އިސްރާއީލުގެ ސައިބާ ސަވޭލަންސް ކުންފުންޏަކުން، "އެޑްފެކްޝަން" ކިޔާ އާންމުންނަށް މީގެ ކުރިން އެނގިފައިނުވާ ނުރައްކާތެރި އުކުޅެއް ބޭނުން ކޮށްގެން އަލްޖަޒީރާ މީޑިއާ ނެޓްވޯކުގެ 45 އަށްވުރެ ގިނަ ވަސީލަތްތަކަށް ސައިބާ ހަމަލާއެއް ދީފިއެވެ.

ސައިބާ ސެކިއުރިޓީ ކަންކަން ދިރާސާކުރާ ސިޓިޒަން ލެބް އިން ހާމަކޮށްފައިވާ ގޮތުގައި، މި ހަމަލާ ދީފައިވަނީ އިސްރާއީލުގެ "ޑިސްކަވަރ-ޓެކް" ނަމަކަށް ކިޔާ އެޑް-ޓެކް ކުންފުންޏަކާއި "ކެންޑިރޫ" ސުޕައިވެއާ އުފައްދާ ކުންފުންޏެއް ގުޅިގެންނެވެ.

މިއީ އޮންލައިން އިޝްތިހާރުތައް މެދުވެރިކޮށް ސުޕައިވެއާ ފެތުރުމަށް ބޭނުންކުރި މުޅިން އާ "ޒީރޯ-ކްލިކް" މެތަޑެކެވެ. އާދައިގެ ސައިބާ ހަމަލާތަކާއި ހިލާފަށް، މިފަދަ ހަމަލާއެއްގައި ފޯނު ނުވަތަ ކޮމްޕިއުޓަރު ބޭނުންކުރާ ފަރާތުން އެއްވެސް މެސެޖަކަށް، ލިންކަކަށް ނުވަތަ އިޝްތިހާރަކަށް ކްލިކްކުރާކަށް ނުޖެހެއެވެ.

ހެކަރުން ވަނީ އާންމު އޮންލައިން އިޝްތިހާރު ނިޒާމުތައް ބޭނުންކޮށްގެން ވަކި ހާއްސަ އަމާޒުތަކަކަށް އިޝްތިހާރު ފޮނުވާފައެވެ. ވެބްސައިޓަކުން ނުވަތަ އެޕްލިކޭޝަނަކުން އާދައިގެ ގޮތަކަށް ސްކްރޯލްކުރަމުން ދާއިރު، މި އިޝްތިހާރު ފޯނުގެ ބެކްގްރައުންޑްގައި ލޯޑުވުމާއެކު ނުރައްކާތެރި ކޯޑުތަކެއް ފޯނަށް އެކްޓިވޭޓްވެގެން ދެއެވެ.
މި މެތަޑް މެދުވެރިކޮށް ކެންޑިރޫ ސުޕައިވެއާ ފޯނަށް އިންސްޓޯލްވެ، ހެކަރުންނަށް އެ ފޯނެއްގެ މެސެޖުތަކާއި، ކޯލްތަކާއި، މައިކްރޯފޯނާއި ކެމެރާގެ އިތުރުން މުޅި ފޯނުގެ ފުރިހަމަ ކޮންޓްރޯލް ލިބިގެންދެއެވެ.

މިއީ އޮންލައިން އިޝްތިހާރު ސިސްޓަމްތައް ނާޖާއިޒު ގޮތުގައި ބޭނުންކޮށްގެން "ޒީރޯ-ކްލިކް" ސުޕައިވެއާ ފެތުރިކަން ފެންނަން އޮތް ފުރަތަމަ ފެކްޓް-ބޭސްޑް ހެކި ކަމަށް ސިޓިޒަން ލެބުން ބުނެއެވެ.

މި ނުރައްކާތެރި ހަމަލާ ފާހަގަކުރެވުމާއެކު، އަލްޖަޒީރާ މީޑިއާ ނެޓްވޯކުން ވަނީ އެކުންފުނީގެ އައިޓީ ސެކިއުރިޓީ ނިޒާމުތައް އިތުރަށް ވަރުގަދަކޮށް، ޑިވައިސްތައް ރައްކާތެރިކުރުމަށް އަވަސް ފިޔަވަޅުތަކެއް އަޅާފައެވެ.

މީގެ އިތުރުން، ގޫގުލް އާއި ބައިނަލްއަޤްވާމީ އެޑް-ޓެކް ބޮޑެތި ކުންފުނިތަކުން ވަނީ ޑިސްކަވަރ-ޓެކް ގެ އެކައުންޓްތަކާއި އެކުންފުންޏާ ގުޅުންހުރި ޑޮމެއިންތައް އެމީހުންގެ އިޝްތިހާރު ނެޓްވޯކްތަކުން ބްލޮކްކޮށް، ސަސްޕެންޑްކޮށްފައެވެ.