މަގުމަތީގެ ޓްރެފިކް އާންމު އުސޫލުތަކަށާއި ގަވާއިދުތަކަށް ތަކުރާރުކޮށް ހިލާފުވާ ފަރާތްތަކާމެދު ހާއްސަ ހަރުކަށި ފިޔަވަޅުތަކެއް އަޅަމުން ގެންދާނެކަން ކޮމިޝަނަރ އޮފް ޕޮލިސް ހާމަކުރައްވައިފިއެވެ.
ކޮމިޝަނަރ އޮފް ޕޮލިސް ދެއްވި މެސެޖެއްގައި ވިދާޅުވީ، މަގުމަތީގެ އުސޫލުތަކަށާއި އަދަބުތަކަށް ބޯނުލަބާ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި، ނުރައްކާތެރި އެކިއެކި ހާދިސާތައް ތަކުރާރުކޮށް ހިނގަމުންދާ ކަމަށެވެ. އެހެންކަމުން، ޓްރެފިކް ގާނޫނާއި ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ދިވެހި ފުލުހުންގެ ޚިދުމަތުން ހާއްސަ ފިޔަވަޅުތަކެއް އަޅަމުން ގެންދާނެ ކަމަށް ވިދާޅުވިއެވެ.
މި ފިޔަވަޅުތަކުގެ މައިގަނޑު މަގުސަދަކީ މަގުތަކަކީ އެންމެހާ ރައްޔިތުންނަށް ރައްކާތެރި އަދި އަމާން ތަނެއްގެ ގޮތުގައި ބޭއްވުމާއި، މަދު ބައެއްގެ ސަބަބުން ހިނގާ ނުރައްކާތެރި ހާދިސާތައް ހުއްޓުވުމަށް އެޅެންހުރި އެންމެ ހަރުކަށި ފިޔަވަޅުތައް އެޅުން ކަމަށް ސީޕީ ފާހަގަކުރެއްވިއެވެ.
މީގެއިތުރުން، ކަމާގުޅުންހުރި އެންމެހާ މުއައްސަސާތަކާ ގުޅިގެން މި ފިޔަވަޅުތައް އެންމެ މަތީ ދަރަޖައެއްގައި އެޅުމަށް ފުލުހުންގެ ކަމާބެހޭ ހުރިހާ ބަހާތަކަށް މިހާރު އަންގަވާފައިވާ ކަމަށްވެސް އެމަނިކުފާނު ވިދާޅުވިއެވެ. މި ފިޔަވަޅުތައް ގްރޭޓަރ މާލެ އޭރިޔާގެ އިތުރުން އަތޮޅުތެރޭގެ ރަށްރަށުގައިވެސް ވަރުގަދައަށް ތަންފީޒު ކުރެވެމުންދާނެއެވެ.
ސީޕީގެ މެސެޖު ނިންމަވާލައްވަމުން ވަނީ މަގުމަތީގެ ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މި މަސައްކަތުގައި އެންމެހާ ރައްޔިތުން އެހީތެރިކަމާއި އެއްބާރުލުން ދެއްވުމަށް އިލްތިމާސްކުރައްވާފައެވެ.
