ދެ ދާއިރާއަކުން އަގުތަށް ދަށަށް ދިއުމާއިއެކު އޯގަސްޓް މަހު މުދާލާއި ޚިދުމަތުގެ އަގު ދަށަށް ގޮސްފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސް ހިސާބުތަކުން ދައްކައިފިއެވެ. އޯގަސްޓް މަހު އަގުތަށް ދަށަށް ގޮސްފައިވަނީ ކަރަންޓާއި ވައިގެ ދަތުރުފަތުރުގެ ދައިރާއިންނެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސް ހިސާބުތައް ދައްކާގޮތުން، މިއަހަރުގެ ޖުލައި މަހާއި އަޅާބަލާއިރު އޯގަސްޓްމަހު ރާއްޖޭގެ ކޮންސިއުމަރ ޕްރައިސް އިންޑެކްސް، ސީޕީއައި %1.15 ދަށަށް ގޮސްފައިވެއެވެ. މިއަދަދު ދަށަށް ދިއުމުގެ މައިގަނޑު ސަބަބަކީ، ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމާ ގުޅިގެންނެވެ. މިގޮތުން، އޮގަސްޓް މަހު ކަރަންޓުގެ އަގު %3.21 ދަށަށް ގޮސްފައިވާއިރު، ވައިގެ ދަތުރުފަތުރުގެ އަގު ވަނީ %2.80 ހެޔޮވެފައެވެ. އަދި ދުންފަތުގެ ބާވަތްތަކުގެ އަގު ވަނީ %25.45 ގެ ބޮޑު މިންވަރަކަށް ދަށަށް ގޮސްފައެވެ.

ބައެއް ބާވަތްތަކުގެ ކާބޯތަކެއްޗާއި ޚިދުމަތްތަކުގެ އަގު ބޮޑުވި ނަމަވެސް، ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ އަގުތަކުގެ އިންޑެކްސް %1.15 ދަށަށް ގޮސްފައިވެއެވެ. މިމުއްދަތުގައި އަގުތައް ދަށަށް ދިޔަ ނަމަވެސް، މިދިޔަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހުގެ އަގުތައް ހުރީ %0.76 މަތީގައެވެ. އެހެން ކަމުން މަހުން މަހަށް އަގުތަށް ދަދަށް ދިޔަނަމަވެސް އަަހަރުން އަހަރަށް ބަލާނަމަ އަގުތައް އުފުލުނުކަން ރިޕޯޓުގައި ވަނީ ފާހަގަކޮށްފައެވެ.

މަހުން މަހަށް އައި މި ބަދަލަކީ ގޭބިސީތަކުން އާންމުކޮށް ގަނެއުޅޭ ތަކެތީގެ އަގަށް އައި އެވްރެޖް އެމްބީއެސްއިން ވަނީ ފާހަގަކޮށްފައެވެ. އޯގަސްޓު މަހު އަގު އުފުލުނު ކާބޯތަކެތީގެ ތެރޭގައި، ކިރުގެ އުފެއްދުންތައް ހިމެނެއެވެ. ބިހުގެ އަގު %1.99 އުފުލިފައިވާއިރު، މޭވާއާއި ތަރުކާރީގެ އަގު ވަނީ %1.19 ބޮޑުވެފައެވެ. އަދި މަހުގެ ބާވަތްތަކުގެ އަގު ވަނީ %0.83 އުފުލިފައެވެ.

ޚިދުމަތްތަކުގެ އަގަށް ބަލާއިރު، މުވާސަލާތީ ޚިދުމަތުން %2.23، ގެސްޓްހައުސްތަކުގެ އަގުތަކުން %2.72، އަދި ކާބޯތަކެތީގެ ޚިދުމަތްދޭ ތަންތަނާއި ހޮޓާތަކުގެ އަގުތަކުން %0.68 ވަނީ އުފުލިފައެވެ. މީގެ އިތުރުން ސިއްހީ ޚިދުމަތްތަކުގެ އަގު ވަނީ %0.99 އުފުލިފައެވެ.

ރާއްޖޭގެ ކޮންސިއުމަރ ޕްރައިސް އިންޑެކްސް ސީޕީއައި ދަށަށް ގޮސްފައިވާއިރު ރިޕޯޓުގައި މާލެއާއި އަތޮޅުތެރޭގެ ނިސްބަތްވެސް ހިމަނާފައެވެ. އެގޮތުން، މާލޭގެ ސީޕީއައި އިންޑެކްސްވަނީ ޖުލައި މަހާ އަޅާބަލާއިރު އޯގަސްޓް މަހު %1.57 އިންސައްތަ ދަށަށްގޮސްފައެވެ. އަދި އަތޮޅުތެރޭގައި މިއަދަދު ވަނީ %0.54 ދަށްވެފައެވެ.

ކޮންސިއުމަރ ޕްރައިސް އިންޑެކްސްއަކީ ގޭބިސީތަކުން ބޭނުންކުރާ ތަކެއްޗާއި ޚިދުމަތްތަކުގެ އަގަށް އަންނަ ބަދަލުތައް ދެނެގަތުމަށް ބޭނުންކުރާ މިންގަނޑެކެވެ. އިންފްލޭޝަން ނުވަތަ ތަކެތީގެ އަގު އުފުލޭ މިންވަރު ބެލުމަށް އެމްބީއެސް އިން ކޮންމެ މަހަކު މާލެއާއި އަތޮޅުތެރެ ހިމެނޭހެން 9,500 އަށްވުރެ ގިނަ ތަކެއްޗާއި ޚިދުމަތުގެ އަގުތައް އެއްކުރެއެވެ.