ވޯލްޑް ކަޕް ފެށެން 100 ދުވަހަށް ވެފައިވާއިރު، ޓިކެޓް ހޯދުމަށް ފޭނުންގެ މެދުގައި ވަނީ ވަރުގަދަ ވާދަވެރިކަމެއް އުފެދިފައެވެ.
ފީފާއިން ބުނާގޮތުގައި ޓިކެޓަށް އެދިފައިވާ މިންވަރު ލިބެން ހުރި ޓިކެޓަށްވުރެ 30 ގުނަ އިތުރެވެ.
ޓިކެޓްގެ އަގުތައް އިންތިހާއަށް ބޮޑުވެފައިވާއިރު، ފައިނަލް މެޗުގެ ޓިކެޓެއް ރީސޭލް މާކެޓުގައި 143,750 ޑޮލަރަށް ވެސް ވިއްކަން ހުރިކަން ފާހަގަ ކުރެވެއެވެ.
ރިޕޯޓުތައް ބުނާގޮތުން، އެމެރިކާއިން އީރާނަށް ދިން ހަމަލާތަކުގެ ސަބަބުން ދުނިޔޭގެ ސިޔާސީ މަސްރަޙު ވަނީ ނުތަނަވަސް ވެފައެވެ. އީރާނަކީ ވޯލްޑް ކަޕްގައި ކުޅުމަށް ހަމަޖެހިފައިވާ ޤައުމަކަށް ވާއިރު، އެމެރިކާގައި އެ ޓީމަށް ކުޅެވޭނެތޯ އާއި ސަލާމަތީ ކަންކަމާމެދު ސުވާލު އުފެދެއެވެ.
ބައެއް ފޭނުން ބުނާ ގޮތުގައި އެމެރިކާގެ ހަރުކަށި އިމިގްރޭޝަން ސިޔާސަތުތަކާއި ހަނގުރާމައިގެ ސަބަބުން، އެމެރިކާއަށް ދިއުމުގެ ބަދަލުގައި އެމީހުން އިސްކަންދެނީ ކެނެޑާގައި ހުންނަ މެޗުތައް ބެލުމަށެވެ. ހޯސްޓް ސިޓީއެއް ކަމަށްވާ މެކްސިކޯގެ ގުއަޑަލަހާރާގައި ކާޓެލް ލީޑަރެއް މަރުވުމާއި ގުޅިގެން ހިނގި ބޮޑެތި ހަމަނުޖެހުންތަކުގެ ސަބަބުން ސަލާމަތީ ކަންކަމާ މެދު ގިނަ ބަޔަކު ކަންބޮޑުވުން ފާޅުކުރެއެވެ.
ނަމަވެސް މެކްސިކޯގެ ރައީސް ވަނީ ފޭނުންނަށް ނުރައްކަލެއް ނެތް ކަމުގެ ޔަޤީންކަން ދެއްވާފައެވެ. ބައެއް ފޭނުންނާއި ޖަމާޢަތް ތަކުން ދަނީ އެމެރިކާގެ ސިޔާސަތުތަކާ ގުޅިގެން ވޯލްޑް ކަޕް ބޯއިކޮޓް ކުރުމަށް ގޮވާލަމުންނެވެ. ޚާއްޞަކޮށް އެފްރިކާގެ ބައެއް ޤައުމުތަކުގެ ފޭނުންނަށް އެމެރިކާއަށް ވަނުމުގައި ހުރި ހުރަސްތަކާ ހުރެ ނުރުހުން ފާޅުކުރެއެވެ.
އެހެން ކަމުން ދުނިޔޭގެ އެންމެ ބޮޑު ކުޅިވަރު މުބާރާތް މި ވަނީ ނުތަނަަސް ކަމެއްގައި ތެރޭގައެވެ.
