ސަރުކާރުގެ އެކި މަޤާމުތަކުގައި ތިބި ޖުމްހޫރީ ޕާޓީގެ ބޭފުޅުން މަޤާމުތަކުން ވަކިވާންޖެހޭނަމަ، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުވެސް މަޤާމުން އިސްތިއުފާ ދެއްވަންޖެހޭކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ކުރިއަށް އޮތް ރިޔާސީ އިންތިހާބަށް ޖުމްހޫރީ ޕާޓީން ކެންޑިޑޭޓަކު ނެރެން ނިންމި ނިންމުމާއި ގުޅިގެން އެމްޑީޕީގެ މަޖިލިސް މެމްބަރުންގެ ތެރެއިން ރައީސް ޞާލިހަށް ތާއީދު ކުރާ ބައެއް މެމްބަރުން ވަނީ ޖުމްހޫރީ ޕާޓީގެ ސްލޮޓްގައި ހިމެނޭ ބޭފުޅުން މަޤާމުން އިސްތިއުފާ ދިނުމަށް މިއަދު މަޖިލީހުގައި ގޮވާލާފައެވެ. އަދި އިސްތިއުފާ ނުދޭނަމަ މަޤާމުތަކުން ވަކިކުރުމަށްވެސް މެމްބަރުން ވަނީ ގޮވާލާފައެވެ.
މިވާހަތަކާއި ގުޅިގެން ޤާސިމް ވިދާޅުވީ ޖޭޕީން ސަރުކާރު ކޯލިޝަންގައި މަސައްކަތް ކުރަނީ އެއްބަސްވުމެއް އޮވެގެންކަމަށެވެ. މިއެއްބަސްވުމުގެ ތެރެއިން މިހާތަނަށް އަމަކު ކުރެވިފައިވަނީ ކިހާ މިންވަރަކަށްތޯ ބަލައިލުމަށްވެސް ޤާސިމް ވަނީ އެދިފައެވެ.
ނިކަން ބައްލަވާނ އަހުދުވެ ވައުދުވީ ވަރަށް ކަންތައް ކުރެވުނީ. ލަދުވެތިކަމެއް އިސްތިއުފާ ދޭން ގޮވުމަކީ. އަޅުގަނޑުމެން ނޮވެމްބަރު 18 އާއިހަމައަށް ދެމި އޮންނާނެ. އެނޫން ގޮތަކަށް އެކަން ކުރާނަމަ ރައީސް ޞާލިހުވެސް ޖެހޭނީ އިސްތިއުފާ ދެއްވަން.
– ޤާސިމް ވިދާޅުވިއެވެ.
ޤާސިމް ވިދާޅުވީ 2018 ވަނަ އަހަރު ރިޔާސީ އިންތިޚާބުގައި ޖޭޕީން ކުރި މަސައްކަތަށް ދިން އެއްޗެއް ދީފައިވަނީ އެއްބަސްވުމެއްގެ ތެރެއިންކަމަށެވެ. އެއެއްބަސް ވުމުގަިއ ޖޭޕީން ރިޔާސީ އިންތިޚާބުގައި ވާދަކުރަން ނިންމުމުން މަޤާމުތަކުން މީހުން ވަކިވާން ޖެހޭކަމަށް ބުނެފައި ނުވާކަމަށެވެ.
މަޤާމުތަކުގައި ތިއްބެވި ބޭފުޅުންނަށް ނޮވެމްބަރު 18ގެ ކުރިން އެއްވެސް ބޭފުޅަކު އިސްތިއުފާ ދީގެން ނުވާނެ. ދައުލަތަށް ޚިދުމަތް ކުރުމުގައި ވަކި ޕާޓީއެއް އިސްތިސްނާ ނުވޭ. އެމީހެއްގެ މަސްއޫލިއްޔަތު އަދާކުރާނަމަ އެއީ ވަކިވާން ޖެހޭ ކަމެއްނޫން.
– ޤާސިމް ވިދާޅުވިއެވެ.
ވެރިކަން ކުރާ ކޯލިޝަންގައި ޖުމްހޫރީ ޕާޓީގެ އެކި މަޤާމުތަކުގައި ގިނަ ބޭފުޅުން އެބަތިއްބެވިއެވެ. އޭގެ ތެރޭގައި ކެބިނެޓް ވަޒީރުންނާއި، ސްޓޭޓް މިނިސްޓަރުންނާއި، ނާއިބުންނާއި، އެނޫންވެސް ގިނަ މަޤާމުތަކުގައި ޖޭޕީގެ ބޭފުޅުން އެބަތިއްބެވިއެވެ.
