ހަނދުގެ އަލިކަމުގައި، ތަރި ތަކުގެ އުޖާލާ ކަމުގައި، ރޭގަނޑުގެ ހިމޭން ކަމުގައި އަޅުގަނޑުމެންގެ ހަށިގަނޑު އަރާމަށް ދަތުރު ކުރާއިރު، އަޅުގަނޑުމެންގެ ސިއްޙަތަށް ވަރަށް މުހިންމު އެއް ކަމެއް އެބައޮތެވެ.

އެއީ ރޭގަނޑު ނިދުމުގެ ކުރިން ކިރު ތައްޓެއް ބުއިމެވެ. މި އާދަކާދައިގެ މުހިންމުކަން ދިރާސާ ތަކުން ދައްކުވައިދޭ ހިނދު، އަޅުގަނޑުމެންގެ ކާބަފައިންވެސް މިކަމުގެ މުހިންމުކަން ދަނެތިބިކަން އެއީ ފެންނާން އޮތް ކަމެކެވެ. އާދެ، ކޮންމެ ރެއަކު ނިދުމުގެ ކުރިން ކިރު ތައްޓެއް ބުއިމަކީ އަޅުގަނޑުމެންގެ ސިއްޙަތު ދުޅަހެޔޮކަން މަތީ ބެހެއްޓުމަށް ކުރެވޭނެ ވަރަށް ރަނގަޅު އިންވެސްޓްމަންޓެކެވެ.

ކިރުން ލިބޭ ބައެއް ފައިދާ:

1- ރޭގަނޑުގެ ނިދި ރަނގަޅުކޮށް ދިނުން

ނިދުމުގެ ކުރިން ކިރު ބުއިމުން ލިބޭ އެންމެ ބޮޑު އެއް ފައިދާއަކީ ނިދި ރަނގަޅުވުމެވެ. ކިރުގައި ޓްރިޕްޓޮފާން ކިޔާ އެމިނޯ އެސިޑެއް އެކުލެވިގެންވެއެވެ. މި މާއްދާއަކީ ސެރޮޓޮނިން އަދި މެލަޓޮނިން އުފެއްދުމަށް ބޭނުންވާ މާއްދާއެކެވެ. މި ދެ ހޯމޯނަކީ ނިދި ކޮންޓްރޯލް ކުރުމާއި ނިދުމަށް އެހީތެރިވެދޭ ހޯމޯނެވެ. އެހެން ކަމުން، ނިދުމުގެ ކުރިން ކިރު ބުއުމުން ފުން އަދި އާރާމު ނިންޖެއް ލިބުމަށް މަގުފަހިވެއެވެ.

2- ހަށިގަނޑުގެ ކަށިތައް ވަރުގަދަކޮށް ދިނުން

ކިރަކީ ކެލްސިއަމްގެ މުއްސަނދި މަސްދަރެކެވެ. ކޮންމެ ރެއަކު ނިދުމުގެ ކުރިން ކިރު ބުއިމުން ހަށިގަނޑަށް ބޭނުންވާ ކެލްސިއަމް ލިބެއެވެ. މިއީ ކަށިތައް ވަރުގަދަކޮށް، އޮސްޓިއޯޕޮރޯސިސް ފަދަ ބަލިތަކުން ރައްކާތެރިވުމަށް އެޅޭ މުހިންމު ފިޔަވަޅެކެވެ. ޚާއްސަކޮށް ކުޑަކުދިންނާއި މުސްކުޅިންނަށް މިކަމުގެ ފައިދާ ބޮޑުވެއެވެ.

3- މަޑުމައިތިރިކަމާއި ސުކޫނު

ދުވަހުގެ މަސައްކަތްތަކާއި ކަންބޮޑުވުން ތަކުގެ ތެރޭގައި އަޅުގަނޑުމެން ވަރުބަލިވެ ކަންބޮޑުވާން އެކަށީގެންވެއެވެ. ނަމަވެސް، ނިދުމުގެ ކުރިން ފޮނި، ހޫނު ކިރު ތައްޓެއް ބުއިމުން ހަށިގަނޑަށް އަރާމާއި ހިތްހަމަޖެހުން ލިބެއެވެ. މިއީ ނަފްސާނީ ގޮތުންވެސް ވަރަށް މުހިންމު ކަމެކެވެ. ސްޓްރެސް މަދުވެ، ހިތްހަމަޖެހިލައިގެން ނިދާލުމަށް މަގުފަހިވެއެވެ.

5- ހަކުރުގެ މިންވަރު ހިފަހައްޓާ ދިނުން

ކިރުގައި އެކުލެވޭ ޕްރޮޓީނާއި ފެޓް، ލޭގައި ހުންނަ ހަކުރުގެ މިންވަރު އެއްވަރެއްގައި ހިފެހެއްޓުމަށް އެހީތެރިވެދެއެވެ. މިއީ ޑައިބެޓީޒް ބައްޔަށް މަގުފަހިވިޔަ ނުދިނުމަށް އެޅޭ މުހިންމު ފިޔަވަޅެކެވެ. އަދި ނިދުމުގެ ތެރޭގައި ލޭގައި ހުންނަ ހަކުރުގެ މިންވަރު ދަށްވެ، ނިދިން ހޭލާއިރު ބަނޑުހައިވެފައި ހުރުމުން ސަލާމަތްވެވެއެވެ.

6- ހަށިގަނޑު ބިނާކުރުން

ކިރުގައި އެކުލެވޭ  ޕްރޮޓީނަކީ ހަށިގަނޑުގެ ސެލްތައް އާކޮށް، މަރާމާތު ކުރުމަށް ބޭނުންވާ މާއްދާއެކެވެ. ނިދުމުގެ ކުރިން ކިރު ބުއިމުން، ނިދާފައި ހޭލާއިރު ހަށިގަނޑު އާރާސްތުވެފައި ހުރެއެވެ. މިއީ ކުޅިވަރުކުޅޭ މީހުންނަށާއި، ދުޅަހެޔޮ ސިއްޙަތެއްގައި ހުންނަން ބޭނުންވާ ކޮންމެ މީހަކަށްވެސް މުހިންމު ކަމެކެވެ.

ޚުލާޞާކޮށް ދަންނަވާ ނަމަ، ކޮންމެ ރެއަކު ނިދުމުގެ ކުރިން ކިރު ތައްޓެއް ބުއިމަކީ ކުޑަ  ކަމެއްހެން ހީވިޔަސް، އޭގެ ފައިދާ ވަރަށް ބޮޑެވެ. ނިދި ރަނގަޅުވެ، ކަށިތައް ވަރުގަދަވެ، ސުކޫނާއި މަޑުމައިތިރިކަން ލިބި، ހަކުރުގެ މިންވަރު ބެލެހެއްޓި، ހަށިގަނޑު ބިނާވެގެން ދިއުމަކީ އެކަމުން ލިބޭ މަތިވެރި ފައިދާތަކެވެ.

އެހެން ކަމުން، މީގެފަހުން ކޮންމެ ރެއަކުވެސް ނިދުމުގެ ކުރިން ކިރު ތައްޓެއް ބުއިމަށް އާދަކުރާށެވެ. ފަހަރެއްގައި މިއީ ތިބާގެ ޞިއްޙަތަށް ކުރެވޭ އެންމެ މުހިންމު އިންވެސްޓްމަންޓް ކަމުގައި ވެދާނެއެވެ.