އެމެރިކާ އާއި އިސްރާއީލުގެ އަސްކަރިއްޔާއިން އީރާނަށް ދެމުންދާ ހަމަލާތަކުގެ އަސަރު އިންޑިއާ ކަނޑަށް ފޯރުމަކީ ބޮޑު ކަންބޮޑުވުމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މެދުއިރުމަތީގެ ހަމަނުޖެހުންތަކާ ގުޅޭ ގޮތުން އިންޑިއާގެ މީޑިއާއަކަށް ދެއްވި އިންޓަވިއުއެއްގައި ނަޝީދު ވިދާޅުވީ، މި ހަނގުރާމަ ފެށީ އިޒްރޭލުން ކަމަށާއި، ހަނގުރާމައިގެ ތެރެއަށް އެހެން ގައުމުތައް ވައްދަމުން ދަނީވެސް އިޒްރޭލުން ކަމަށެވެ.

އިންޑިއާ ކަނޑުގެ ސަރަހައްދުގެ ގައުމުތައް މި ހަނގުރާމައިގެ ތެރެއަށް ނުވައްދާނެ ކަމަށް އުއްމީދު ކުރައްވާ ކަމަށާއި، މިކަން އެމެރިކާ އާއި އިޒްރޭލަށްވެސް ވިސްނޭނެ ކަމަށް ވިދާޅުވި އެވެ.

ނަޝީދު މިމޭރުމުން ވިދާޅުވެފައިވާއިރު، ސްރީލަންކާގެ ކަނޑުގެ ސަރަހައްދާ ކައިރިން ޓޯޕިޑޯ ހަމަލާއަކުން ވަނީ އީރާނުގެ މަނަވަރެއް ފައްތާލާފަ އެވެ. ހަމަލާ ދިނީ އެމެރިކާގެ އަސްކަރިއްޔާ ކަމަށް ބެލެވޭ ކަމަށް ހަބަރުތައް ބުނެއެވެ. ހަމަލާ ދިނުމަށްފަހު، އީރާނުގެ އިތުރު މަނަވަރެއް ލަންކާގައި ވަނީ ބަނދަރު ކޮށްފައެވެ.

ހޮނިހިރު ދުވަހު ފެށި ހަމަލާތަކުގައި ވަނީ އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި ގިނަ ވެރިންތަކެއް އަވަހާރަ ކޮށްލާފައެވެ. އެމެރިކާ ބުނާ ގޮތުން، ހަނގުރާމައިގެ ކުރީ ކޮޅާ އަޅާ ބަލާއިރު، މިހާރު އީރާނުގެ މިސައިލް ހަމަލާތައް 90 ޕަސެންޓް ދަށްވެ، ޑްރޯން ހަމަލާތައް 83 ޕަސެންޓް މަދު ވެފައިވެއެވެ.

ނަމަވެސް، ރައްދުގައި އީރާނުން ދަނީ ގަލްފް ސަރަހައްދުގައިވާ ބަހްރެއިން، ކުވައިތު، ގަތަރު ފަދަ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި، ސީދާ އިޒްރޭލަށް ހަމަލާ ދެމުންނެވެ.

އީރާނުން ބުނަނީ ކިތަންމެ ދުވަހަކު ހަނގުރާމަ ދިގުދެމިގެން ދިޔަ ނަމަވެސް، ހަނގުރާމަ ހުއްޓާލަން ނޭދޭ ކަމަށެވެ. އެ ގައުމުގެ ފޮރިން މިނިސްޓަރު ވިދާޅުވީ، ތިމަންމެން މިތިބީ ދިފާއީ ތައްޔާރީ ހާލަތުގައި ކަމަށެވެ.