ސެޕްޓެންބަރު، 28، 2022 ވަނަ ދުވަހުގެރޭ ވިލިމާލެއިން ފުރި ތެޔޮ ބޯޓުން ގެއްލުނު ބަންގްލަދޭޝްގެ މުހައްމަދު ލިޓަން 35އ ގެ މަރުގެ މައްސަލައިގައި ގދ. ތިނަދޫ، މަނާރު، މުހަައްމަދު ނިޒާމު 45އ، ގެ މައްޗަށް ކުރާ ދައުވާ ތަކުގައި، ލިޓަން މަރައިލީ ފައިސާގެ ބޭނުމުގައި މޫދަށް ވައްޓާލައިގެން ކަމަށް ދައުލަތުން ތުހުމަތު ކޮށްފިއެވެ.

ލިޓަންގެ މަރުގެ މައްސަލައިގައި ގަސްތުގައި މީހަކު މެރުމުގެ ދައުވާ ހިމެނޭހެން ތިން ދައުވާއެއް ނިޒާމުގެ މައްޗަށް ދައުލަތުން ވަނީ އުފުލައިފައެވެ. އޭގެތެރޭގައި ހިމެނެނީ ގަސްތުގައި މީހަކު މެރުމުގެ އިތުރުން ވައްކަމާއި މަސްތުވާތަކެތީގެ މުއާމަލާތު ކުރުމުގެ ކުށުގެ ދައުވާއެވެ.

ކުރިމިނަލް ކޯޓުގައި މިއަދު ބޭއްވި އަޑުއެހުމުގައި މައްސަލަ ހުށަހަޅުއްވަމުން ދައުލަތުގެ ވަކީލާ ވިދާޅުވީ، ލިޓަން ބޯޓުގައި ހުއްޓާ މަރާލީ، ކ. ގަލުފަޅު ކިޔާ ސަރަހައްދުން އޭނާ ކޮށްޕައި މޫދަށް ވައްޓާލައިގެން ކަމަށެވެ. އެއީ ފައިސާގެ ބޭނުމުގައި ނިޒާމް ކުރިކަމެއް ކަމަށް ވަކީލާ ވިދާޅުވިއެވެ.

އެއަށްފަހު އެ ބޯޓުގައި ހުރި ލިޓަންގެ 51،000 ރުފިޔާ ނިޒާމް ވަގަށް ކަމަށާއި، އޭނާގެ މައްޗަށް ވައްކަމުގެ ދައުވާ ކުރަނީ އެ މައްސަލައިގައި ކަމަށްވެސް ވިދާޅުވިއެވެ. އަދި ނިޒާމުގެ މައްޗަށް ޑައިމޯފިނުން މުއާމަލާތް ކުރުމުގެ ދައުވާ ކުރަނީ އޭނާ ދިރިއުޅު ކޮޓަރިން މަސްތުވާތަކެތި ފެނުމުން ކަމަށްވެސް ވަކީލާ ވިދާޅުވިއެވެ.

ލިޓަން އާއި ނިޒާމު އެކަނި ދަތުކުރި އެ ތެޔޮ ބޯޓުން އެދެމީހުން ގެއްލިގެން ހޯދަމުން ހޯދަމުން ދާކަން ފުލުހުން އާއްމު ކުރީ އެ މަހުގެ 30 ވަނަ ދުވަހުގެ ރޭގެވަގުތެއްގައެވެ. އެ ދެމީހުން ހޯދުމަށް ފުލުހުން މާލެތެރެވެސް ބަލަމުން އަންނަނިކޮށް، ނިޒާމު ފެނުނީ ޖެނުއަރީ ތިން ވަނަ ދުވަހުގެ ވަގުތެއްގައި މާލޭގައި ހުރި ގެސްޓް ހައުސްއަކުން ކަމަށް ފުލުހުން ބުންޏެވެ.

ލިޓަން އަދިވެސް ފެނިފައިނުވާއިރު، މަރުވެފައިވާ މީހެއްގެ ހަށިގަނޑެއް ޖެނުއަރީ މަހުގެ ދެވަނަ ދުވަހު ވަނީ ވ. ވެމްޕަރު ފަޅުން ފެނިފައެވެ. ނަމަވެސް އެއީ ލިޓަންގެ ހަށިގަނޑު ނޫންކަން ޑީއެންއޭ އެނަލިސިސްއިން ވަނީ ހާމަވެފައެވެ.

މިއީ ހަށިގަނޑު ނުފެންނަނީސް އެ މީހާ މަރާލި ކަމަށް ބުނެ ރާއްޖޭގައި މަރުގެ ދައުވާއެއް ކުރާ ފުރަތަމަ ފަހަރެވެ.

މިއަދުގެ އަޑުއެހުމުގައި ނިޒާމު ވަނީ ދައުވާތަކަށް އިންކާރު ކޮށްފައެވެ.