މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސް އިން 'ބޮޑުބަދަލު' ސިޔާސަތުތަކަށް ރަސްމީކޮށް ރުހުން ދީފިއެވެ.
ޕާޓީގެ ކޮންގްރެސްގެ ބައްދަލުވުމުގައި ކުރީގެ ޗެއާޕާސަން ފައްޔާޒް އިސްމާއީލް ހުށަހެޅުއްވި މި ސިޔާސަތުތަކަށް ވަނީ ފުޅާ ދާއިރާއެއްގައި މަޝްވަރާކޮށް، ޕާޓީގެ މެންބަރުންގެ މެދުގައި ރުހުން ހޯދާފައެވެ. މިގޮތުން ޕާޓީން ކުރިއަށް ރާވާފައިވާ ބޮޑެތި ބަދަލުތަކުގެ ސިޔާސަތުތައް ފާސްކުރެވިގެން ދިޔައީ ކޮންގްރެސްގެ އަޣުލަބިއްޔަތުންނެވެ.
މި ނިންމުމާއެކު އެމްޑީޕީން ކުރިއަށް އޮތް ތަނުގައި އަމަލުކުރާނެ މައިގަނޑު ސިޔާސަތުތަކަށް އިތުރު ބާރެއް ލިބިގެންދާނެ ކަމަށް ވަނީ ފާހަގަކުރެވިފައެވެ.
ކޮންގްރެސްއަށް ބޮޑު ބަދަލު ހުށަހަޅުއްވަމުން ފައްޔާޒް ވިދާޅުވީ، ރައީސުލްޖުމްހޫރިއްޔާއަށް ލިބިދީފައިވާ ބޮޑެތި ބާރުތައް ކުޑަކުރުމަށްޓަކައި އެމްޑީޕީން ހުށަހަޅާ ގަރާރުގައި، ދައުލަތާއި ސަރުކާރަކީ ވަކި ދެ އެއްޗެއްގެ ގޮތުގައި ކަނޑައަޅައި، ދައުލަތުގެ ވެރިޔަކާއި ސަރުކާރުގެ ވެރިޔަކު ވަކިން ބެހެއްޓުމަށް ހިމަނާފައިވާ ކަމަށެވެ. އަދި މިއީ އެއްގޮތަކަށްވެސް ބަރުލަމާނީ ނިޒާމުގެ ވާހަކައެއް ނޫން ކަމަށާއި، މީގެ މައިގަނޑު މަގުސަދަކީ ސަރުކާރަކީ ރައްޔިތުން ސީދާ ވޯޓުން އިންތިޚާބުކުރާ ބަޔަކަށް ހަދައި، ދައުލަތުގެ ވެރިޔާގެ ދައުރާއި ސަރުކާރުގެ ދައުރު ވަކިކޮށް، އެއް ފަރާތަކަށް ހުރިހާ ބާރެއް ޖަމާވުން ހުއްޓުވުން ކަމަށް އޭނާ ފާހަގަކުރެއްވި އެވެ.
ފައްޔާޒް އިތުރަށް ވިދާޅުވީ، ޤާނޫނުއަސާސީން އުންމީދުކުރި ގޮތަށް ދައުލަތުގެ ބާރުތައް ފާރަވެރިވެ، ޗެކްސް އެންޑް ބެލެންސަސް ނިޒާމު މިހާރު ހިނގަމުން ނުދާ ކަމަށެވެ. ރައްޔިތުންގެ މަޖިލީހަކީ ސަރުކާރު ޖަވާބުދާރީ ކުރުވާނެ ތަން ކަމަށް ބެލެވުނު ނަމަވެސް، މަޖިލީހުގެ ސުޕަރ މެޖޯރިޓީ ވެރިކަންކުރާ ޕީއެންސީއަށް ލިބުމުން، މުޅި ނިޒާމުގެ ބާރުތައް ވަނީ އެއް ފަރާތަކަށް ބުރަވެފައި ކަމަށާއި، އޭގެ ސަބަބުން ޤާނޫނުއަސާސީން ރައްޔިތުންނަށް ކަށަވަރުކޮށްދޭ ހައްގުތައް ވެރިމީހާގެ މުށުތެރެއަށް ގޮސްފައިވާ ކަމަށް ވިދާޅުވި އެވެ.
މީގެއިތުރުން ސުޕްރީމް ކޯޓުގެ ފަނޑިޔާރުން ފަދަ އިސް މަގާމުތަކުގައި ތިއްބަވާ ބޭފުޅުން މަޖިލީހުގެ އަޣުލަބިއްޔަތުން ވަކިކުރެވޭ ގޮތަށް އޮތުމަކީ ޝަރުއީ ދާއިރާގެ މިނިވަންކަން ގެއްލި، ސަރުކާރުން ބޭނުންވާ ގޮތަށް ކަންކަން ނިންމުމަށް މަގުފަހިވާ ކަމެއްގެ ގޮތުގައި ފައްޔާޒް ފާހަގަކުރެއްވި އެވެ.
ހަމައެއާއެކު، އެންޓި ކޮރަޕްޝަން ކޮމިޝަން (އޭސީސީ)، ޕީޖީ އަދި ހިއުމަން ރައިޓްސް ކޮމިޝަން (އެޗްއާރުސީއެމް) ފަދަ މިނިވަން މުއައްސަސާތަކުގެ މެންބަރުން އައްޔަންކުރުމާއި ވަކިކުރުމުގައި ރައީސުލްޖުމްހޫރިއްޔާއާއި ސަރުކާރުގެ މެޖޯރިޓީ އޮންނަ މަޖިލީހުގެ ނުފޫޒު އޮތުމަކީ އެ މުއައްސަސާތަކުގެ މިނިވަންކަން ގެއްލޭ މައިގަނޑު ސަބަބު ކަމަށްވެސް އޭނާ ވިދާޅުވި އެވެ.
