އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މަޤްޞަދަކީ ހަމައެކަނި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫން ގޮތެއް ހޯދުން ނުވަތަ އެ ޕާޓީގެ ވެރިކަމެއް ޤާއިމުކުރުން ނޫން ކަމަށާއި، އަމާޒަކީ ރައްޔިތުންނަށް ހާސްކަމެއް ނެތް ދިރިއުޅުމެއް ހޯދައިދިނުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާޢީލް ވިދާޅުވެއްޖެއެވެ.

އެމްޑީޕީގެ ކޮންގްރެސް ނިންމުމުގެ ރަސްމިއްޔާތުގައި ވާހަކަދައްކަވަމުން ފައްޔާޒް ވިދާޅުވީ، 2028 ވަނަ އަހަރުގެ ރިޔާސީ އިންތިޚާބު އެމްޑީޕީން ކާމިޔާބުކޮށް، ޤައުމުގެ ނިޒާމަށް ބޮޑެތި ބަދަލުތަކެއް ގެނެސް، ޒުވާނުންގެ އުންމީދުތައް އަލުން އާކޮށްދޭނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ. އަދި ރައްޔިތުންނަށް ލިބެންޖެހޭ ޙައްޤުތަކާއި އިންސާފު ހޯދައިދިނުމަކީ ޕާޓީގެ އެންމެ އިސް ވާޖިބު ކަމުގައިވެސް އޭނާ ފާހަގަކުރެއްވިއެވެ.

"އިރާދަކުރެއްވިއްޔާ މިއުޅެނީ މުއިއްޒު ނޫން ގޮތެއް ހޯދާކަށްވެސް ނޫން، އެމްޑީޕީގެ ވެރިކަމެއް ގެންނާކަށްވެސް ނޫން. އަޅުގަނޑުމެން މި މަސައްކަތް ކުރަނީ ދިވެހި ރައްޔިތުންނަށް ޙައްޤުވާ މިންވަރު ހޯދައިދިނުމަށް، އަދި ރައްޔިތުންނަށް ހާސްކަމެއް ނެތް ދިރިއުޅުމެއް ހޯދައިދިނުމަށް،" ފައްޔާޒް ވިދާޅުވިއެވެ.

މީގެއިތުރުން ފައްޔާޒް ވިދާޅުވީ، އަނިޔާވެރިކަމާއި ޚުދުމުޚުތާރު ވެރިކަމާ ދެކޮޅަށް ދިވެހި ރައްޔިތުންނަށް އޮތް އައްޑަނައަކީ އަބަދުވެސް އެމްޑީޕީ ކަމަށެވެ. އެހެންކަމުން ރައްޔިތުންނަށް ނިކަމެތިކަން ލިބި، ޤައުމު ހަލާކުވަމުންދާ މަންޒަރު ބަލަން އެ ޕާޓީން ފަހަތަށް ނުޖެހޭނެ ކަމަށްވެސް އޭނާ ވިދާޅުވިއެވެ. އަދި ވެރިކަމަކީ ރައްޔިތުންނަށް ޚިދުމަތް ކުރުމަށް އޮންނަ މަޤާމެއް ކަމަށާއި، ވެރިން މާ މާތް ބައެއްގެ ގޮތުގައި ދެކޭ ވިސްނުން ނައްތާލަންޖެހޭ ކަމަށްވެސް ފާހަގަކުރެއްވިއެވެ.

އެމްޑީޕީގެ ކޮންގްރެސްގައި އިއްޔެ ވަނީ ވެރިކަމުގެ ނިޒާމު އިޞްލާޙު ކުރުމާ ގުޅޭ ޤަރާރެއް ފާސްކޮށްފައެވެ. "ބޮޑު ބަދަލު" ގެ ނަމުގައި މި ޤަރާރު ހުށަހެޅުއްވީ ފައްޔާޒް އިސްމާޢީލެވެ. މި ހުށަހެޅުމުގައިވާ އެންމެ މުހިންމު އެއް ކަމަކީ ދަޢުލަތުގެ އެންމެ މަތީ ވެރިޔާ (ހެޑް އޮފް ސްޓޭޓް) އާއި ސަރުކާރުގެ އެންމެ މަތީ ވެރިޔާ (ހެޑް އޮފް ގަވަރމަންޓް) ގެ މަޤާމު ވަކިކުރުމެވެ. އެގޮތުން ސަރުކާރުގެ އެންމެ މަތީ ވެރިޔާ ރައްޔިތުންގެ ސީދާ ވޯޓަކުން އިންތިޚާބު ކުރާއިރު، ދަޢުލަތުގެ އެންމެ މަތީ ވެރިޔާ އިންތިޚާބު ކުރާނީ ރައްޔިތުންގެ މަޖިލީހާއި ކައުންސިލްތަކުގެ ވޯޓުން ކަމަށް އެ ޤަރާރުގައި ބަޔާންކޮށްފައިވެއެވެ.