ސިއްރު ކަންތައްތަކެއްގެ ތެރެއިން އުފަންކުރާ އެއްބަސްވުމަކަށް އާނއެކޭ ބުނެގެން ނުވާނެ ކަމަށާއި އެމްޑީޕީގެ ސަރުކާރެއްގައި ވެސް އެފަދަ އެއްބަސްވުމަކަށް އަމަލު ކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިރޭ ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ އަބޫދާބީގެ އީގަލް ހިލްސް ކުންފުނިން ރަސްމާލޭގައި ތަރައްގީކުރަން ނިންމާފައިވާ މަޝްރޫއާ ގުޅޭގޮތުން އެމްޑީޕީ ކޮންގްރެސް ފެށުމަށް ބޭއްވި ޖަލްސާގައި ވާހަކަ ދައްކަވަމުންނެވެ.

އެމްޑީޕީގެ ކޮންގްރެސްގައި ވާހަކަ ދައްކަވަމުން ކުރީގެ ރައީސް ސޯލިހު ވިދާޅުވީ، ރަސްމާލެ ތަރައްގީ ކުރުމަށް ފުށިދިއްގަރުފަޅު ހިއްކަނީ ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހަރަދުކޮށްގެން ކަމަށެވެ. އަދި އޭގެ ތެރެއިން 500 ހެކްޓަރުގެ ބިން ހިލޭ ބޭރު ބަޔަކަށް ދިނުމަކީ ސުވާލު އުފެދޭ ކަމެއް ކަމަށް ފާހަގަކުރައްވަމުން، "…ސުވާލަކީ ރައްޔިތުންނަށް މީގެން ވަނީ ކޮން ފައިދާއެއްތޯ؟ ސަރުކާރަށް މީގެން ލިބެނީ ކޮން އެއްޗެއްތޯ؟" މިފަދައިން ސުވާލު އުފެއްދެވި އެވެ. އެމަނިކުފާނު ވިދާޅުވި ގޮތުގައި އެމްޑީޕީން ފޮރިން އިންވެސްޓްމެންޓްތަކާ ދެކޮޅެއް ނޫނެވެ. އަދި އުސޫލުތަކުގެ ތެރެއިން ރެސިޑެންސް ވިސާ ދިނުމަކީ ވެސް މައްސަލައެއް ނޫން ކަމަށާއި މައްސަލައަކީ މި މަޝްރޫއުގެ ތެރޭގައި ނޭނގޭ ކަންތައްތަކެއް ހިނގަމުން ދިއުމެވެ.

މަޝްރޫއުގެ މައުލޫމާތުތައް ހާމަނުކުރާ ނަމަ އެ އެއްބަސްވުން އުވާލުމަށް ސަރުކާރަށާއި އީގަލް ހިލްސްއަށް ކޮންގްރެސްއިން ގޮވާލަން ޖެހޭނެ ކަމަށް ރައީސް ސޯލިހު ވިދާޅުވި އެވެ. "ސިއްރުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދަން ޖާގަ ވެސް ދީގެން ނުވާނެ،" އެމަނިކުފާނު ވިދާޅުވި އެވެ.

ވ. ފޮއްތެޔޮފަޅުގެ ފާޑުކިޔުންތަކަށް ރައްދު

ރަސްމާލެ މަޝްރޫއަށް އެމްޑީޕީން ދެކޮޅު ހަދާތީ ސަރުކާރުގެ ބައެއް ބޭފުޅުން މިދިޔަ ސަރުކާރުގައި ވ. ފޮއްތެޔޮފަޅު ކުއްޔަށް ދިން ގޮތާ މެދު ފާޑުވިދާޅުވެފައިވާތީ އެކަމަށް ވެސް ރައީސް ސޯލިހު ވަނީ ރައްދު ދެއްވައިފަ އެވެ. އެމަނިކުފާނު ވިދާޅުވީ ފޮއްތެޔޮފަޅު ކުއްޔަށް ދޫކޮށްގެން ދައުލަތަށް 43 މިލިއަން ޑޮލަރު ވަދެފައިވާނެ ކަމަށާއި، އެ ފަޅުގައި ޑޮމެސްޓިކް އެއާޕޯޓެއް އެޅުމަށް ބިން ހިއްކާފައިވަނީ އެތަން ކުއްޔަށް ނެގި ކުންފުނީގެ ފައިސާއިން ކަމަށެވެ.

އިތުރަށް ވާހަކަދައްކަވަމުން އެމަނިކުފާނު ވިދާޅުވީ މަޝްރޫއެއް ހިންގާއިރު ބަލަންވާނީ ރައްޔިތުންނާއި ގައުމަށް ކުރާނެ ފައިދާއަށް ކަމަށާއި، ވ. އަތޮޅުގައި އެއާޕޯޓެއް އެޅުމަކީ ގިނަ ރައްޔިތުންތަކަކަށް އޭގެ ފައިދާ ލިބޭނެ ކަމެއް ކަމަށެވެ. އަދި މިދިޔަ ސަރުކާރުން ނ. އަތޮޅުގައި ވެސް އެއާޕޯޓެއް އަޅަން ފަޅެއް ދޫކުރި ނަމަވެސް، މި ސަރުކާރުން އެ މަޝްރޫއު އެސްއީޒެޑްގެ ތެރެއަށް ވައްދައި ޓެކްސް ލުއިތައް ދިނުމުގެ ސަބަބުން ދައުލަތަށް ލިބެން އޮތް އެތައް އާމްދަނީއެއް ގެއްލޭ ގޮތް ހަދާފައިވާ ކަމަށް ވެސް ފާހަގަކުރެއްވި އެވެ.

ރަސްމާލޭގެ މަޝްރޫއުގެ އެއްބަސްވުމާ މެދު ސުވާލު އުފައްދައި، އޭގެ މައުލޫމާތުތައް ވީއެންމެ އަވަހަކަށް ހާމަކުރުމަށް ކުރީގެ ރައީސް މުހައްމަދު ނަޝީދު ވެސް ވަނީ ގޮވާލައްވައިފަ އެވެ. މީގެ އިތުރުން ކުރީގެ ރައީސް އަބްދުﷲ ޔާމީން ވެސް ވަނީ ދެން އުފެދޭ ސަރުކާރެއްގައި އެ އެއްބަސްވުން އުވާލުމަށް ގޮވާލައްވާފަ އެވެ.