އެގޮތުން، ޗައިނާއަށް މިސާލު ނަންގަވައި ޒަމީރު ވިދާޅުވީ ރާއްޖޭގެ އުފެއްދުންތައް މުޅި ޗައިނާއަށް ޑިއުޓީއަކާއި ނުލައި އެކްސްޕޯޓް ކުރެވޭނެ ކަމަށެވެ. އެފްޓީއޭގެ އެއްބަސްވުން އެކުލަވާލުމަށް، ޗައިނާ، އިންޑިއާ، އިނގިރޭސިވިލާތް އަދި ތުރުކިއޭ އާއި އެކު މަޝްވަރާކުރުމަށް ނިންމާފައިވާއިރު، ޑިއުޓީއަކާ ނުލައި އިންޑިއާއަށް ރާއްޖޭގެ ވެލިއު އެޑެޑް ޕްރޮޑަކްޓްސް އެތެރެކުރެވުނަސް ވަރަށް ބޮޑު މާކެޓެއް ލިބިގެންދާނެ ކަމަށް ޒަމީރު ވިދާޅުވި އެވެ.
"ރާއްޖޭގެ ޓޫނާއާއި ވެލިއު އެޑެޑް ޕްރޮޑަކްޓްސް އިންޑިއާގެ މާކެޓަށް ލިބުނުކަމުގައި ވިޔަސް އިންޑިއާއަށް ޓެރިފް ނެތި އަޅުގަނޑުމެންނަށް އިމްޕޯޓު ކުރެވޭނެ މެކޭނިޒަމް އެއް އަޅުގަނޑުމެންނަށް ރޭވިއްޖިއްޔާވެސް ވަރަށް ބޮޑު މާކެޓެއް އަޅުގަނޑުމެންނަށް ހުޅުވިގެންދާނެ. އިންޑިއާއަކީ ރާއްޖެއާއި އެންމެ ގާތް ގުޅުމެއް އޮންނަ އަޅުގަނޑުމެންނަށް ދަތިވާ ކޮންމެ ފަހަރަކު އަބަދުވެސް އަޅުގަނޑުމެން އެގައުމަކަށް އަބަދުވެސް ޑިޕެންޑް ވާ ގައުމު. އެހެން ވީމައި އަޅުގަނޑުމެންނަށް ވަރަށް ބޮޑު ކުރިއެރުމެއް ލިބިގެންދާނެ"، ހާރިޖީ ވަޒީރު މޫސާ ޒަމީރު ވިދާޅުވިއެވެ.
ޒަމީރު ވިދާޅުވީ، ފޮރިން ސާރވިސްގައި ތިބި ތަޖުރިބާކާރު ޑިޕްލޮމެޓުން އެކި ގައުމުތަކާއި ބައްދަލުކޮށް އެފްޓީއޭގެ މަޝްވަރާ ކުރަމުންދާ ކަމަށެވެ. އެބޭފުޅުންނަކީ ރައިސް ދެއްވާ އިރުޝާދާއި އެއްގޮތަށް މަސައްކަތް ކުރާ ވަރަށް ގާބިލު ޓީމެއް ކަމަށާއި ރައީސްގެ ލަނޑުދަނޑިތައް ހާސިލުކުރުމަށް އިންޑިއާއާއި ތުރުކިއޭ އަދި އިނގިރޭސިވިލާތާއި އެކުވެސް މަޝްވަރާކޮށް ބޮޑެތި ކުރިއެރުންތައް ލިބެމުން އަންނަ ކަމަށް ވިދާޅުވިއެވެ.
