ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ތައާރަފުކުރުމަށް ނިންމާފައިވާ "މޯލްޑިވްސް ޕާލް ރެޒިޑެންސީ" ޕްރޮގްރާމާ ގުޅޭގޮތުން މައުލޫމާތު އޮޅުންފިލުވުމަށް، އަދާލަތު ޕާޓީގެ އިސް ވަފުދަކުން އިކޮނޮމިކް މިނިސްޓަރު މުހައްމަދު ސައީދާ ބައްދަލުކުރައްވައިފިއެވެ.

އިކޮނޮމިކް މިނިސްޓްރީގައި ބޭއްވުނު މި ބައްދަލުވުމުގައި އަދާލަތު ޕާޓީގެ އިސް ބޭފުޅުން ބައިވެރިވެވަޑައިގެންނެވިއެވެ. އޭގެ ތެރޭގައި އެ ޕާޓީގެ ރައީސް މުހައްމަދު ޝިފާން ވެސް ހިމެނިވަޑައިގަންނަވައެވެ. މި ބައްދަލުކުރެއްވުމަށްފަހު، މިނިސްޓަރު ސައީދާއެކު ނެންގެވި ފޮޓޯ އަދާލަތު ޕާޓީގެ ރަސްމީ ސޯޝަލް މީޑިއާ އެކައުންޓްތަކުގައި ވަނީ ހިއްސާކޮށްފައެވެ.

އަދާލަތު ޕާޓީން ބުނެފައިވަނީ މި ބައްދަލުވުމުގައި "މޯލްޑިވްސް ޕާލް ރެޒިޑެންސީ" ޕްރޮގްރާމާ ގުޅޭ މުހިންމު ކަންކަމުގެ މައުލޫމާތު ސާފުކޮށްފައިވާ ކަމަށެވެ. ނަމަވެސް، މި ބައްދަލުވުމާ ގުޅޭ އިތުރު ތަފުސީލެއް އެ ޕާޓީން އަދި ހާމަކޮށްފައެއް ނުވެއެވެ.

އިކޮނޮމިކް މިނިސްޓްރީން ކުރިއަށް ގެންދާ މި ޕްރޮގްރާމަކީ ރިއަލް އެސްޓޭޓް، އިއާދަކުރަނިވި ހަކަތަ އަދި ޓެކްނޮލޮޖީ ފަދަ ދާއިރާތަކަށް ބޭރުގެ ބޮޑެތި އިންވެސްޓަރުންނާއި ވިޔަފާރިވެރިން ގެނައުމަށް އެކުލަވާލާފައިވާ ޕްރޮގްރާމެކެވެ. މީގެ މައިގަނޑު މަގުސަދަކީ ފަތުރުވެރިކަމުގެ އިތުރުން ރާއްޖޭގެ އިގުތިސާދު އެހެނިހެން ދާއިރާތަކަށް ފުޅާކުރުމެވެ.

މި ޕްރޮގްރާމްގެ ދަށުން ކަނޑައެޅޭ ލިމިޓްތަކުގެ ތެރޭގައި ހިމެނޭ ޕްރީ-އެޕްރޫވްޑް ޕްރޮޖެކްޓްތަކަށް އިންވެސްޓްކުރާ ފަރާތްތަކަށް ކޮންމެ 5 އަހަރަކުން އާކުރެވޭ ރެޒިޑެންސީ ޕާމިޓެއް ލިބޭނެއެވެ. މިއީ ރާއްޖޭގައި ދިގު މުއްދަތަކަށް އާއިލާއާއެކު ދިރިއުޅުމުގެ ލުއިފަސޭހަކަން ލިބިދޭ، ވަޒަންވެރިވުމުގެ ހައްގު އެކަނި ލިބޭ ޕްރޮގްރާމެކެވެ. ރާއްޖޭގެ ގާނޫނުތައް ހަމަޖެހިފައިވާ ގޮތުން ދެވަނަ ޕާސްޕޯޓެއް ގެންގުޅުމުގެ ހުއްދަ ނޯންނާތީ، މި ޕްރޮގްރާމްގެ ދަށުން އެއްވެސް ފަރާތަކަށް ދިވެހި ރައްޔިތުކަމެއް ނުލިބޭނެއެވެ.