ނިއުޔޯކްގެ އެންމެ ކާރޫބާރޫ ބޮޑު އެއް ސަރަޙައްދު ކަމަށްވާ ޓައިމްސް ސްކުއެއަރގެ މެދުގައި ބަހައްޓާފައިވާ ބޮޑު ބިއްލޫރި ކިއުބެއްގެ ތެރޭގައި ދެމީހަކު އެބަތިއްބެވެ. މިއީ ކުށެއް ކޮށްގެން ބަންދު ކޮށްފައި ތިބި ބައެއް ނޫނެވެ. މިއީ "ފޮކްސް ސްޕޯޓްސް" އިން އެންމެ ފޯރިގަދަ ސަޕޯޓަރުން ހޯދުމަށް ބޭއްވި ޚާއްޞަ މުބާރާތަކުން މޮޅުވި ދެމީހުންނެވެ.

މި މުބާރާތުން މޮޅުވި އޮސްޓިން ފްރޭންކްލިން އަދި ކެވިން ކޮޓޮކޯ އަށް ލިބިފައިވާ ހަމައެކަނި މަސައްކަތަކީ، މުބާރާތް ކުރިއަށްދާ 6 ހަފްތާ ވަންދެން މި ބިއްލޫރި ކޮށީގެ ތެރޭގައި ތިބެ، މުބާރާތުގެ 104 މެޗު ބެލުމެވެ. މިއީ ކުޅިވަރަށް ލޯބިކުރާ މީހަކަށް ލިބޭނެ ވަރަށް ބޮޑު އުފަލަކަށް ވާއިރު، މި ފުރުޞަތު ލިބުމާއެކު ކެވިން ކޮޓޮކޯ ވަނީ އެންމެ ދުވަހެއްގެ ނޯޓިސް ދިނުމަށްފަހު އޭނާ އަދާކުރަމުންދިޔަ ވެއިޓަރުކަމުގެ ވަޒީފާވެސް ދޫކޮށްލާފައެވެ.

މަގުމަތިން ހިނގާފައިދާ މީހުންނަށް މިއީ ވަރަށް އާދަޔާޚިލާފު މަންޒަރަކަށް ވުމުން، ގިނަ ބަޔަކު ބިއްލޫރިގަނޑުގައި މޫނު ޖައްސައިގެން ތިބެ އެކި ސުވާލުތައް ކުރެއެވެ. ޓައިމްސް ސްކުއެއަރ ފަދަ މީހުން ގިނަ ތަނެއްގެ މެދުގައި، އެންމެންނަށް ފެންނަގޮތަށް ބިއްލޫރި ކޮއްޓެއްގައި ތިބޭތީ މީހުންގެ މެދުގައި އުފެދޭ އެންމެ ބޮޑު ސުވާލަކީ އެއް ސުވާލެކެވެ. މި ދެމީހުން ބުނާ ގޮތުގައި، މީހުންގެ ފަރާތުން އެންމެ ގިނައިން ކުރިމަތިވާ ސުވާލަކީ މިއީއެވެ.

"ކަލޭމެން ފާޚާނާއަށް ދަނީ ކޮންތާކަށް؟"

މުޅި ދުވަހު އެތައް ބައެއްގެ ލޯތައް އަމާޒުވެފައިވާ މި ދެމީހުންގެ ތަޖުރިބާއަކީ ކުޅިވަރަށް އޮތް ލޯބީގެ ސަބަބުން މީހުން ކޮންމެފަދަ ކަމެއްވެސް ކޮށްފާނެކަން ސާބިތުކޮށްދޭ މަޖާ އަދި ތަފާތު ހާދިސާއެކެވެ.