ބައިނަލްއަގުވާމީ ބާޒާރުތަކުގައި ގޭހުގެ އަގު 30 އިންސައްތައަށް ވުރެ ބޮޑަށް އުފުލިފައިވާ ކަމަށް ބައިނަލްއަގުވާމީ ނޫސްތަކުން ރިޕޯޓްކޮށްފިއެވެ.
ޔޫރަޕްގެ ބާޒާރުގައި ގޭހުގެ އަގު 33 އިންސައްތައަށް އުފުލިފައިވާ އިރު، އިނގިރޭސިވިލާތުގެ ބާޒާރުގައިވެސް ގޭހުގެ އަގު 30 އިންސައްތައަށް ވަނީ ބޮޑުވެފައެވެ. މިއީ 2023 ވަނަ އަހަރުގެ ޖެނުއަރީ މަހަށްފަހު، ދެ ސަރަހައްދުގައިވެސް ގޭހުގެ އަގު މިހާ ބޮޑަށް އުފުލުނު ފުރަތަމަ ފަހަރެވެ.
ދުނިޔޭގައި އެންމެ ފުޅާ ދާއިރާއެއްގައި ގޭސް އެކްސްޕޯޓްކުރާ އެއް ކުންފުނި ކަމަށްވާ، ގަތަރު އެނާޖީގެ މަރުކަޒުތަކަށް ދިން އަސްކަރީ ހަމަލަތަކަކާ ގުޅިގެން، ގޭސް އުފެއްދުން މެދުކަނޑާލަން ޖެހުމުން، ހޯމަ ދުވަހު ގޭހުގެ އަގު ގާތްގަނޑަކަށް 50 އިންސައްތައަށް އުފުލިގެން ދިޔައެވެ.
ތަޖްރިބާކާރު ފަރާތްތަކުން ފާހަގަ ކުރައްވާ ގޮތުގައި، ގޭސް ރައްކާ ކުރެވޭ މިންވަރު މަދުވެ، ބޭރުން ގެންނަ ގޭހަށް ވަރަށް ބޮޑަށް ބަރޯސާ ވާންޖެހޭ ގައުމެއްގެ ހައިސިއްޔަތުން، ފެބްރުއަރީ މަސް ނިމުނުއިރު ހަމައެކަނި 30 އިންސައްތައަށް ވުރެ ދަށް ރިޒާވެއް ހިފެހެއްޓިފައި ހުރި، އިނގިރޭސިވިލާތަށް، މި ހާލަތުގެ ނުރައްކާ ވަކިން ބޮޑެވެ.
ރާއްޖެއަށް ގޭސް ގެންނަ، މެދުއިރުމަތީގެ ބައެއް ގައުމުތަކުގެ ތެޔޮ ކާރުހާނާތަކަށްވެސް އަސްކަރީ ހަމަލަތައް ދީފައިވެއެވެ. ނަމަވެސް، ދިވެހި ސަރުކާރުން ހާމަ ކޮށްފައިވަނީ، ތެލާ ގޭސް ލިބުމަށް، ދިވެހިރާއްޖެއަށް، ދަތިކަމެއް ނެތް ކަމަށާއި، ރައްޔިތުން ކަންބޮޑު ނުވުމަށެވެ.
