މި ދުނިޔޭގައި ކޮންމެ ނަފްސެއްވެސް ދަތުރު ކުރަމުން ދަނީ ތަފާތު މަގަކުންނެވެ. ބައެއް މީހުންނަށް އެ މަގު ސީދާވެފައި ފަސޭހައެވެ. ނަމަވެސް އަހަރެމެންގެ ތެރެއިން ގިނަ މީހުންނަށް މި މަގު ސީދާވެފައި ނިކަން އުނދަގުލެވެ. އަދި ދުނިޔޭގެ ކެހިވެރިކަމާއި، ފާފައިގެ އަނދިރިކަމާއި، ޣާފިލުކަމުގެ ތެރޭގައި މަގު އޮޅިފައިވެއެވެ.

އެހެންނަމަވެސް، މާތް ﷲ ގެ ރަޙްމަތުގެ ތެރެއިން، ކޮންމެ މުއުމިނަކަށްވެސް ވަރަށް ޚާއްޞަ ފުރުޞަތެއް ލިބިގެންވެއެވެ. އެއީ "ޙަޔާތް ބަދަލުކޮށްލާ ހިނދުކޮޅު" އެވެ. މިއީ ހަމައެކަނި އާދަތަކަށް އަންނަ ބަދަލެއް ނޫނެވެ. މިއީ ހިތުގެ ދިރުމެވެ. މިއީ ދުނިޔޭގެ ދަޅަތަކުގެ ފަހަތުން ދުވުން ހުއްޓާލައި، ހައްދަވާބޮޑުކުރެއްވި ރަސްކަލާނގެ މަގަށް ދުއްވައިގަންނަ ވަގުތެވެ.

މި ބަދަލު އަންނަ ގޮތް އިސްލާމީ ނަޒަރަކުން ބަލާއިރު، މި ބަދަލު އަންނަނީ ފުރާނަ ހައިހޫނު ވެފައިވާކަން އިޙްސާސްވާ ހިސާބުންނެވެ. އަހަރެމެން ކާބޯތަކެތިން ހަށިގަނޑު ފުރާލައި، މުނިފޫހިފިލުވުމުން ސިކުނޑި ހަމަޖައްސާލި ނަމަވެސް، ﷲ ހަނދުމަކުރުމާ ނުލައި ހިތަށް ހަމަޖެހުމެއް ނުލިބޭނެއެވެ.

ކީރިތި ޤުރުއާނުގައި މާތް ﷲ ވަޙީކުރައްވާފައިވެއެވެ.
"އަދި ދަންނާށެވެ! ހިތްތަކަށް ހަމަޖެހުން ލިބެނީﷲ ހަނދުމަ ކުރުމުންނެވެ." (ސޫރަތުއް ރަޢުދު: 28)

ގިނަ ފަހަރަށް މިފަދަ ބަދަލުތައް އަންނަނީ ހީވެސް ނުކުރާ ފަދަ ގޮތްގޮތަށެވެ. މުޞީބާތެއް މެދުވެރިވުން، ގެއްލުމެއް ނުވަތަ ބަލިމަޑުކަމެއް ކުރިމަތިވެ، ކަންކަން މިންވަރު ކުރައްވަނީ ހަމައެކަނި ﷲ ކަން ހަނދާންވުމުންނެވެ.

ޤުރުއާނުގެ އާޔަތެއް އިވުމުން، އެއީ ހަމަ ސީދާ ތިމާއަށް ބާވައިލެއްވި އާޔަތެއް ފަދައިން ހިތަށް އަސަރުކުރުވުންވެސް މީގެތެރޭގައި ހިމެނެއެވެ. ދުނިޔަވީ ގޮތުން އިންސާނާ ކިތަންމެ ކާމިޔާބުވީ ނަމަވެސް، ހިތަށް ވެރިވާ ހުސްކަމާއެކު "އަހަރެން މިދަނީ ކޮންތާކަށް ހެއްޔެވެ؟" މި ކަހަލަ ސުވާލުތައް ސިކުނޑީގައި އުފެދޭނެއެވެ.

ފުޟައިލް ބިން ޢިޔާޟްގެ ވާހަކަ: މަގުފޭރޭ މީހާ ވަލީވެރިއަކަށް ބަދަލުވުން
އިސްލާމީ ތާރީޚުގައި، ޙަޔާތް ބަދަލުކޮށްލުމުގެ އެންމެ ފުރިހަމަ މިސާލަކީ ފުޟައިލް ބިން ޢިޔާޟްގެ ވާހަކައެވެ. އެކަލޭގެފާނު ބޮޑުވެގެންވާ ޢިލްމުވެރިއަކަށް ވެވަޑައިގަތުމުގެ ކުރިން، އެކަލޭގެފާނަކީ މީހުން ބިރުގަންނަ މަގުފޭރޭ މީހެކެވެ. އެއްރެއަކު، ފާފައެއް ކުރުމަށްޓަކައި ފާރެއް މައްޗަށް އަރާވަޑައިގެން ހުންނަވަނިކޮށް، ޤުރުއާނުގެ މި އާޔަތް ކިޔަވާ އަޑު އިވިވަޑައިގަތެވެ:

"އީމާންވި މީހުންގެ ހިތްތައް ﷲ ހަނދުމަކުރުމަށާއި، އަދި ޙައްޤުގެ ތެރެއިން ބާވައިލެއްވި ފޮތަށް މަޑުމޮޅިވާންވީ ވަގުތު ނާންނަނީ ހެއްޔެވެ؟.." (ސޫރަތުލް ޙަދީދް: 16)

މި ސުވާލު ހޮނުގުގުރިއެއް ފަދައިން އެކަލޭގެފާނުގެ ހިތްޕުޅަށް ވާސިލުވިއެވެ. އެކަލޭގެފާނު ފިލާކަށް ނުދުވެއެވެ. ބަހަނާއެއް ނުދައްކައެވެ. އެ ވަގުތުން ވަގުތަށް، އެކަލޭގެފާނު ޖަވާބު ދެއްވިއެވެ. "އާދޭހެވެ! އޭ ހައްދަވާބޮޑުކުރެއްވި ރަސްކަލާކޮ! އެ ވަގުތު ޖެހިއްޖެއެވެ."

އެކަލޭގެފާނު ފާރުމަތިން ފައިބައިވަޑައިގެން ތައުބާވެ، ޙަޔާތުގެ ބާކީ ބައި މައްކާގައި އަޅުކަން ކުރެއްވުމުގައި ހޭދަކުރެއްވިއެވެ. މިއިން ދޭހަވަނީ ތައުބާވުމަކީ ތިމާގެ މާޒީއާ ގުޅިފައިވާ ކަމެއް ނޫން ކަމާއި، އެއީ ހަމަ މިވަގުތު ނިންމާ ނިންމުމެއް ކަމެވެ.

ތައުބާ ވުމަށް ބަލާލަމާ ހިނގާށެވެ.
"ތައުބާ" ގެ މާނައަކީ "އެނބުރި އައުމެވެ". އޭގެ މާނައަކީ ތިބާ ކުރިންވެސް ވީ ﷲ އާ އެކުގައެވެ. ދެން މަގު އޮޅި ދުރަށް ދެވުނީއެވެ. އަދި މިހާރު ތިބާ އެނބުރި ﷲ ގެ މަގަށް އައުމެއެވެ. ޝައިޠާނާގެ އެންމެ ބޮޑު ހަތިޔާރަކީ ފާފައެއް ނޫނެވެ. ފާފައަށްފަހު މީހާގެ ހިތުގައި އުފައްދާ މާޔޫސްކަމެވެ. "ކަލޭ ތިޔަހުރީ މާގިނަ ފާފަކޮށްފައެވެ. ދެން ﷲ އަށް ކުރިމަތިލާނީ ކިހިނެއް ހެއްޔެވެ؟" މިފަދައިން ޝައިޠާނާ ވަސްވާސް ދެއެވެ.

މިކަމަށް ރައްދު ދެއްވައި، މާތް ﷲ ޤުރުއާނުގައި ވަޙީ ކުރައްވާފައިވަނީ އުއްމީދުން ފުރިގެންވާ އާޔަތެކެވެ:

"ކަލޭގެފާނު ވިދާޅުވާށެވެ! އެއުރެންގެ އަމިއްލަ ނަފްސުތަކުގެ މައްޗަށް ފާފައިން އިސްރާފުކޮށްފައިވާ، ތިމަންރަސްކަލާނގެ އަޅުތަކުންނޭވެ! ތިޔަބައިމީހުން ﷲ ގެ ރަޙްމަތާމެދު އުއްމީދު ކަނޑައިނުލާށެވެ! ހަމަކަށަވަރުން، ﷲ އީ، ހުރިހާ ފާފަތަކެއް ފުއްސަވާ ރަސްކަލާނގެއެވެ.." (ސޫރަތުއް ޒުމަރު: 53)

ޙަގީގީ ބަދަލަކަށް މިސްރާބު ޖަހާ ހިސާބަކީ، ތިބާގެ ފާފަތަކަށްވުރެ ﷲ ގެ ރަޙްމަތް މާ ތަނަވަސްކަން ޤަބޫލުކުރާ ހިސާބެވެ.
ތިބާގެ ހިތަށް މިފަދަ ބަދަލެއް ގެނައުމަށް ބޭނުންވާނަމަ، ތިރީގައިމިވާ ކަންކަމަށް ސަމާލުކަން ދޭށެވެ:

ނިޔަތް:

މިއީ ހަމައެކަނި ﷲ އަށްޓަކައިވާ ބަދަލެއް ކަމަށް އިޚްލާޞްތެރިކަމާއެކު ނިޔަތްގަންނާށެވެ. މީހަކަށް ދެއްކުމަކަށް ނޫނެވެ.

ފާފަ ފުއްސެވުން އެދުން:

ތެދުވެރިކަމާއެކު ތައުބާވާށެވެ. ކުރެވުނު ކަންކަމާ ދެރަވެ، ފާފަތައް ވަގުތުން ހުއްޓާލައި، ދެން އެކަމަށް އެނބުރި ނުދިއުމަށް ޢަޒުމް ކަނޑައަޅާށެވެ.
ނަމާދު:

ނަމާދަކީ މުސްލިމުންނާއި ޣައިރު މުސްލިމުންނާ ވަކިކުރުވާ ހިތަށް ހަމަޖެހުން ގެނުވާ އަޅުކަމެކެވެ. ތިބާގެ ނަމާދުތައް ރަނގަޅު ކޮށްލާށެވެ. އޭރުން ދިރިއުޅުން އަމިއްލައަށް ހަމަޔަކަށް އެޅިގެންދާނެއެވެ. ޤިޔާމަތް ދުވަހުން އެންމެ ފުރަތަމަ ސުވާލު ކުރެވޭނީވެސް ނަމާދާ މެދުގައެވެ.

އެކުވެރިންގެ ސަބަބުން ތިމާގެ އުޅުމާއި ގުޅުމަށް ގިނަ ގުނަ ބަދަލު ތަކެއް އާދެއެވެ. ތިބާއަށް އާޑަ ފުރައްސާރައާއި މަލާމާތްކުރާ މާހައުލެއްގައި ހުރެގެން އެއްވެސް ކަމަކުން ޝިފާއެއް ނުހޯދޭނެއެވެ. ފާފައަށް ވާގިދޭ އެކުވެރިންނާ ދުރުވެ، އާޚިރަތް ހަނދާންކޮށްދޭ މީހުންނާ ގާތްވާށެވެ. ނަތީޖާ ފެންނާއެވެ.

ދުޢާއަކީ މުއުމިނުންގެ ޙަތިޔާރެވެ. ހިތަކީ އަބަދުވެސް ބަދަލުވަމުންދާ އެއްޗެކެވެ. އެހެންކަމުން ގިނަގިނައިން މި ދުޢާ ކުރާށެވެ

"يَا مُقَلِّبَ الْقُلُوبِ ثَبِّتْ قَلْبِي عَلَى دِينِكَ" (އޭ ހިތްތައް ފުރޮޅުއްވާ ރަސްކަލާކޮ! މިއޅާގެ ހިތް އިބަރަސްކަލާނގެ ދީން މަތީގައި ސާބިތުކޮށްދެއްވާނދޭވެ!)
މި ލިޔުން ކިޔަމުންދާއިރު ތިބާގެ ނޭވާ ހިނގަހިނގާ ހުރިނަމަ، ތައުބާގެ ދޮރު ވަނީ ހުޅުވިގެންނެވެ. އިރު ހުޅަނގުން އަރައިފައެއް ނުވެއެވެ. އަދި ނޭވާ ހޮޅިއަށް އެޅިފައެއްވެސް ނުވެއެވެ.

ﷲ ގެ މަގަށް އެނބުރި ދިއުމަށް "މާ ރަނގަޅު ވަގުތަކަށް" އިންތިޒާރު ނުކުރާށެވެ. މާދަމާ ލިބޭނެކަމުގެ ޔަޤީންކަމެއް އެއްވެސް މީހަކަށް ނެތެވެ. މި ބަދަލަކީ އެއްރެއިން މަލާއިކަތަކަށް ވުމެއް ނޫނެވެ. އެއީ ﷲ އާ ދުރަށް ދިއުމުގެ ބަދަލުގައި، އެކަލާނގެ ރުހިވޮޑިގަތުން ހޯދުމަށް މަސައްކަތް ފަށައިގަތުމެވެ.މާތް ﷲ ތިބާގެ މި ފެށުމަކީ ބަރަކާތްތެރި ފެށުމެއް ކަމުގައި ލައްވައި، ފާފަތައް ފުއްސަވައި، އުފާވެރި މުސްތަޤްބަލެއް މިންވަރު ކުރައްވާށިއެވެ. އާމީން.