރައީސް މުޙައްމަދު ނަޝީދާއި ކުރީގެ ރައީސް އިބްރާހީމް މުޙައްމަދު ޞާލިޙާއެކު މަސައްކަތް ކުރައްވަން ތައްޔާރަށް ހުންނެވި ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިއަދު ވިދާޅުވެއްޖެއެވެ.

އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް، ކުރީގެ ތިން ރައީސުން ޚިޔާލު ތަފާތުވުންތައް އެއްކިބާކޮށް އެކުގައި ގައުމު ސަލާމަތް ކުރަން ނުކުންނަވަން ގޮވާލެއްވުމާ ގުޅިގެން ނޫސްވެރިން ކުރި ސުވާލަކަށް ޖަވާބު ދެއްވަމުން ޔާމީން ވިދާޅުވީ، ނޫސްވެރިކަމުގެ މިނިވަންކަން އިޔާދަކުރަން އެ ދެ ބޭފުޅުންނާ އެކު މަސައްކަތް ކުރައްވަން އެއްބަސްވެވަޑައިގަންނަވާ ކަމަށެވެ. އެހެންނަމަވެސް އެ ކަމާގުޅޭ އިތުރު ތަފުސީލެއް އެމަނިކުފާނު ނުދެއްވައެވެ.

"ނޫސްވެރިކަމުގެ މިނިވަންކަމަށް ދިން މި ހަމަލާއަކީ ބަލައިގަނެވޭނެ ކަމެއް ނޫން،" ޔާމީން ވިދާޅުވިއެވެ.

’އަދަދު' ނޫހުގެ ނޫސްވެރިން ކަމަށްވާ ލީވާން ޢަލީ ނަސީރާއި މުޙައްމަދު ޝަހްޒާން ޖަލަށްލާން ކްރިމިނަލް ކޯޓުން އިއްޔެ ހުކުމްކުރީ ޤަޛްފުގެ ދައުވާއާ ގުޅިގެން ނެރުނު ކޯޓު އަމުރަކާ ޚިލާފުވި ކަމަށް ބުނާ މައްސަލައިގައެވެ. ލީވާނަށް 10 ދުވަހުގެ ޖަލު ހުކުމެއް އިއްވާފައިވާއިރު، ޝަހްޒާނަށް އިއްވީ 15 ދުވަހުގެ ހުކުމެކެވެ.

ލީވާން ހާޒިރުކުރީ ކޯޓު އަމުރާ ގުޅޭ ޚަބަރެއް ލިޔެގެން ކަމަށް ބުނެ ކަމަށް ވާއިރު، ޝަހްޒާން ހާޒިރުކުރީ ރައީސް އޮފީހުގެ ނޫސްވެރިންގެ ބައްދަލުވުމެއްގައި ކޯޓު އަމުރާ ޚިލާފަށް ރައީސާ ސުވާލުކުރި ކަމަށް ބުނެއެވެ.

މި މައްސަލައިގައި ސީޕީޖޭއާއި ޓްރާންސްޕޭރަންސީ އަދި އައިއެފްޖޭ އިންވެސް ވަނީ ދެ ނޫސްވެރިން ބަންދުން ދޫކޮށްލުމަށް ގޮވާލައިފައެވެ.