މާތްﷲ ފޮނުއްވި އެންމެހައި ނަބިއްޔުންނާއި ރަސޫލުންނަކީ އިންސާނިއްޔަތަށް ހުރި އެންމެ އަލިގަދަ ނޫރެވެ. އެބޭކަލުންގެ ހަޔާތްޕުޅަކީ ހަމައެކަނި ތާރީޚީ ވާހަކަތަކެއް ނޫނެވެ. އެއީ މިއަދުގެ އުނދަގޫ އަދި ގޮންޖެހުންތައް ގިނަ ދުނިޔޭގައި އަޅުގަނޑުމެން ދިރިއުޅުން ބައްޓަންކުރާނެ ގޮތުގެ ފުރިހަމަ މަގުޗާޓެކެވެ. މާތްﷲ ކީރިތި ގުރުއާނުގައި ވަޙީ ކުރައްވާފައިވެއެވެ:

"لَقَدْ كَانَ فِي قَصَصِهِمْ عِبْرَةٌ لِّأُولِي الْأَلْبَابِ" (ޔޫސުފް: 111)

މާނައީ: "ހަމަކަށަވަރުން، އެބޭކަލުންގެ ވާހަކަތަކުގައި ބުއްދީގެ އަހުލުވެރިންނަށް އިބުރަތެއްވާކަން ކަށަވަރެވެ."

މިއަދުގެ ދިރިއުޅުމުގައި އަޅުގަނޑުމެންނަށް ނަބިއްޔުންގެ ހަޔާތްޕުޅުން ލިބިގަނެވޭނެ މުހިންމު ފިލާވަޅުތަކުގެ ތެރޭގައި:

1. ކެތްތެރިކަމާއި އުއްމީދު (އައްޔޫބު އަލައިހިއްސަލާމް)

އައްޔޫބު އަލައިހިއްސަލާމަކީ ކެތްތެރިކަމުގެ ލާމަސީލު މިސާލެކެވެ. އެކަލޭގެފާނަށް ދިގު މުއްދަތަކަށް ނުރައްކާތެރި އާލާސްކަންފުޅެއް ޖެހިވަޑައިގެން، މުދަލާއި އާއިލާ ގެއްލިވަޑައިގަތެވެ. ނަމަވެސް، މާތްﷲގެ ރަޙްމަތުން އުއްމީދު ކަނޑުއްވައެއް ނުލައްވައެވެ. ބަލިމަޑުކަމާއި، މާލީ ދަތިކަމާއި، ސިކުނޑީގެ ނުތަނަވަސްކަން މިއަދު އާންމުވެފައިވާއިރު، އައްޔޫބު އަލައިހިއްސަލާމްގެ ހަޔާތްޕުޅުން ދަސްވަނީ ކޮންމެ ބޮޑު އުނދަގުލަކަށްފަހު ފަސޭހައެއްވާނެކަމެވެ. ކެތްތެރިވެ، ދުޢާކުރުމުގައި ދެމިތިބުމުގެ މުހިންމުކަމެވެ.

2. ދަތި އުނދަގޫ ވަގުތުތަކުގައި ވަކީލު ކުރުން (އިބްރާހީމް އަލައިހިއްސަލާމް)

އިބްރާހީމް އަލައިހިއްސަލާމް އަލިފާންގަނޑުގެ ތެރެއަށް އެއްލައިލެވުނު ވަގުތުވެސް، އެކަލޭގެފާނު ސާބިތުކަމާއެކު ވިދާޅުވީ "حَسْبُنَا اللَّهُ وَنِعْمَ الْوَكِيلُ" (ތިމަންމެންނަށް މާތްﷲ ފުދެއެވެ. އަދި ވަކީލުކުރެވޭ ފަރާތުގެ މޮޅުކަމާއެވެ)

މުސްތަގުބަލާމެދު ބިރުގަތުމާއި، ވަޒީފާގެ ނުވަތަ ދިރިއުޅުމުގެ ނައު ނުހަނު ގަދަ ކަނޑެއްގައި މި ޒަމާނުގައި ދުއްވަމުން ގެންދާއިރު، އިބްރާހީމް އަލައިހިއްސަލާމްގެ ދުޢާއިން ދަސްވަނީ އަޅުގަނޑުމެންގެ ކުޅަދާނަކަން ހުރި މިންވަރަކުން މަސައްކަތްކުރުމަށްފަހު، ނަތީޖާ މާތްﷲއަށް ވަކީލުކުރުމުގެ މުހިންމުކަމެވެ.

3. މާފުކުރުމާއި ހިތްހެޔޮކަން (ޔޫސުފް އަލައިހިއްސަލާމް)

ޔޫސުފް އަލައިހިއްސަލާމަށް އެކަލޭގެފާނުގެ އެއްބަނޑުއެއްބަފާ ބޭބޭފުޅުންގެ ފަރާތްޕުޅުން އަނިޔާއާއި ހަސަދަވެރިކަން ކުރިމަތިވެ، ވަޅަށް އެއްލައިލެވުނެވެ. ނަމަވެސް، ފަހުން މިޞްރުގެ ވެރިކަން ލިބިވަޑައިގަތުމުން، އެ ބޭބޭފުޅުންނަށް މާފުކުރައްވައި ވިދާޅުވީ، "މިއަދު ތިޔަބޭފުޅުންގެ މައްޗަށް އެއްވެސް މަލާމާތެއް، އަދި ކުށެއް ނެތެވެ."

އަޅިގަނޑުމެންގެ އާއިލީ ގުޅުންތައް ހީނަރުވެ، ބަދަލުހިފުމުގެ ރޫޙު ބޮޑުވެފައިވާ މުޖުތަމަޢެއްގައި، ޔޫސުފް އަލައިހިއްސަލާމްގެ މާފުކުރެއްވުމުގެ މާތް ސިފައަކީ ހިތަށް ހަމަޖެހުން ހޯދައިދީ، ގުޅުންތައް ބަދަހިކުރުމަށް އޮތް އެންމެ ރަނގަޅު މަގެވެ.

4. ޙިކުމަތްތެރިކަމާއި އޯގާތެރިކަމާއެކު ނަސޭހަތްދިނުން (ނޫޙު އަލައިހިއްސަލާމް)

ނޫޙު އަލައިހިއްސަލާމް 950 އަހަރު ވަންދެން އެކަލޭގެފާނުގެ ގައުމުގެ މީހުންނަށް ދީނަށް ގޮވާލެއްވިއެވެ. އެކަލޭގެފާނު ދައުވަތު ދެއްވީ ރޭގަނޑާއި ދުވާލު، ސިއްރާއި ފާޅުގައި، އޯގާތެރިކަމާއެކުގައެވެ.

މިކަމުން ލިބޭ ޢިބުރަތަކީ އެހެން މީހުންނަށް ނަސޭހަތްދިނުމާއި، ދަރިންނަށް ތަރުބިއްޔަތު ދިނުމުގައި ކެތްތެރިކަމާއި އޯގާތެރިކަން އިސްކުރުމުގެ މުހިންމުކަމެވެ. ރުޅިވެރިކަމުގެ ބަދަލުގައި ހިކުމަތްތެރިކަން އިސްކުރުމަކީ ކާމިޔާބީގެ ތަޅުދަނޑިއެވެ.

5. ފުރިހަމަ އަޚްލާޤާއި އޯގާތެރިކަން (މުޙައްމަދު ނަބިއްޔާ ﷺ)

އަޅުގަނޑުމެންގެ މާތް ނަބިއްޔާ މުޙައްމަދު ﷺ އަކީ އެންމެހައި ނަބިއްޔުންގެ އިމާމެވެ. އެކަލޭގެފާނުގެ ހަޔާތްޕުޅަކީ ތެދުވެރިކަމާއި، އަމާނާތްތެރިކަމާއި، އާއިލާއަށް އޯގާތެރިވުމާއި، މުޖުތަމަޢުގެ އެންމެންނަށް އޯގާތެރިވުމުގެ ފުރިހަމަ ނަމޫނާއެކެވެ.
ވިޔަފާރީގައާއި، މަސައްކަތުގެ މައިދާނުގައާއި، ގޭތެރޭގެ ދިރިއުޅުމުގައި ތެދުވެރިކަމާއި ރީތި އަޚްލާޤު އިސްކުރުމަކީ ދުނިޔެއާއި އާޚިރަތުގެ ކާމިޔާބީ ލިބޭނެ މަގެކެވެ.

ނަބިއްޔުންގެ ހަޔާތްޕުޅުން ލިބޭ އިބުރަތްތަކަކީ ހަމައެކަނި ކިޔައިލާ ވާހަކަތަކެއްގެ ގޮތުގައި ބެހެއްޓުމުގެ ބަދަލުގައި، އަޅުގަނޑުމެންގެ އާންމު ދިރިއުޅުމުގެ ކޮންމެ ކަމެއްގައިވެސް އެ ފިލާވަޅުތައް ޢަމަލީގޮތުން ބޭނުންކުރުން މުހިންމެވެ. ކަންކަމުގައި ކެތްތެރިވެ، މާތްﷲއަށް ވަކީލުކޮށް، މީހުންނަށް މާފުކޮށް، ރީތި އަޚްލާޤުން ޒީނަތްތެރިވުމަކީ މިއަދުގެ ދިރިއުޅުމަށް އުފާވެރިކަމާއި ހަމަޖެހުން ގެނެސްދޭނެ ކަންކަމެވެ.