އެތައް އަހަރެއް ވަންދެން ސައިންސް ފިކްޝަން ފިލްމު ތަކުން އަހަރެމެންނަށް ދައްކަމުން އައީ އާދައިގެ މަސައްކަތްތަކުން މީހާ ސަލާމަތްވާނެ މުސްތަގުބަލެކެވެ. ރޮބޮޓް ކުނިކަހާ މެޝިނާއި އޭއައި އިން އީމެއިލް ލިޔެދޭ ޒަމާނެއްގައި، ފެންވެރުމުގެ ކަންތައް އަދިވެސް އޮތީ ބަދަލެއް ނުވެއެވެ. ނަމަވެސް މިހާރު މިވަނީ އެކަން ބަދަލުވެފައެވެ.

2025 ވަނަ އަހަރުގެ އޮސާކާ އެކްސްޕޯގައި ދައްކާލި "އިންސާނުން ދޮންނަ މެޝިން" މިހާރު މިވަނީ 2026 ވަނަ އަހަރުގެ ކުރީކޮޅު ބާޒާރަށް ނެރެފައެވެ. މިއީ އެއްވެސް މީހެއްގެ އެހީއާ ނުލައި، އަދި ސައިބޯނިވެސް ބޭނުންނުކޮށް އެންމެ 15 މިނެޓު ތެރޭގައި މީހާ މުޅިން ސާފުކޮށްލާ މެޝިނެކެވެ. ނަމަވެސް މީގެ އަގު ހުރީ އާދައިގެ މީހަކަށް އަތްފޯރާ ފަށެއްގައެއް ނޫނެވެ.

50 އަހަރުވީ ހުވަފެނެއް ހަގީގަތަކަށް އޮސާކާގެ "ސައިންސް ކޯ" އިން އުފެއްދި މި މެޝިނަށް ދީފައިވާ ނަމަކީ "މިރާއީ ހިއުމަން ވޮޝިންގ މެޝިން" އެވެ. މީގެ ފަހަތުގައި ވަނީ 1970 ވަނަ އަހަރުގެ އެކްސްޕޯގައި ސާންޔޯ ކުންފުނިން ދައްކާލި "އަލްޓްރާސޮނިކް ބާތު" އެވެ. އޭރު އެ ޓެކްނޮލޮޖީ ފުރިހަމަ ނުވި ނަމަވެސް، މިއަދު މިވަނީ އެ ހުވަފެން ހަގީގަތަކަށް ވެފައެވެ.

މި މެޝިން ފެންނަނީ ޖައްވީ އުޅަނދެއްގެ ކޮކްޕިޓް ގޮތަށެވެ. މީހާ މީގެތެރޭގައި ހުންނަ ގޮނޑިއެއްގައި އިށީނުމުން ދޮރު ލެއްޕި، މަސައްކަތް ފެށެއެވެ.

މީގައި ބޭނުން ކުރަނީ "ފައިން ބަބުލް" ޓެކްނޮލޮޖީއެވެ. މިއީ ފެނުގެ ތެރެއަށް ވަރަށް ކުދި އޮކްސިޖަން ބޮކިތައް ފޮނުވައިގެން، ހަމުގެ އެންމެ އެތެރެއަށް ވާސިލްވެ، ހަމުގައި ހުންނަ ހަޑިތަކާއި މަރުވެފައިވާ ހަންތައް ސާފުކޮށްދޭ ނިޒާމެކެވެ. މީގައި އެއްވެސް ކަހަލަ ސައިބޯންޏެއް ނުވަތަ ކެމިކަލެއް ބޭނުން ކުރާކަށް ނުޖެހެއެވެ.
މި 15 މިނެޓުގެ ވަގުތަކީ ހަމައެކަނި ސާފުތާހިރުވުމެއް ނޫނެވެ. މީގެތެރޭގައި ހުންނަ ސެންސަރު ތަކުން މީހާގެ ހިތުގެ ވިންދާއި ސްޓްރެސް ހުރި މިންވަރު ބަލައެވެ. އެއަށްފަހު، މެޝިނުގެ އެތެރޭގައި ހުންނަ ސްކްރީން ތަކުން ހިތްގައިމު މަންޒަރުތައް ދައްކައި، މީހާ ހަމަޖައްސާލުމަށްޓަކައި މީރުވަސް ދުއްވައި، ފެނުގެ ހޫނުމިން އަމިއްލައަށް ބަދަލުކޮށްދެއެވެ. ފެންވަރާ ނިމުމުން، ހޫނު ވައިގެ އެހީގައި މީހާ ހިއްކާލަދެއެވެ.

މި މެޝިނުގެ އަގަކީ ގާތްގަނޑަކަށް 60 މިލިއަން ޔެން (400,000 އެމެރިކާ ޑޮލަރު) އެވެ. އެހެންކަމުން، މިއީ އަދި އާދައިގެ ގެތަކަށް ހާއްސަ އެއްޗެއް ނޫނެވެ. މި މެޝިން މިހާރު އަމާޒު ކުރަނީ ވަރަށް މުއްސަނދި ހޮޓާތަކާއި، ލަގްޒަރީ ސްޕާތަކާއި، އަދި އުމުރުން ދުވަސްވީ މީހުން ބަލަހައްޓާ މަރުކަޒު ތަކަށެވެ. ޚާއްސަކޮށް އަމިއްލައަށް ހަރަކާތްތެރި ނުވެވޭ މީހުންނަށް، އެއްވެސް މީހެއްގެ އެހީއާ ނުލައި ފެންވެރުމުގެ ފުރުސަތު މި މެޝިނުގެ ސަބަބުން ލިބިގެން ދާނެއެވެ.