މާލެ އުތުރު ފަރާތު ބަނދަރު ތަރައްޤީކުރުމަށްޓަކައި މަސްވެރިންގެ ޕާކު ސަރަޙައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުތައް ނެގުމަށް ބިނާރާ ގެދޮރުވެރިކަމާ އުމްރާނީ ތަރައްޤީއާ ބެހޭ ވުޒާރާއިން އަންގަވައިފިއެވެ. އެސަރަޙައްދުގެ ބަނދަރު ތަރައްޤީކުރަނީ އެތަން ބޭނުންކުރާ ފަރާތްތަކަށް ދިމާވަމުންދާ ދަތިތަކަށް ހައްލެއް ގެނެސްދިނުމަށްކަމަށް އެވުޒާރާއިން ވިދާޅުވެއެވެ.
މާލޭ އުތުރު ފަރާތު ބަނދަރަކީ މާލެއަށް ލަފާފުރުމުގައި ގިނަ ބަޔަކު ބޭނުންކުރާ ސަރަޙައްދެކެވެ. ސަރުކާރުން ބޮޑުތަކުރުފާނު މަގު ތަރައްޤީކުރުމަށް ކުރިއަށްގެންދިޔަ މަޝްރޫޢާއެކު އެސަރަޙައްދުގެ ޖެޓީތައްވެސް ތަރައްޤީކުރުމަށްވަނީ ހަމަޖެހިފައެވެ.
ޖެޓީތައް ތަރައްޤީކުރުމުގެ ޢަމަލީ މަސައްކަތް ފެށުމަށްޓަކައި އެސަރަޙައްދުގައި އަޅާފައިވާ އުޅަނދުތައް ނެގުމަށް ބިނާރާ ގެދޮރުވެރިކަމާ އުމްރާނީ ތަރައްޤީއާ ބެހޭ ވުޒާރާއިންވަނީ އަންގަވާފައެވެ. އެވުޒާރާއިންވަނީ މަސްވެރިންގެ ޕާކު ހިމެނޭ ސަރަޙައްދުން ފެށިގެން ނާދީ ގޯޅިއާ ހަމައަށް އަޅާފައިވާ އުޅަނދުފަހަރު ހުކުރު ދުވަހުގެ ރޭ 11 ޖެހުމުގެ ކުރިން ނެގުމަށް އަންގަވާފައެވެ. އަދި އެމުއްދަތުގެ ފަހުން އެސަރަޙައްދުގައި ނުނަގާ ހުންނަ އުޅަނދުތައް އެވުޒާރާގެ ފަރާތުން ނަގާނެކަންވެސްވަނީ ވިދާޅުވެފައެވެ.
މާލޭ އުތުރު ފަރާތުން ބޮޑުތަކުރުފާނު ތަރައްޤީކުރަމުންދާއިރު އެސަރަޙައްދުގައި ބޮޑު ޕާކިންގއެއްވެސްވަނީ ޤާއިމުކޮށްފައެވެ. ހަމައެއާއެކު އެއީ ގިނަބަޔަކު ލަފާ ފުރުމުގައި ކޮންމެ ދުވަހަކުވެސް ބޭނުންކުރާ މުހިއްމު ހިސާބެއްކަމުން، އެސަރަޙައްދުގެ ޖެޓީތައްވެސް އާންމުންނާއި ދަތުރުވެރިންނަށް ފަސޭހަވާނެހެން ތަރައްޤީކުރުމަށް ސަރުކާރުންވަނީ ނިންމަވާފައެވެ.
ބޮޑުތަކުރުފާނު މަގު ތަރައްޤީކުރުމަށް ކުރިއަށްގެންދިޔަ މަޝްރޫޢުގެ ދަށުން އެސަރަޙައްދުން 6 މީޓަރު މާލޭގެ ތޮށިން ބޭރަށް ޖައްސާ މަގުވަނީ ފުޅާކޮށްފައެވެ.
