ދީނާއި ޘަޤާފަތާއި ބީރައްޓެހި ޢަމަލުތައް ދިރުވައި އެކަންތަކަށް ހިތްވަރުދިނުމަކީ ޝައިޠާނީ ޢަމަލެއްކަމަށް މަޝްހޫރު ދީނީ ޢިލްމުވެރިޔާ ޑރ.މުޙައްމަދު އިޔާޒް ވިދާޅުވެއްޖެއެވެ.

ޖަރުމަނު ވިލާތުގެ ވެރިރަސް ބާލިންގައި ކުރިއަށްދާ ދުނިޔޭގެ އެންމެ ބޮޑު ޓުއަރިޒަމް ފެއަރ އައިޓީބީގައި ރާއްޖޭގެ ފަރާތުން ދިވެހި ސަޤާފީ އައިޓަމެއްކަމަށްބުނެ ހުށަހެޅި ނެށުމަށް އެތައް ބައެއްގެ ފާޑުކިޔުން އަމާޒުވެފައިވަނިކޮށް ޑރ.އިޔާޒް މިހެން ވިދާޅުވީ ވަކި ކަމަކަށް އިޝާރާތް ނުކޮށް ކުރެއްވި ޓްވީޓެއްގައެވެ.

ޑރ.އިޔާޒް ވިދާޅުވީ ދީނާއި ޘަޤާފަތާއި ބީރައްޓެހި ޢަމަލުތައް ދިރުވުމަކީ އަންހެން ކަނބަލުންގެ ޢިއްފަތާއި ރައްކާތެރިކަމާއިމެދު ހިތުގައި ޛައްރެއްގެ މިންވަރަށްވެސް ޣީރަތްތެރިކަމެއް ހުރިމީހަކު ކުރާނެކަމެއް ނޫންކަމަށެވެ. މިހެން ވިދާޅުވެ ޑރ.އިޔާޒް ޓްވިޓުކުރެއްވީ ސޫރަތުއް ނަމްލުގެ 24ވަނަ އާޔަތާއި އޭގެ މާނަ ޙިއްސާކުރައްވަމުންނެވެ.

އެއާޔަތުގެ މާނާގައިވަނީ "އެކަމަނާއާއި އެކަމަނާގެ ޤައުމުގެ މީހުން، ﷲ ފިޔަވައި އިރަށް ސަޖިދަކޮށް އުޅޭތީ ތިމަން ދުށީމެވެ. އަދި ޝައިޠާނާ އެއުރެންނަށް އެއުރެންގެ ޢަމަލުތައް ޒީނަތްތެރިކޮށް ދެއްކިއެވެ. އަދި ތެދުމަގުން އެއުރެން އެއްކިބާކުރިއެވެ. ފަހެ، އެއުރެންނަކަށް ތެދުމަގެއް ނުލިބެއެވެ."

އައިޓީބީގައި ރާއްޖޭގެ ފަރާތުން ހުށަހެޅީ ޒަމާނީ ހުޅަނގުގެ ޑާންސެކެވެ. އަންގެނުންނާއި ފިރިހެނުން ގައިގޯޅިވެ ހުށަހެޅި އެޑާންސްގައި ދިވެހި ޢާންމު މުޖުތަމަޢާ ބީރައްޓެހި ސްޓެޕްތައް ހިމެނޭނީ ގިނަވަޔަކު ވަނީ ފާޑުކިޔާފައެވެ. އައިޓީވީ ފެއާގައި ދުނިޔޭގެ އެތައް ޤައުމަކުން ބައިވެރިވެއެވެ. ކޮންމެ ޤައުމަކުންވެސް އެފެއާގައި ޕްރޮމޯޓުކުރަނީ އެބައެއްގެ ސަޤާފަތެވެ. ޤައުމުގެ ސަޤާފަތާ ނުގުޅޭ ޒަމާނީ މަސްހުނި އައިޓަމްތަކެއް އެއްވެސް ޤައުމަކުން ހުށަހަޅާތީއެއް ނުފެނެއެވެ.