އެމެރިކާގެ ރައީސް ޑޮނަލްޑް ޓްރަމްޕްގެ ވެރިކަން ނިމިގެންދާނީ ތާރީޚުގައި ފެނިގެންދިޔަ އަނިޔާވެރި ލީޑަރުން ކަމަށްވާ ފިރުއައުނާއި ނަމްރޫދަށް ކުރިމަތިވި ފަދަ ހިތްދަތި ނިމުމަކުން ކަމަށް އީރާނުގެ ރޫހާނީ މަތީ ވެރިޔާ އާޔަތުﷲ އަލީ ޚާމަނާއީ ވިދާޅުވެއްޖެއެވެ.

އީރާނުގެ ވެރިރަށް ތެހެރާންގައި ބޭއްވި ޚާއްޞަ ރަސްމިއްޔާތެއްގައި ވާހަކަފުޅު ދައްކަވަމުން ޚާމަނާއީ ވިދާޅުވީ، ބާރާއި ނުފޫޒުގެ ބޭނުންކޮށްގެން ދުނިޔޭގެ ނިކަމެތި ގައުމުތަކުގެ މައްޗަށް ގަދަވެގަންނަން މަސައްކަތްކުރާ ކޮންމެ މީހަކަށްވެސް އޮތީ އިލާހީ ގާނޫނުގެ ތެރެއިން އަންނަ ހައްގުވެގެންވާ ނިމުން ކަމަށެވެ. މި މޭރުމުން ވާހަކަ ދައްކަވަމުން އޭނާ ވަނީ ޓްރަމްޕްގެ ސިޔާސަތުތަކަކީ "ބާތިލު" އަދި "އަނިޔާވެރި" ސިޔާސަތުތަކެއްގެ ގޮތުގައި ސިފަކުރައްވާފައެވެ.

"ތާރީޚުން އަހަރެމެންނަށް ފެންނަން އެބައޮތް ފިރުއައުނާއި ނަމްރޫދު ފަދަ ބާރުގަދަ ވެރިންނަށް ވީގޮތް. އެމީހުންގެ ކިބުރުވެރިކަމާއި ބޮޑާކަން އެމީހުން ހަލާކުގެ ތެރެއަށް ވައްޓާލި. ޓްރަމްޕްގެ ނިމުންވެސް ފެންނާނީ އެފަދަ ގޮތަކަށް،" ޚާމަނާއީ ވިދާޅުވިއެވެ.

އީރާނާއި އެމެރިކާގެ ގުޅުން މިފަހަކަށް އައިސް އިންތިހާއަށް ގޯސްވެފައިވާއިރު، މި ނުތަނަވަސްކަން ބޮޑުވީ 2015 ވަނަ އަހަރުގެ ނިއުކްލިއަރ އެއްބަސްވުމުން އެމެރިކާ ވަކިވެ، އީރާނާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އެޅުމާ ގުޅިގެންނެވެ. މީގެ އިތުރުން، ޓްރަމްޕްގެ އަމުރަށް އީރާނުގެ ގުދުސް ފޯސްގެ ކޮމާންޑަރު ގާސިމް ސުލައިމާނީ އަވަހާރަކޮށްލުމަކީ ދެ ގައުމުގެ ދެމެދުގައި އޮތް ރުޅިވެރިކަން އަލިފާނަށް ދަރު އެޅުން ފަދަ ކަމަކަށް ވެގެންދިޔަ ކަމެކެވެ.

ޚާމަނާއީގެ މި ވާހަކަފުޅުތަކުން ދޭހަވަނީ، އެމެރިކާގެ ފިއްތުންތަކާ ކުރިމަތިލުމުގައި އީރާނުން ގެންގުޅޭ ހަރުކަށި ދޫނުދިނުމުގެ ސިޔާސަތު ކުރިއަށް އޮތް ތަނުގައިވެސް ވަރުގަދަވާނެ ކަމެވެ.