ދިވެހިރާއްޖެ އިގްތިސާދީ ގޮތުން ބޮޑު އަނދަވަޅަކަށް ވެއްޓެމުންދާއިރު، އެ ހާލަތަށް ގައުމު ދޫކޮށްލައިގެން އެމްޑީޕީން ނުތިބޭނެ ކަމަށް އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ނަޝީދު ވަނީ މިހާރުގެ ސަރުކާރަށާއި ރައީސް ޑރ. މުހައްމަދު މުއިއްޒުގެ އިގްތިސާދީ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ. އެމަނިކުފާނު ވިދާޅުވީ، މި ސަރުކާރުގައި ރައްޔިތުންނަށް ކަމެއް ކޮށްދިނުމުގެ އެއްވެސް ވިސްނުމެއް އަދި ހިޔާލެއް ވެސް ނެތް ކަމަށެވެ. އަދި ސަރުކާރުގެ ހަމައެކަނި އަމާޒަކީ ރައްޔިތުންނަށް ދޮގުހަދައި، އޮޅުވާލުމާއި މަކަރު ހެދުން ކަމަށް އެމަނިކުފާނު ސިފަކުރެއްވި އެވެ.
ސަރުކާރުގެ އިގްތިސާދީ ސިޔާސަތުތަކާ ގުޅޭގޮތުން ވާހަކަފުޅު ދައްކަވަމުން ނަޝީދު ވިދާޅުވީ، މިއަދު ފެންނަމުންދަނީ އެއްވެސް މީޒާނެއް ނެތް، "ބަތްކައްކާ ކުޅޭ" ފަދަ ލާހޫރޭ ސިޔާސަތުތަކެއް ކަމަށެވެ.
"ބަތްކައްކާ ކުޅުން މީޒާނެއް ނެތް. ލާހޫރޭ އިގްތިސާދީ ސިޔާސަތުތަކެއް މި ދިވެހިރާއްޖެ މިގެންދަނީ ކަނު ބަނދެވިގެން ތިބެ އަނދަވަޅަކަށް ވެއްޓުމަށް. އަޅުގަނޑުމެންނެއް މި ޕާޓީއެއް އެ މަގަށް މި ރާއްޖެ ދިއުމަކަށް ދުލެއް ނުކޮށްލެވޭނެ،" އެމަނިކުފާނު ވިދާޅުވި އެވެ.
ރައީސް ނަޝީދު އިތުރަށް ވިދާޅުވީ، ރާއްޖެ މިހާރު ވެއްޓެމުންދާ އިގްތިސާދީ އަނދަވަޅުން ސަލާމަތްކުރުމަށްޓަކައި ރައީސް މުއިއްޒުގެ ސަރުކާރު ބަދަލުކުރަންޖެހޭ ކަމަށެވެ. އަދި އެމްޑީޕީގެ ވެރިކަމެއް އަލުން އުފައްދައި، ދިވެހި ރައްޔިތުންނަށް އޭގެ ހެޔޮ މަންފާއާއި ހެޔޮ ވެރިކަމެއް ކޮށްދިނުމަށް އެ ޕާޓީން އަބަދުވެސް މަސައްކަތް ކުރާނެ ކަމުގެ ޔަގީންކަން އެމަނިކުފާނު ދެއްވި އެވެ.
