މިއަދު މޯލްޑިވްސް ޕޯސްޓާއި ސްޓޭޓް ބޭންކް އޮފް އިންޑިއާ (އެސް.ބީ.އައި) އާ ދެމެދު ކާޑު ޑެލިވަރީ އަދި ކޫރިއަރ ފޯރުކޮށްދިނުމުގެ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން އެސް.ބީ.އައިގެ ކަސްޓަމަރުންނަށް ބޭންކުން ދޫކުރާ އޭ.ޓީ.އެމް ކާޑުތައް ރައްކާތެރިކަމާއެކު ރާއްޖޭގެ އެކި ކަންކޮޅުތަކަށް ފޯރުކޮށްދިނުމުގެ މަސައްކަތް ކުރާނީ މޯލްޑިވްސް ޕޯސްޓުންނެވެ. މިއީ ބޭންކުގެ ޚިދުމަތްތައް ކަސްޓަމަރުންނަށް ފަސޭހަކަމާއެކު ފޯރުކޮށްދިނުމަށް އެޅުނު މުހިންމު ފިޔަވަޅެކެވެ.
މިކަމަށްޓަކައި ބޭއްވި ރަސްމިއްޔާތުގައި މޯލްޑިވްސް ޕޯސްޓްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރެވެ. އަދި އެސް.ބީ.އައިގެ ފަރާތުން ސޮއިކުރެއްވީ އެ ބޭންކުގެ އިސް ބޭފުޅުންނެވެ.
މޯލްޑިވްސް ޕޯސްޓުން ބުނި ގޮތުގައި، މި އެއްބަސްވުމުގެ ސަބަބުން ރަށްރަށުގައި ތިބޭ އެސް.ބީ.އައިގެ ކަސްޓަމަރުންނަށް މާލެ ނައިސް، ޕޯސްޓް މެދުވެރިކޮށް އެމީހުންގެ ކާޑުތައް ލިބޭނެ އިންތިޒާމު ހަމަޖެހިގެންދާނެއެވެ.
މިއީ ޕޯސްޓްގެ ވިއުގަ ބޭނުންކޮށްގެން ރާއްޖޭގެ މާލީ ދާއިރާއަށް ދެވޭ ވަރަށް ބޮޑު އެހީތެރިކަމެއްގެ ގޮތުގައި އެ ކުންފުނިން ފާހަގަކުރެއެވެ.
އެސް.ބީ.އައި އިންވެސް ވަނީ މި ޕާޓްނަރޝިޕްގެ ސަބަބުން ކަސްޓަމަރުންނަށް ލިބޭ ޚިދުމަތުގެ ފެންވަރު ރަނގަޅުވެ، ކާޑު ލިބުމުގައި ހޭދަވާ ވަގުތު ކުޑަވާނެ ކަމަށް އުންމީދުކުރާ ކަމަށް ބުނެފައެވެ.
