"އަދަދު" ނޫހުން އާންމުކުރި ޑޮކިއުމެންޓްރީއަކާ ގުޅިގެން ކްރިމިނަލް ކޯޓުން ނެރުނު އަމުރަށް ތަބާނުވާނެ ކަމަށާއި، އެ އަމުރާ ފާޅުގައި ޚިލާފުވާން ތައްޔާރަށް ހުންނެވި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ވިދާޅުވީ ކޯޓުން އެ މައްސަލައިގައި ވާހަކަ ނުދެއްކޭނެ ކަމަށް ބުނެ ނެރުނު އަމުރަކީ ނޫސްވެރިކަމުގެ މިނިވަންކަމަށް އޮތް ހުރަހެއް ކަމަށެވެ. ކޯޓު އަމުރާ ގުޅޭގޮތުން ވާހަކަ ދައްކަވަމުން ނަޝީދު ވިދާޅުވީ، މިފަދަ އަމުރުތަކާ ދެކޮޅަށް ގިނަ ބަޔަކު ނުކުމެ ނުކިޔަމަންތެރިކަން ދެއްކުމަކީ ހައްގުތައް ހިމާޔަތް ކުރުމަށް ކުރެވޭނެ މުހިންމު އިހުތިޖާޖެއް ކަމަށެވެ.
"އަޅުގަނޑު މި ހުރީ ކޯޓު އަމުރާއި ހިލާފު ވުމަށް ތައްޔާރަށް،" ނަޝީދު ވިދާޅުވިއެވެ.
ކްރިމިނަލް ކޯޓުން ނެރުނު އަމުރުގައި ވަނީ "އަދަދު" ނޫހުގެ ސީއީއޯ ހުސެއިން ފިޔާޒް މޫސާއާއި އެޑިޓަރު ހަސަން މުހައްމަދުގެ މައްޗަށް ގަޒުފް ކުރުމުގެ ދައުވާ އުފުލާފައިވާ ކަމަށެވެ. އަދި އެ ޑޮކިއުމެންޓްރީގައި ހިމެނޭ އެއްވެސް މައުލޫމާތެއް ނުވަތަ ވާހަކައެއް އެއްވެސް ސިފައެއްގައި ފެތުރުން ވަނީ މަނާކޮށްފައެވެ. ކޯޓުން ބުނެފައިވަނީ މިއީ މުޖުތަމައުގެ އަހުލާގީ މިންގަނޑު ހިފެހެއްޓުމަށްޓަކައި ސިއްރުކޮށްގެން ކުރިއަށް ގެންދާ ޝަރީއަތެއް ކަމަށެވެ.
މި މައްސަލައާ ގުޅިގެން ރައީސުލްޖުމްހޫރިއްޔާ މީގެ ކުރިން ވިދާޅުވެފައިވަނީ އެ ޑޮކިއުމެންޓްރީއަކީ ކަނޑައެޅިގެން ދޮގު މައުލޫމާތުގެ މައްޗަށް ބިނާކޮށްފައިވާ އެއްޗެއް ކަމަށެވެ. ރައީސް ވަނީ އެފަދަ ދޮގު ޚަބަރު ފަތުރާ ފަރާތްތަކާ މެދު ގާނޫނީ ފިޔަވަޅު އެޅުމަށް ކަމާބެހޭ މުއައްސަސާތަކުގައި އެދިވަޑައިގެންފައެވެ.
"މިފަދަ ދޮގު ވާހަކަ ދެއްކި ހުރިހާ ފަރާތްތަކާއި ދެކޮޅަށް އަޅުގަނޑު ދައުވާ ކުރަން އެދެން،" ރައީސް ވިދާޅުވެފައިވެއެވެ.
މި މައްސަލައިގެ ތަހުގީގަށް ފިޔާޒާއި ހަސަން ފުލުހަށް ހާޒިރު ކޮށްފައިވާއިރު، އެ ދެ ބޭފުޅުންވެސް ވަނީ ހަނު ހުރުމުގެ ހައްގު ބޭނުން ކުރައްވާފައެވެ. ފުލުހުން މިހާރު ވަނީ ކޯޓު އަމުރެއްގެ ދަށުން "އަދަދު" ނޫހުގެ އޮފީސް ބަލައި ފާސްކޮށް، ތަހުގީގަށް ބޭނުންވާ ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައެވެ.
