ދުނިޔޭގެ އިގްތިސާދީ އެންމެ ބޮޑު އެއް މުއައްސަސާ ކަމަށްވާ ވޯލްޑް އިކޮނޮމިކް ފޯރަމް ގެ ރައީސް ބޯގް ބްރެންޑާ މަގާމުން އިސްތިއުފާ ދެއްވާފައިފިއެވެ.
މި ނިންމުން އައީ ކުރީގެ މަޝްހޫރު ކުށްވެރިޔާ ޖެފްރީ އެޕްސްޓީންއާ އޮތް ގުޅުން ތަކެއްގެ ތަހުގީގަށް ފަހުގައެވެ.
އެމެރިކާގެ ޖަސްޓިސް ޑިޕާޓްމަންޓުން ހާމަކުރި ލިޔުންތަކަކާ ގުޅިގެން ކުރިއަށްދިޔަ މި ރިވިއުއިން ދައްކާ ގޮތުގައި ބްރެންޑާ ވަނީ އެޕްސްޓީންއާއެކު ތިން ފަހަރަކު ރޭގަނޑުގެ ކެއުމުގައި ބައިވެރިވެފައެވެ. އަދި އީމެއިލް އަދި މެސެޖު މެދުވެރިކޮށް ގިނަ މުއާމަލާތްތަކެއް ކޮށްފައެވެ.
"އަޅުގަނޑު ގަބޫލުކުރާ ގޮތުގައި، އެއްވެސް ހުރަހެއް ނެތި ފޯރަމްގެ މުހިންމު މަސައްކަތްތައް ކުރިއަށް ގެންދިއުމަށްޓަކައި، މިއީ އަޅުގަނޑު މަގާމުން ދުރަށް ދާންވީ އެންމެ ރަނގަޅު ވަގުތެވެ." ބޯގް ބްރެންޑާ ވިދާޅުވި އެވެ.
ބްރެންޑާގެ ބަދަލުގައި ވަގުތީ ގޮތުން ފޯރަމް ހިންގެވުމާ ހަވާލުވެވަޑައިގަތީ އެލޮއިސް ޒުވިންގީ އެވެ. މިއީ އެ މުއައްސަސާގެ ބާނީ ކްލައުސް ޝްވާބް 2025 ވަނަ އަހަރު ވަކިވެވަޑައިގަތުމަށްފަހު އެ ފޯރަމަށް ކުރިމަތިވި އެންމެ ބޮޑު ބަދަލެވެ.
ބްރެންޑާގެ އިސްތިއުފާއިން އެނގެނީ، ދުނިޔޭގެ ލީޑަރުންގެ ފާއިތުވި ކަންކަމަށް މިހާރު ކުރިއަށްވުރެ ބޮޑަށް ފާރަވެރިވާ ކަމެވެ.
