އޯޓިޒަމާއި އޭޑީއެޗްޑީއާއެކު ވަރަށް ދަތި ހާލުގައި ދިރިއުޅެމުން އަންނަ، މުޙައްމަދު ފައްޔާހް ހަސަން (ދޮންކަލޯ) އާއި އޭނާގެ ބައްޕަ ހަސަން ފަޔާޒު ދިރިއުޅޭނެ ގެއެއް ބިނާކުރުމަށް ޓިކްޓޮކް މެދުވެރިކޮށް ފެށި ލައިވްއާއެކު، މިލިއަނަކަށްވުރެ ގިނަ ރުފިޔާ ހެޔޮ އެދޭ ފަރާތްތަކުން ޖަމާކޮށްދީފިއެވެ.

ދޮންކަލޯއަކީ، އުމުރުން 19 އަހަރުގެ ފައްޔާހަށް އޭނާގެ ބައްޕަ ލޯބިން ކިޔާ ނަމެވެ. ދޮންކަލޯ ދިރިއުޅެމުންދަނީ އޭނާގެ ބައްޕައާއި މާމައާއެކުގައި ބ. ހިތާދޫގައި ވަރަށް ދުވަސްވީ ގެއެއްގައެވެ. ދޮންކަލޯގެ ދިރިއުޅުމާ ގުޅޭ ހާލަތު ފަޔާޒު ޓިކްޓޮކް މެދުވެރިކޮށް ހިއްސާކުރަމުން އަންނައިރު، އެ ވީޑިއޯތަކަށް ގިނަ ބަޔެއްގެ ސަމާލުކަން ވަނީ ލިބިފައެވެ.

ދޮންކަލޯއަކީ 'މަންމަ’އާއި 'ބައްޕަ' ފަދަ ބައެއް ބަސްތައް ކިޔާ ކުއްޖެއް ނަމަވެސް، ރަނގަޅަށް ވާހަކައެއް ނުދެކެއެވެ. ދަރިފުޅު ބެލުމަށްޓަކައި ދޮންކަލޯގެ ބައްޕަ ވަޒީފާ ދޫކޮށްލައި، އެކަމަށް ހުސްވެފައިވާއިރު، އެ އާއިލާ މިހާރު ދިރިއުޅޭ ގޭގެ މާހައުލަކީ ދޮންކަލޯ ދުވެލާނެ ޖާގައެއް ނޯންނަ، ހޫނުގަދަ ބަންދުވެފައިވާ ތަނެއްކަން ފަޔާޒު ފާހަގަކޮށްފައިވެއެވެ.

ދޮންކަލޯއަށް ރަނގަޅު މާހައުލެއް ހޯދައިދިނުމަށްޓަކައި ފަޔާޒު ގެއެއް ރާނަން ފަށައި، މިހާރު އެ ގެ ހިޔާކޮށްފައިވީ ނަމަވެސް، ތަޅުންއެޅުމާއި މުށިޖެހުން ފަދަ ނުނިމި ހުރި މަސައްކަތްތައް ފުރިހަމަ ކުރުމަށް ބޭނުންވެއެވެ. ނަމަވެސް ވަޒީފާއިން ކެނޑުނު ހިސާބުން، ގެ ނިންމުމުގެ މަސައްކަތް ވަރަށް ބޮޑަށް ވަނީ މަޑުޖެހިފައެވެ. ފަޔާޒު ބުނި ގޮތުގައި، އެ އާއިލާއިން މިހާރު ދިރިއުޅެމުން އަންނަނީ ދޮންކަލޯއަށް ލިބޭ އެލަވެންސާއި އޭނާ ކުދިކުދި މަސައްކަތް ކޮށްގެން ލިބޭ ފައިސާއިންނެވެ.

އެހެންވެ، ދިވެހި ޓިކްޓޮކް ކޮމިއުނިޓީން އިސް ނަގައިގެން ފަޔާޒުގެ ގެ އެޅުމުގައި އެހީވުމަށް ލައިވްއެއް ބާއްވައިފައެވެ. ޓިކްޓޮކްގެ ގިނަ ހޮސްޓުންތަކެއް ބައިވެރިވެގެން ކުރިއަށްގެންދިޔަ އެ ލައިވް ފެށިގެން 30 މިނެޓުވީއިރު، 14,000 އަށްވުރެ ގިނަ މީހުން ވަނީ ބައިވެރިވެފައެވެ. ލައިވް ތެރޭގައި ފަޔާޒުގެ ބީއެމްއެލްއާއި އެމްއައިބީ އެކައުންޓަށް ފައިސާ ޖަމާކޮށްފައިވާއިރު، ދަންވަރު އެކެއް ޖެހުމާ ހަމައަށް 1.2 މިލިއަން ރުފިޔާއަށްވުރެ ގިނަ ރުފިޔާ ޖަމާވެފައިވާ ކަމަށް ފަޔާޒު ބުންޏެވެ.

"ވަރަށް އުފާވެއްޖެ، އަހަރެން އުއްމީދެއް ނުކުރަން މިހާވަރު ވާނެ ކަމަށް، މިހާ ހިސާބަށް ދިޔައިމަ އެނގޭ ދިވެހި ރައްޔިތުން އެހީވާން ތައްޔާރަށް ތިބި މިންވަރު، އަޅުގަނޑާއި ދޮންކަލޯގެ ފަރާތުން ވަރަށް ބޮޑަށް ޝުކުރިއްޔާ،" ފަޔާޒު ބުންޏެވެ.

މީގެ އިތުރުންވެސް، ލައިވް ތެރޭގައި ބައެއް ފަރާތްތަކުން ވަނީ އެ ގޭގައި ބޭނުންކުރާނެ ފަރުނީޗަރާއި ބައެއް ތަކެތި ހަދިޔާކުރާނެކަން ހާމަކޮށްފައެވެ. ފާހަގަކޮށްލެވޭ ގޮތުގައި މީގެ ކުރިންވެސް ދިވެހި ޓިކްޓޮކް ކޮމިއުނިޓީން އިސް ނަގައިގެން ހަރަކާތްތައް ބާއްވައި، އެހީ ބޭނުންވާ މީހުންނަށް ފައިސާ ހޯދުމުގައި އެހީ ފޯރުކޮށްދީފައިވެއެވެ.